ထိုင်းနိုင်ငံဘန်ကောက် နိုင်ငံတကာအလှမယ်ရွေးပွဲ Miss Grand International 2025 သွားရောက်ယှဉ်ပြိုင်ပြီး မွေးရပ်ဌာနေ ရှမ်းပြည်မြောက်ပိုင်း နမ့်ခမ်းမြို့ကို ပြန်လည်ရောက်ရှိလာတဲ့ အလှမယ်  JK Sophia   (ခ) နန်းယေ့ခမ်းကို နမ့်ခမ်း ရှမ်းစာပေနဲ့ ယဉ်ကျေးမှုအသင်းက နိုဝင်ဘာ ၁၃ ရက်  မွန်းလွဲ ၂ နာရီမှာ အခမ်းအနားနဲ့ ဂုဏ်ပြုဆုချီးမြှင့်ခဲ့ပါတယ်။ 

အခမ်းအနားမှာ နမ့်ခမ်းရှမ်းစာပေယဉ်ကျေးမှုအသင်း ဥက္ကဋ္ဌ ဦးစိုင်းချစ်ဆွေက ဂုဏ်ပြုအမှာစကားပ ပြောကြားပြီး ဂုဏ်ပြုလွှာပေးအပ်ကာ ရှမ်းအသိုက်အဝန်းကလည်း သူ့ကို အလှမယ်သရဖူနဲ့ အမှတ်တရလက်ဆောင် ကိုယ်စီပေးအပ်ခဲ့ပါတယ်။

Sophia ရဲ့ အဘွား၊ မိဘနဲ့ ဆွေမျိုးတွေကလည်း  ကိုယ်တိုင်လုပ် ရှမ်းခေါက်ဆွဲနဲ့ တို့ဖူးနွေးကို အလှမယ်ပြိုင်ပွဲဝင်စဉ် ပြသခဲ့တဲ့ တွန်းလှည်းနဲ့ သယ်ပြီး ဂုဏ်ပြုပွဲတက်ရောက်လာသူတွေကို ပြန်လည်ကျွေးမွေးဧည့်ခံခဲ့ပါတယ်။