ထိုင်းအလယ်ပိုင်း၊ စမွတ်စခွန်းခရိုင်၊ ကထုန့်ဘဲန်မြို့နယ်ထဲမှာ မြန်မာရွှေ့ပြောင်းလုပ်သား ကလေးတွေ ပညာသင်ကြားနေတဲ့ စာသင်ကျောင်းတကျောင်း စစ်ဆေးအရေးယူခံရတယ်လို့ ထိုင်းသတင်းတွေမှာ ဖော်ပြပါတယ်။
ကထုန့်ဘဲန်မြို့နယ် အုပ်ချုပ်ရေးရုံး၊ မြို့နယ်ပညာရေးဌာန၊ လဝကရဲတပ်ဖွဲ့နဲ့ နယ်မြေခံရဲတို့ ပါဝင်တဲ့ ပူးပေါင်းအဖွဲ့ဟာ ဒီကနေ့ အောက်တိုဘာ ၁၀ ရက် မနက်က ကထုန့်ဘဲန်မြို့နယ်ရှိ ပညာသင်ကျောင်း ၂ ကျောင်းကို သွားရောက်စစ်ဆေးခဲ့ကြတယ်လို့ ကထုန့်ဘဲန် မြို့နယ်ဦးစီးမှူး နိုင်းကျဒုနန်း ကျွမ်းဖန်းက သတင်းထောက်တွေကို ပြောပါတယ်။
စစ်ဆေးချက်အရ ဒုတိယနေရာဖြစ်တဲ့ ထာ့မိုက်ရပ်ကွက်ရှိ သုံးထပ်တိုက်တတိုက်မှာ ရွှေ့ပြောင်း လုပ်သားကလေးနဲ့ ဆရာ/ဆရာမတွေ ပညာသင်ကြားနေကြတယ်၊ အတန်းလိုက်ခွဲပြီး သက်ဆိုင်ရာ အခန်းတွေမှာ သင်ကြားနေကြရာ အဆိုပါကျောင်းမှာ လာရောက်ဆည်းပူးသူ ကျောင်းသူ ကျောင်းသားပေါင်း ၉၀၀ နီးပါးရှိတယ်လို့ သိရတယ်၊ အားလုံး ရွှေ့ပြောင်းလုပ်သား ကလေးတွေ ဖြစ်ပြီး ဆရာ/ဆရာမ ၂၇ ယောက်မှာလည်း ရွှေ့ပြောင်းလုပ်သား မှတ်ပုံတင်လက်မှတ်သာ ကိုင်ဆောင်ထားကြတယ်လို့ ဆိုပါတယ်။
အဆိုပါအဆောက်အအုံကို ထိုင်းအမျိုးသမီးတယောက်က တာဝန်ခံ ငှားရမ်းထားပြီး လူငယ်စုစည်းရာ ဂေဟာဖွင့်လှစ်ဖို့ ရပ်ကွက်အုပ်ချုပ်ရေးရုံးမှာ ခွင့်ပြုချက်ရရှိထားပြီးဖြစ်တယ်၊ ဒါပေမဲ့ သင်ကြားရေးစင်တာ ဖွင့်လှစ်မယ့်အကြောင်း သက်ဆိုင်ရာ မြို့နယ်ပညာရေးမှူးရုံးမှာ ခွင့်တောင်းထားတာမရှိတော့ တရားမဝင်သလို ဆရာ/ဆရာမတွေဟာလည်း ရွှေ့ပြောင်းအလုပ်သမားလက်မှတ်နဲ့ ကျောင်းဆရာလုပ်ပိုင်ခွင့် မရှိတာကြောင့် ဥပဒေနဲ့ မညီညွတ်ဘူးလို့ ဆိုပါတယ်။
ဒါကြောင့် အဆိုပါပညာသင်ကျောင်းကို ပိတ်သိမ်းပြီး ကျောင်းသူကျောင်းသားတွေကတော့ ထိုင်းအစိုးရ စာသင်ကျောင်းတွေမှာ ပြောင်းရွှေ့သင်ကြားရမယ်၊ ထိုင်းမှာ ရွှေ့ပြောင်းကလေးတွေရဲ့ ပညာရေးကို အားပေးမြှင့်တင်ဖို့ မူဝါဒရှိတယ်၊ ဆရာ/ဆရာမတွေကတော့ ခွင့်ပြုချက်မရတဲ့ အလုပ်မှာ ဝင်ရောက်လုပ်ကိုင်မှုနဲ့ အရေးယူရမယ်လို့ မြို့နယ်ဦးစီးမှူးက ပြောသွားပါတယ်။
Source: JoCho Thai News
