တအာင်းအမျိုးသားလွတ်မြောက်ရေးတပ်မတော် (TNLA) က စစ်ကောင်စီတပ်ကို မိုးကုတ်မြို့ထဲ ခေါ်သွင်းလာမယ်လို့ ဒေသတော်လှန်ရေးအင်အားစုတွေကို အတိအလင်း ပြောဆိုထားလို့ တော်လှန်ရေးတပ်တွေ လုပ်ရကိုင်ရ အခက်အခဲရှိနေတဲ့ အကြောင်း မိုးကုတ်သပိတ်ခေါင်းဆောင်က အတည်ပြုပြောပါတယ်။

နိုဝင်ဘာ ၁၅ ရက်က တရုတ်ပြည်မှာ ပြုလုပ်ခဲ့တဲ့ စစ်ကောင်စီနဲ့ TNLA တို့ရဲ့ အစည်းအဝေးအပြီးမှာ ဒီသတင်းစကား ထွက်ပေါ်လာတာပါ။

TNLA က နိုဝင်ဘာ ၂၉ ရက်နေ့ နောက်ဆုံးထားပြီး မိုးကုတ်မြို့ကနေ ထွက်ခွာမှာဖြစ်တဲ့အတွက် နိုဝင်ဘာလကုန်ပိုင်းမှာ စစ်ကောင်စီတပ်ပါ တခါတည်း မိုးကုတ်မြို့ထဲ ဝင်ရောက်လာမယ့် အခြေအနေ ဖြစ်ပါတယ်။

ဒီအခြေအနေနဲ့ပတ်သက်ပြီး တော်လှန်ရေးအင်အားစုတွေ အကြိတ်အနယ် ဆွေးနွေးနေကြဆဲ ဖြစ်ပြီး ဘယ်လိုရှေ့ဆက်မယ်ဆိုတဲ့ ဆုံးဖြတ်ချက်တော့ မထွက်လာသေးပါဘူး။

မိုးကုတ်သပိတ်ခေါင်းဆောင် ကိုစိုးဌေးက “ကျနော်တို့ အင်အားစုတွေကို TNLA က ခေါ်ပြီးတော့မှ သူတို့ကိုယ်တိုင် ခေါ်သွင်းလာမယ်လို့ အတိအလင်း ပြောတယ်။ တော်တော်ခက်ခဲတာပေါ့၊ သူကိုယ်တိုင် စစ်ကောင်စီကို ခေါ်သွင်းပြီးတော့မှ စစ်ကောင်စီ ရောက်ပြီ၊ အခြေချပြီဆိုမှ သူက ပြန်ဆုတ်သွားမယ်လို့ အဲဒီလို ပြောတာပေ့ါနော်။ သူတို့နဲ့ စစ်ကောင်စီကြားမှာတော့ ဆက်ဆံရေးရုံး ထားပြီးတော့မှ သူတို့လုပ်ငန်းတွေကတော့ ပြန်လုပ်ကြမယ် ထင်တယ်။ တခု ရှိတာက ကျနော်တို့က လုပ်ရကိုင်ရ အရမ်းခက်သွားတာပေါ့နော်။ TNLA နဲ့လည်း ကျနော်တို့က မဟာမိတ်လည်း မပျက်ချင်ဘူး။ ဆိုတော့ တဖက်မှာလည်း စစ်ကောင်စီကို ကျနော်တို့က ဒီမြို့တွင်းမဝင်ရေး ဆိုတဲ့ဟာ ရှိတာပေါ့။ လုပ်ရကိုင်ရတော့ တော်တော်ခက်တယ်ဗျ။ တော်လှန်ရေးအင်အားစုဘက်ကတော့ ကျနော်တို့ အများကြီး တိုင်ပင်ကြတုန်း၊ ဆွေးနွေးကြတုန်း၊ ချင့်ချိန်နေကြတုန်းပေါ့နော်။ တဖက်မှာလည်း မဟာမိတ်ပေါ့နော်၊ မိုးမိတ်ကတော့ ဘာပဲပြောပြော ကျောင်းသားတပ်မတော်နဲ့ KIA က ကူမယ်ဆိုတော့ တစုံတရာ အားရှိတယ်ပေါ့နော်။ မိုးကုတ်ကိုရော စစ်ကောင်စီ ပြန်မဝင်လာရေးပေါ့နော်၊ ဘယ်လို မဟာမိတ်တွေက ကူညီကြမလဲပေါ့၊ ကူညီနိုင်မလဲပေါ့၊ ကျနော်တို့ဘက်ကရော ဘာပြင်ဆင်ထားဖို့ လိုသလဲပေါ့။ စသဖြင့်တော့ ဒီဘက်မှာတော့ အကြိတ်အနယ် ကျနော်တို့ တိုင်ပင်နေကြပါတယ်ဗျ” လို့ ပြောပါတယ်။

