ကိုရီးယားအလုပ်အကိုင်အတွက် Special EPS-TOPIK စာမေးပွဲကို ဝင်ရောက်ဖြေဆိုမယ့်သူ ၈၀၀ နီးပါးပဲ ရှိတယ်လို့ စစ်ကောင်စီသြဇာခံ အစိုးရပြည်ပအလုပ်အကိုင်အေဂျင်စီ (POEA) က ထုတ်ပြန်ထားပါတယ်။
အဲဒီစာမေးပွဲကို ဝင်ရောက်ဖြေဆိုခွင့်ရှိသူ ၅,၇၀၀ နီးပါးရှိပေမဲ့ ဖြေဆိုဖို့ လျှောက်ထားတာ အယောက် ၇၇၀ ပဲရှိပြီး ဝင်ဖြေမယ့်သူတွေရဲ့ ဖြေဆိုခွင့်အမှတ်စဥ်၊ ဖြေရမယ့်ရက်နဲ့ အချိန်တွေကို ထုတ်ပြန်ထားတာ ဖြစ်ပါတယ်။
Special EPS-TOPIK စာမေးပွဲကို ဖြေခွင့်ရှိသူထက် ဖြေမယ့်သူ လျော့နည်းရတာက အသက်အရွယ်နဲ့ အလုပ်အကိုင် အခြေကျနေတာကြောင့် ဖြစ်နိုင်တယ်လို့ ကိုရီးယားဘာသာ သင်တန်းနည်းပြတယောက်က ပြောပါတယ်။
“များသောအားဖြင့် ကိုရီးယားကို တခေါက်သွားလုပ်ပြီးလို့ ကိုယ်ပိုင်အလုပ်တခုခု လုပ်ရင်း မိသားစုနဲ့ အခြေချလိုက်ကြတာ။ တချို့ကတော့ တခြားနိုင်ငံကူးသွားတာတွေလည်း ရှိတယ်။”
Special EPS-TOPIK စာမေးပွဲမှာ တောင်ကိုရီးယားနိုင်ငံကို သွားရောက်လုပ်ကိုင်ခဲ့ဖူးတဲ့ အလုပ်သမားတွေ နောက်တကြိမ် သွားရောက်လုပ်ကိုင်နိုင်အောင် ပြုလုပ်ပေးတဲ့ စာမေးပွဲ ဖြစ်ပါတယ်။
တောင်ကိုရီးယားနိုင်ငံမှာ အနည်းဆုံး ၃ နှစ်အထက် လုပ်ကိုင်ခဲ့ဖူးပြီး မြန်မာနိုင်ငံကို ၂၀၁၀ ဇန်နဝါရီ ၁ ရက်နောက်ပိုင်း ပြန်လည်ရောက်ရှိခဲ့သူတွေ နောက်တကြိမ် ပြန်လည်သွားရောက်လုပ်ကိုင်နိုင်ဖို့ အတွက် Special EPS-TOPIK စာမေးပွဲကို ရည်ရွယ်ကျင်းပတာလို့ POEA က ဆိုပါတယ်။
Special EPS-TOPIK စာမေးပွဲဖြေဆိုခွင့် လျှောက်ထားတာကို စက်တင်ဘာ ၂၂ နဲ့ ၂၃ ရက်တို့မှာ လက်ခံခဲ့တာဖြစ်ပြီး အောက်တိုဘာ ၂၂ ကနေ ၂၄ ရက်အထိ စာမေးပွဲ ကျင်းပဖို့ စီစဥ်ထားတာ ဖြစ်ပါတယ်။
လက်ရှိ တောင်ကိုရီးယားနိုင်ငံမှာ မြန်မာလုပ်သား ၈၀,၀၀၀ နီးပါး ရောက်ရှိ လုပ်ကိုင်နေသလို လစဥ် လုပ်သားရာနဲ့ချီ စေလွှတ်နေတယ်လို့ ထုတ်ပြန်ချက်စာရင်းတွေအရ သိရပါတယ်။
