အာရပ်စော်ဘွားများ ပြည်ထောင်စု (UAE) ရဲ့ မြို့တော်ဒူဘိုင်းကနေ ပျံသန်းလာတဲ့ ကုန်တင်လေယာဉ်တစင်း အောက်တိုဘာ ၂၀ ရက် အစောပိုင်းက ဟောင်ကောင်အပြည်ပြည်ဆိုင်ရာ လေဆိပ်မှာ ဆင်းသက်ချိန်မှာ ပြေးလမ်းကနေ ပင်လယ်ထဲ လမ်းချော်သွားခဲ့တယ်လို့ လူ ၂ ယောက် သေဆုံးခဲ့တယ်လို့ ဒေသတွင်း မီဒီယာတွေက ဖော်ပြပါတယ်။
အခင်းဖြစ်ပွားရာနေရာဆီ အရေးပေါ်ဝန်ထမ်းတွေ ထွက်သွားတာ တွေ့ရပြီး Boeing 747 ကုန်တင်လေယာဉ် Air ACT liveryဟာ လေဆိပ်ရဲ့ ပင်လယ်နံရံနားက ရေထဲမှာ တစိတ်တပိုင်း နစ်မြုပ်သွားတာပါ။
လေယာဉ်ခေါင်းပိုင်းနဲ့ အမြီးပိုင်းတွေ ကွဲထွက်သွားခဲ့ပါတယ်။ လေယာဉ်ပေါ်မှာ လိုက်ပါလာတဲ့ လေယာဉ်အမှုထမ်း ၄ ယောက်ကို ကယ်ဆယ်နိုင်ခဲ့တယ်လို့ ဟောင်ကောင်လေဆိပ်က သတင်းထုတ်ပြန်ပါတယ်။
လေယာဉ်ပြေးလမ်းနားက မြေပြင်ပေါ်မှာရှိတဲ့ ကားတစီးကို လေယာဉ်က ဝင်တိုက်မိလို့ ကားထဲက လူ ၂ ယောက် သေဆုံးခဲ့တယ်လို့ ရဲတပ်ဖွဲ့ကို ကိုးကားပြီး South China Morning Post သတင်းဌာနက ဖော်ပြပါတယ်။
ဒီဖြစ်ရပ်ပြီးတဲ့နောက် ကမ္ဘာ့အစည်ကားဆုံး လေဆိပ်က မြောက်ဘက် ပြေးလမ်းကို ပိတ်လိုက်တယ်လို့ ဟောင်ကောင်အပြည်ပြည်ဆိုင်ရာ လေဆိပ်ကပြောပါတယ်။
လေဆိပ် တောင်ပိုင်းနဲ့ အလယ်ပိုင်း ပြေးလမ်းတွေက လုပ်ငန်း ဆက်လည်ပတ်နေဦးမယ်လို့လည်း ပြောပါတယ်။
Source: Reuters
