မန္တလေးတိုင်း၊ မိုးကုတ်မြို့ကို စစ်ကောင်စီ ဝင်လာချိန်မှာ တိုက်ပွဲမဖြစ်အောင် TNLA က PDF အထိုင်နေရာတွေအထိ တပ်ဖြန့်ပြီး အခြေအနေကို ထိန်းဖို့ ပြင်ဆင်နေတယ်လို့ မိုးကုတ်သပိတ်ခေါင်းဆောင် ကိုစိုးဌေးက ပြောပါတယ်။
မိုးကုတ်မြို့ကို ပြန်လက်လွှတ်မယ်လို့ တအာင်းအမျိုးသားလွတ်မြောက်ရေးတပ်မတော် (TNLA) က အောက်တိုဘာ ၂၉ ရက်မှာ ကြေညာထားတာပါ။
မိုးကုတ်မြို့ကနေ တပ်တွေဆုတ်ခွာဖို့ TNLA က အချိန်တလယူထားပြီး နိုဝင်ဘာလကုန်မှာ ထွက်သွားဖို့ ပြင်ဆင်နေတာ ဖြစ်ပါတယ်။
TNLA ရဲ့ ဆုံးဖြတ်ချက်နဲ့ ပတ်သက်ပြီး အမျိုးသားညီညွတ်ရေးအစိုးရ (NUG) ကာကွယ်ရေးဝန်ကြီးဌာနနဲ့ မန္တလေး ဒေသတွင်းကာကွယ်ရေးအဖွဲ့တွေက ညှိနှိုင်းဖို့ ကြိုးစားခဲ့ပေမဲ့ လက်ရှိအချိန်အထိ အဆင်မပြေသေးဘူးလို့ သိရပါတယ်။
မိုးကုတ်မြို့ထဲကို စစ်ကောင်စီဝင်လာချိန်မှာ ဘယ်လိုတုံ့ပြန်မယ် ဆိုတာနဲ့ ပတ်သက်ပြီး ဒေသကာကွယ်ရေးအဖွဲ့တွေဘက်က ဆွေးနွေးမှုတွေ ရှိနေဆဲဖြစ်ပြီး ဆုံးဖြတ်ချက်တခု မထွက်လာသေးဘူးလို့ ဆိုပါတယ်။
မိုးကုတ်သပိတ်ခေါင်းဆောင် ကိုစိုးဌေးက “TNLA ဘက်ကတော့ သူတို့တပ်တွေ ဖြန့်ထားတယ်၊ ကျနော်တို့ရှိတဲ့ အထိုင်တွေကို သူတို့ဖြန့်ထားတယ်။ အချင်းချင်း အဲဒီလို ပြန်ထိန်းတဲ့ အဓိပ္ပာယ်မျိုးလို့ ခန့်မှန်းလို့ရတယ်ပေါ့။ တချို့ လက်နက်ကြီးတွေ ဘာတွေဆိုရင် ကျနော်တို့ တပ်အထိုင်တွေဘက်ကို လှည့်ထားတာမျိုးတွေ ဘာတွေ တွေ့ရတယ်။ မိုးကုတ်မြို့ရဲ့ အရှေ့ဘက်ခြမ်း ပြင်ဦးလွင်ထွက်တဲ့လမ်း အဲဒီဘက် လမ်းကြောတကြောလုံးကိုတော့ TNLA က တာဝန်ယူထားတယ်။ အနောက်ဘက်ခြမ်းနဲ့ ကျနော်တို့ မိုးမိတ်အစပ်အထိပေါ့။ ဒီဘက်ကနေ ဖော့တောလမ်းဆုံနားကနေ မိုးမိတ်အစပ်အထိတော့ ကျနော်တို့ ဒီဘက်က အင်အားစုတွေက တာဝန်ယူထားတယ်ပေါ့။ နောက်တချက်က ကျနော်တို့ အဲဒီဘက် အရှေ့ခြမ်းဘက်ကို ဘယ်တပ်ရင်းတပ်ဖွဲ့ကိုမှ မလာခိုင်းဘူးပေါ့နော်။ TNLA က အစကတည်းက သူ့အစီအစဉ်နဲ့သူ လုပ်မယ်ပေါ့နော်၊ ဘယ်လိုညှိညှိ ရမယ့်အနေအထားတော့ မတွေ့ရဘူး။ ပြီးတော့ ဒီဘက်ကလည်း မဟာမိတ်ဆက်ဆံရေး ပျက်လို့မဖြစ်ဘူးဆိုတဲ့မူ ကိုင်ထားရတာပေါ့။ TNLA ကတော့ အဲဒီလို သိပ်စဉ်းစားပုံမရဘူး။ သူတို့ကတော့ တရုတ်ဖိအားက ဘယ်လိုရှိနေလဲမသိဘူး၊ နောက် တရုတ်က သူတို့ကို ဘယ်လိုအခြေအနေမျိုးအထိ လုပ်ပိုင်ခွင့်ပေးထားလဲ မသိရဘူးပေါ့နော်။ ကျနော်တို့ မဟာမိတ်တွေကို သေသေချာချာ ပြန်တိုက်ဖို့ အချိန်တခုယူဖို့ လိုအပ်တယ် စသဖြင့် ဘာမှ အဲဒီလို အသိပေးတာ ပြောတာဆိုတာ မရှိဘူးလေ” လို့ ပြောပါတယ်။
၁၀၂၇ စစ်ဆင်ရေးလှိုင်းတွေမှာ ရှမ်း-မန်းနယ်စပ်မြို့တွေကို မြောက်ပိုင်းမဟာမိတ်တွေနဲ့ ဒေသတွင်း PDF တွေ ပူးပေါင်းသိမ်းယူခဲ့တာဖြစ်ပြီး တိုက်ပွဲတွေ စတင်ဖော်ဆောင်ချိန်မှာ မဟာမိတ်တွေအကြား တပ်နေရာချထားရေး၊ အုပ်ချုပ်ရေးနဲ့ သယံဇာတ စီမံခန့်ခွဲရေးဆိုင်ရာ တရာဝင် နိုင်ငံရေးသဘောတူညီချက်တွေ မရှိခဲ့တာကြောင့် လက်ရှိပြဿနာတွေနဲ့ ကြုံတွေ့နေရတာလို့ မန္တလေးဒေသတွင်း နိုင်ငံရေးသမားတွေက မှတ်ချက်ပြုပါတယ်။
မိုးကုတ်ဒေသခံ ကာကွယ်ရေးအဖွဲ့ ရဲဘော်တယောက်က “တော်လှန်ရေးကာလ ကြာမြင့်လာတာရယ်၊ ပြည်သူတွေရဲ့ အခက်အခဲတွေရယ်ကြောင့် ကာကွယ်ရေးအဖွဲ့ တော်တော်များများက ဘဏ္ဏာရေး-စီးပွားရေးလေးတွေ လုပ်ဆောင်ပြီး တပ်ကို အားဖြည့်နေတဲ့ အပိုင်းတွေမှာတော့ နစ်နာမှုရှိလာမယ်ပေါ့။ မြို့ကိုတောင်မှ တရုတ်ရဲ့ ကြားဝင်မှုနဲ့ ပြန်လည်ပေးဆောင်ထားပြီ ဆိုတော့ တခြားဖိအားတွေ ရှိလာတာနဲ့အမျှ ကျနော်တို့ရဲ့ မဟာမိတ် ERO တွေကလည်း စစ်လက်နက်ခဲယမ်း ကူညီအားဖြည့်တာတွေ နည်းနည်း လျော့ပါးသွားလိမ့်မယ်လို့ မှတ်ယူလို့ရတာပေါ့နော်။ တာဝန်ခွဲအပ်ပေးထားရေးတွေမှာလည်း လိုအပ်သလို စီမံရတာကြောင့် အခက်အခဲတွေတော့ ရှိလာမှာပေါ့ဗျာ” လို့ ပြောပါတယ်။
မိုးကုတ်မြို့နဲ့ မိုးမိတ်မြို့တွေကို ၂၀၂၄ ဇူလိုင်လအတွင်းမှာ TNLA နဲ့ မဟာမိတ်တွေက သိမ်းယူခဲ့တာဖြစ်ပြီး တနှစ်ကျော်အကြာမှာ တရုတ်အစိုးရရဲ့ ကြားဝင်ဖိအားပေးမှုကြောင့် ပြန်လည်လက်လွှတ်ရမယ့် အခြေအနေ ဖြစ်လာခဲ့တာပါ။
ဒီအခြေအနေတွေနဲ့ပတ်သက်ပြီး TNLA ပြောရေးဆိုခွင့်ရှိသူကို DVB က အကြိမ်ကြိမ် ဆက်သွယ်မေးမြန်းဖို့ ကြိုးစားပေမဲ့ လက်ရှိအချိန်အထိ ပြန်လည်ဖြေဆိုတာ မရှိသေးပါဘူး။
သုတချမ်းသာ
