ဆီးရီးယားနိုင်ငံမှာ အစိုးရ လိုလားတဲ့ တိုက်ခိုက်ရေးသမားတွေက အာလာဝိုက် တိုင်းရင်းသားလူနည်းစုဝင် ရာပေါင်းများစွာကို သတ်ဖြတ်ခဲ့တဲ့ မတ်လအရေးအခင်း သွေးထွက်သံယိုမှု လှိုင်းလုံးကြီးတရပ်မှာ သံသယရှိသူတွေကို နိုဝင်ဘာ ၁၈ ရက်က ပထမဆုံး ရုံးတင်စစ်ဆေးခဲ့ပါတယ်။

ဒီအမှုဟာ လက်ရှိသမ္မတ အာမက် အယ်လ်ရှာရားရဲ့ တာဝန်ခံမှုကတိကို စမ်းသပ်ချက်အဖြစ် ရှုမြင်ကြပါတယ်။

အာလာဝိုက် အသိုင်းအဝိုင်းတွေကို တိုက်ခိုက်မှုတွေမှာ ပါတယ်လို့ စွပ်စွဲခံရတဲ့ လူ ၁၀ ယောက်ပါတဲ့ အဖွဲ့နဲ့ အကြမ်းဖက်မှုတွေကို ဖြစ်စေတဲ့ ရာထူးကနေ ဖယ်ရှားခံရတဲ့ အရင်သမ္မတ ဘာရှား အယ်လ်အာဆတ် အပေါ် သစ္စာရှိတဲ့ စစ်သွေးကြွတွေက လက်ရှိအစိုးရတပ်ဖွဲ့တွေကို တိုက်ခိုက်မှုတွေမှာ ပါတယ်လို့ စွပ်စွဲခံရသူတွေအကြား ညီတူညီမျှ ခွဲထုတ်ထားတယ်လို့ တရားရေး သတင်းရင်းမြစ်တွေက ပြောပါတယ်။

အယ်လ်ရှာရား ဦးဆောင်တဲ့ ဆွန်နီအစ္စလာမ္မစ် သူပုန်တွေက အာလာဝိုက် မျိုးနွယ်စုဝင် အာဆတ်မိသားစုရဲ့ ၅၄ နှစ်ကြာ အာဏာရှင်အုပ်ချုပ်မှုကို အဆုံးသတ်ခဲ့ပြီးတဲ့နောက် ဒီဇင်ဘာလမှာ ဒီသွေးချောင်းစီးမှုဟာ အဆိုးရွားဆုံး အကြမ်းဖက်မှုတွေထဲက တခုဖြစ်ခဲ့ပါတယ်။

သံသယရှိသူတွေကို ဆီးရီးယားမြောက်ပိုင်း အလက်ပိုတရားရုံးက အများပြည်သူရှေ့မှောက်မှာ ရုံးတင်စစ်ဆေးခဲ့ပါတယ်။

ပြည်တွင်းစစ်ဖြစ်အောင် လှုံ့ဆော်မှု၊ ခွဲထွက်မှု၊ ကြိုတင်ကြံစည်ထားတဲ့ လူသတ်မှု၊ လုယက်မှုတို့ အပါအဝင် စွဲချက်တွေနဲ့ ရင်ဆိုင်ခဲ့ရတယ်လို့ တရားရေးသတင်းရင်းမြစ်တွေက ပြောခဲ့ပါတယ်။

နှစ်ဖက်စလုံးက သံသယရှိသူတွေကို အရပ်သားတွေကို သတ်ဖြတ်မှု၊ စစ်တပ်စစ်ဆေးရေးဂိတ်တွေနဲ့ အစိုးရအဆောက်အအုံတွေကို တိုက်ခိုက်ခဲ့တဲ့ စစ်သွေးကြွတွေကို ဖွဲ့စည်းမှု စွဲချက်တွေနဲ့ စစ်ဆေးမေးမြန်းခဲ့တယ်လို့ တရားရုံး သတင်းရင်းမြစ်တရပ်နဲ့ တရားခွင်ကို ရုပ်မြင်သံကြားကနေ ထုတ်လွှင့်ချက်တွေအရ သိရပါတယ်။

အစိုးရရှေ့နေချုပ်ဟာ စစ်တပ်နဲ့ ဆက်နွှယ်တဲ့ လက်နက်ကိုင်အဖွဲ့တွေနဲ့ ဆက်စပ်နေတဲ့ လူ ၃၀၀ လောက်နဲ့ အာဆတ်ခေတ် လက်နက်ကိုင်အဖွဲ့တွေထဲက လူ ၂၆၅ ယောက်လောက်ကို စွဲချက်တင်ခဲ့တယ်လို့ အယ်လ်ရှာရားက ခန့်အပ်ထားတဲ့ အချက်အလက်ရှာဖွေရေးကော်မတီရဲ့ အကြီးအကဲ ဂျူမာ အယ်လ်အန်ဇီက ဆီးရီးယားမီဒီယာတွေကို ပြောပါတယ်။

လက်ရှိမှာ လူဘယ်လောက်ထိန်းသိမ်းခံထားရသလဲ ဆိုတာကို ရှင်းရှင်းလင်းလင်း မသိရသေးပါဘူး။

Source: Reuters