အမေရိကန်ရေတပ်က လေယာဉ်တင်သင်္ဘောတစီးရဲ့ ပုံမှန်စစ်ဆင်ရေးအတွင်း ရဟတ်ယာဉ်တစင်းနဲ့ တိုက်လေယာဉ်တစင်းတို့ အောက်တိုဘာ ၂၆ ရက်မှာ တောင်တရုတ်ပင်လယ်ထဲ တနာရီအတွင်း သီးခြားစီ ပျက်ကျခဲ့ပြီး ဝန်ထမ်းအားလုံး ဘေးကင်းတယ်လို့ အမေရိကန်ရေတပ်က ပြောပါတယ်။
ပျက်ကျခဲ့တဲ့ လေယာဉ်အမျိုးအစားက F/A-18F စူပါဟောနက် တိုက်လေယာဉ်တစင်းနဲ့ MH 60R Sea Hawk ရဟတ်ယာဉ်တစင်း ဖြစ်ပါတယ်။
Sea Hawk ရဟတ်ယာဉ်ဟာ တနင်္ဂနွေနေ့ မွန်းလွဲ ၂ နာရီ ၄၅ မိနစ်လောက်မှာ ပျက်ကျခဲ့ပြီး မကြာမီ F/A-18F Super Hornet တိုက်လေယာဉ်တစင်းလည်း တောင်တရုတ်ပင်လယ်ထဲကို ပျက်ကျခဲ့တယ်လို့ ရေတပ်က ပြောပါတယ်။
အမေရိကန်သမ္မတ ဒေါ်နယ်ထရမ့်ပ် အာရှတိုက်ဆီ သွားရောက်လည်ပတ်နေချိန်မှာ ခုလို ပျက်ကျခဲ့တာပါ။
အမေရိကန် ပစိဖိတ်ရေတပ်က “ပါဝင်ပတ်သက်သူအားလုံး ဘေးကင်းပြီး တည်ငြိမ်တဲ့ အခြေအနေမှာ ရှိနေပါတယ်။ ဖြစ်ရပ်နှစ်ခုလုံးရဲ့ အကြောင်းရင်းကို လက်ရှိမှာ စုံစမ်းစစ်ဆေးနေဆဲ” လို့ X လူမှုကွန်ရက်ပေါ်ကနေ ပြောခဲ့ပါတယ်။
ရဟတ်ယာဉ်နဲ့ ဂျက်လေယာဉ် ၂ စီးစလုံး ပုံမှန်လုပ်ငန်းဆောင်တာတွေ လုပ်ဆောင်နေတဲ့ USS နစ်မစ်ဇ် လေယာဉ်တင်သင်္ဘောရဲ့ တည်နေရာကိုတော့ ထုတ်မပြောခဲ့ပါဘူး။
Source: Reuters