ဒီအခြေအနေနဲ့ပတ်သက်ပြီး TNLA ပြောရေးဆိုခွင့်ရှိသူကို DVB က ဆက်သွယ်မေးမြန်းဖို့ ကြိုးစားပေမဲ့ လက်ရှိအချိန်အထိ ပြန်လည်ဖြေဆိုတာ မရှိသေးပါဘူး။

မိုးကုတ်မြို့နဲ့ မိုးမိတ်မြို့တွေကို ၂၀၂၄ ဇူလိုင်လအတွင်းမှာ TNLA နဲ့ မဟာမိတ်တွေက သိမ်းယူခဲ့တာ ဖြစ်ပြီး တနှစ်ကျော်အကြာမှာ ပြန်လည်လက်လွှတ်ရမယ့် အခြေအနေ ဖြစ်လာတာပါ။

သပိတ်ကျင်းခရိုင်၊ မိုးကုတ်မြို့နဲ့ နယ်မြေချင်းဆက်စပ်နေတဲ့ သပိတ်ကျင်း၊ မတ္တရာ၊ စဉ့်ကူးနယ်တွေ အကုန်လုံးမှာ စစ်ကောင်စီက စစ်ရေးအသာစီး ပြန်ယူနိုင်ဖို့ ကြိုးစားနေပါတယ်။

မိုးကုတ်မြို့ကို ပြန်မဝင်ခင်မှာ ပတ်ချာလည်မြို့နယ်တွေကိုပါ ဗျူဟာတကျ ပြန်ထိန်းချုပ်နိုင်ဖို့ စစ်ကောင်စီက ပြင်ဆင်နေတာ ဖြစ်ပါတယ်။

မတ္တရာပြည်သူ့ကာကွယ်ရေးအဖွဲ့ ပြန်ကြားရေး တာဝန်ရှိသူ ကိုဒေါင်းက “မထင်မှတ်တဲ့ လမ်းကြောင်း ဆိုတာကတော့ သူတို့က လောလောဆယ် မတ္တရာနယ်မြောက်ခြမ်းနဲ့ အရှေ့မြောက်ခြမ်းမှာ စစ်ကြောင်း ၂ ကြောင်း ရှိတယ်ဗျ။ မတ္တရာနယ်မြောက်ခြမ်းက တံငါ(တောင်)ရွာနဲ့ (မြောက်)ရွာကူးတဲ့ လမ်းကနေ ချောင်းရိုး-နကန်းအတိုင်း အနောက်ဘက်ကို ထိုးပြီးမှ စကျင်ရွာဘက်ကနေ မြောက်ဘက်ကိုထိုးမယ့် တကြောင်းရယ်လို့ ကျနော် သုံးသပ်တယ်။ နောက်တကြောင်း ဆည်တော်ဘက်မှာ ရောက်နေတဲ့ အကြောင်းက ဆည်တော်ဘက်ကနေ အနောက်ကားလမ်းအတိုင်း ဆင်းလာပြီးလို့ရှိရင် ကိုးပြွန်ဘက်ကနေ တောင်ခြေအတိုင်း မြောက်ဘက် ထိုးမယ်ဆိုရင်လည်း ရတယ်ဗျ။ အဲဒီလို ၂ ကြောင်း ရှိထားတယ်လို့ ကျနော် သတင်းရထားတယ်။ ကားလမ်းကြောအတိုင်းမထိုးဘဲ အဲဒီအတိုင်း ထိုးမယ်ဆိုရင်တော့ အဲဒီလို အကြောင်းတွေ ရှိတယ်ဗျ” လို့ ပြောပါတယ်။

တရုတ်အစိုးရက မြောက်ပိုင်းမဟာမိတ်တွေကို ဆက်တိုက်ဖိအားပေးခဲ့တာကြောင့် ဧပြီလထဲမှာ လားရှိုးမြို့ကို ကိုးကန့်တပ် MNDAA က ပြန်လက်လွှတ်ခဲ့ရပြီး နောက်ပိုင်းမှာ မြောက်ပိုင်းမဟာမိတ်တွေဟာ ရှမ်း-မန်း ဆက်စပ်နယ်က နောင်ချို၊ သီပေါ၊ ကျောက်မဲတို့ကို ဆက်ပြီး လက်လွှတ်ခဲ့ရပါတယ်။

အခု မိုးကုတ်-မိုးမိတ် တို့ကိုပါ မြောက်ပိုင်းမဟာမိတ်တွေက ဆက်လက်လွှတ်ရရင် တော်လှန်ရေး တစုံလုံးကို ထိခိုက်လာနိုင်တဲ့အတွက် ပြည်သူ့ကာကွယ်ရေးတပ်မတော်-မန္တလေးက တော်လှန်စစ်အတွက် လူငယ်တပ်သားသစ်တွေ ထပ်မံဖိတ်ခေါ်တဲ့ ကြေညာချက်ကို အောက်တိုဘာ ၃၁ ရက်မှာ ထုတ်ပြန်ပြီး အင်အားဖြည့်တင်းဖို့ ကြိုးစားခဲ့ပါတယ်။

သုတချမ်းသာ