ဧရာဝတီတိုင်းထဲက တိုက်ပွဲတွေမှာ စစ်ကောင်စီတပ်က စစ်သားတွေ ဒဏ်ရာရရှိမှု များပြားတာကြောင့် အနောက်တောင်တိုင်း စစ်ဌာနချုပ်ထဲက စစ်ဆေးရုံမှာ ဆေးကုသနေရတဲ့ လူနာပြည့်တဲ့အထိ ဖြစ်နေလို့ အားကစားကွင်းထဲမှာ ယာယီဆေးရုံဆောက်ပြီး ကုသနေရတယ်လို့ သိရပါတယ်။

ဧရာဝတီတိုင်းထဲက ငါးသိုင်းချောင်း၊ လေးမျက်နှာ၊ ရေကြည်၊ အင်္ဂပူ၊ သာပေါင်းမြို့နယ်တွေမှာ စစ်ကောင်စီတပ်နဲ့ အာရက္ခတပ်တော် (AA)၊ ပြည်သူ့ကာကွယ်ရေးတပ်(PDF)တွေ တိုက်ပွဲတွေ ပြင်းထန်နေတာကြောင့် အောက်တိုဘာလ ပထမအပတ်က စတင်ပြီး စစ်ကောင်စီတပ်ဘက်က ထိခိုက်ဒဏ်ရာရရှိခဲ့တဲ့ စစ်သားတွေကို အနောက်တောင်တိုင်း စစ်ဌာနချုပ် (နတခ) လက်အောက်ရှိ ပုသိမ် စစ်မြေပြင်ဆေးတပ်ရင်း မဆရ-၄ အတွင်းကို ပို့ဆောင်ကာ ဆေးကုသနေရတဲ့ ဒဏ်ရာရရှိသူတွေ များပြားလွန်းတာကြောင့် ဆေးကုသဖို့နေရာ မလုံလောက်တဲ့အထိ ဖြစ်နေတာလို့ သိရပါတယ်။

ပုသိမ်ဆေးတပ်ရင်းနဲ့ နီးစပ်သူတယောက်က “ဒဏ်ရာရစစ်သား များလို့ပါ။ တိုင်းအတွင်း စစ်ဆင်ရေးကနေ ရလာတဲ့ ဒဏ်ရာရစစ်သည်တွေချည်းပါပဲ။ လူနာတွေကို ဆေးရုံအတွင်းမှာရှိတဲ့ ခုတင်တွေ မလောက်တော့လို့ အရေးပေါ်ပြင်ဆင်ရတာ။ ဆေးတပ်ရင်းအရှေ့မှာရှိတဲ့ ကစားကွင်းမှာ ယာယီဆေးရုံပုံစံနဲ့ ကုသနေရတာ” လို့ ပြောပါတယ်။

လက်ရှိ ပုသိမ် စစ်မြေပြင်တပ်ရင်း (ဆမရ-၄) မှာ ဆေးကုသမှု ခံယူနေရတဲ့ ဒဏ်ရာရရှိတဲ့ စစ်သားလူနာ အယောက် ၂၀၀ ထက်မနည်း ရှိနေပြီး သာမန်ဒဏ်ရာရရှိသူတွေကို ရေကြည် အမြောက်တပ် ၃၄၄ နဲ့ ကျုံကျော် ခလရ ၃၆ တပ်ရင်းတွေမှာ ထားရှိ ကုသပေးနေတာလို့ သိရပါတယ်။

ပုသိမ်က တပ်မိသားစုဝင်တယောက်က “ဒီဘက်ကို ရောက်လာတဲ့ လူနာတွေက အတော်ဆိုးတဲ့ စစ်သားလူနာတွေလို့ သိရတယ်။ တပ်သားသစ်တွေလား၊ အဟောင်းတွေလားဆိုတော့ သီးသန့် မသိရသေးပါဘူး။ လူနာကတော့ အရမ်းများတယ်။ ဆေးဝါးတွေကို ဗဟိုကနေ တိုက်ရိုက်ပို့ပေးနေတယ်” လို့ ပြောပါတယ်။

အဲဒီစစ်ဆေးရုံနဲ့ ယာယီဆေးရုံတွေမှာ ဆေးကုသမှု ခံယူနေရတဲ့သူတွေထဲမှာ တပ်ရင်းမှူး၊ ဗိုလ်ကြီး၊ ဗိုလ်မှူးအဆင့်တွေပါ ပါဝင်ပြီး သေဆုံးသူတွေလည်း ရှိတာကြောင့် ပုသိမ်က ရွှေမြင်တင် သုသာန်မှာ ညဘက်တွေပါမကျန် တိတ်တဆိတ် သင်္ဂြိုဟ်နေရတယ်လို့ သိရပါတယ်။

အခုလို အခြေအနေ ဖြစ်ပေါ်နေပေမဲ့ စစ်ကောင်စီက ဧရာဝတီတိုင်းထဲက လက်လွှတ်ထားရတဲ့ ဆုံးရှုံးနယ်မြေတွေ ပြန်လည်ရယူဖို့ စစ်မှုထမ်းလူငယ်တွေကို ရက်တို စစ်သင်တန်းတွေပေးပြီး ရှေ့တန်းကို ပို့နေတယ်လို့ သိရပါတယ်။