မကွေးတိုင်း၊ ပေါက်နဲ့ မြိုင်မြို့နယ်ထဲက ရွာတွေကို စစ်တပ်က လေယာဉ်၊ စက်တပ်လေထီးတို့နဲ့ ဗုံးကြဲခဲ့ပြီး စစ်ကိုင်းတိုင်း၊ တန့်ဆည်မြို့နယ်မှာတော့ စစ်ကြောင်းထိုးပြီး လူနေအိမ်တွေကို မီးရှို့ဖျက်ဆီးသလို လေကြောင်းကနေလည်း ဗုံးကြဲတိုက်ခိုက်ခဲ့ပါတယ်။

တန့်ဆည်မြို့နယ်ထဲမှာ စစ်တပ်က စစ်ကြောင်းထိုးပြီး လူနေအိမ်တွေကို မီးရှို့ဖျက်ဆီးခဲ့လို့ လူနေအိမ် ၂၀ ကျော် မီးလောင်ပျက်စီးခဲ့သလို လေကြောင်းတိုက်ခိုက်လို့လည်း စာသင်ကျောင်းဆောင်တွေ ပျက်စီးသွားခဲ့တယ်လို့ ဒေသခံတွေဆီကနေ သိရပါတယ်။

​အမည်မဖော်လိုတဲ့ ဒေသခံတယောက်က “တန့်ဆည်မြို့နယ်ထဲက တနယ်ရွာကို စစ်တပ်စစ်ကြောင်းဝင်ပြီး အိမ်တွေမီးရှို့လို့ အိမ် ၂၀ လောက် မီးလောင်ပျက်စီးတယ်။ ရွာခံတွေကတော့ အခုထိဘေးလွတ်တဲ့နေရာတွေမှာ ထွက်ပြေးနေကြရတယ်” လို့ ပြောပါတယ်။

စစ်ကောင်စီတပ်ဟာ တန့်ဆည်မြို့နယ်ထဲကို အောက်တိုဘာ ၁ ရက်နေ့ကတည်းက စစ်ကြောင်းဝင်ရောက်လာသလို တန့်ဆည်နယ်နဲ့ ရေဦးနယ်အစပ်ကရွာတွေကို စစ်ကြောင်း ၂ ကြောင်းထိုးနေပြီး အောက်တိုဘာ ၃ ရက် ညနေအထိ စစ်ကြောင်းတွေရှိနေသေးတာကြောင့် တိုက်ပွဲဖြစ်တာလည်း ရှိတယ်လို့ တန့်ဆည် ပကဖ တာဝန်ရှိသူတယောက်က ပြောပါတယ်။

အောက်တိုဘာ ၁ ရက် မနက်ပိုင်းမှာလည်း တနယ်ကျေးရွာနဲ့ ၁ မိုင် ဝန်းကျင်ဝေးတဲ့  ခပေါင်းကြိုင်ကျေးရွာ စာသင်ကျောင်းကိုလည်း တံတားဦးလေတပ်ကနေတက်လာတဲ့ ဂျက်ဖိုက်တာနဲ့ ဗုံးကြဲသွားသေးလို့ စာသင်ကျောင်းဆောင်တွေ ပျက်စီးသွားခဲ့သေးတာကြောင့် စစ်ဘေးရှောင်ပြည်သူတွေအနေနဲ့ စစ်​တပ်ရဲ့ မြေပြင်စစ်ကြောင်းတွေကိုသာမကဘဲ လေကြောင်းအန္တရာယ်ကိုပါ ဂရုစိုက်သွားလာနေထိုင်ကြဖို့ တိုက်တွန်းလိုတယ်လို့လည်း သူက ဆက်ပြောပါတယ်။

စစ်တပ်ဟာ ပြီးခဲ့တဲ့ စက်တင်ဘာ ၂၆ ရက်နေ့ကလည်း တန့်ဆည်မြို့နယ်ထဲမှာရှိတဲ့ ကံထူးမကျေးရွာကို လေကြောင်းကနေတိုက်ခိုက်ခဲ့လို့ ပြည်သူ ၁၂ ယောက် သေဆုံးခဲ့ရသလို စက်တင်ဘာ ၃၀ ရက်နေ့မှာလည်း တန့်ဆည်မြို့နယ်နဲ့ ရေဦးမြို့နယ်အစပ်မှာရှိတဲ့ ကျေးရွာတွေကို ဂျိုင်ရိုကော်ပတာနဲ့ ဗုံးကြဲတိုက်ခိုက်ခဲ့လို့ ဖန်ခါဇင်ကျေးရွာက အမျိုးသမီး ၁ ယောက် သေဆုံးခဲ့ရပါ​သေးတယ်။

မကွေးတိုင်း၊ ပေါက်မြို့နယ် နဲ့ မြိုင်မြို့နယ်က ရွာတွေကို အောက်တိုဘာ ၃ ရက် ညနေပိုင်းမှာ တံတားဦးလေတပ်ကတက်လာတဲ့ ဂျက်ဖိုက်တာနဲ့ ဗုံးကြဲခဲ့တယ်လို့သိရပြီး ဖုန်းနဲ့ အင်တာနက်အခက်အခဲကြောင့် ထိခိုက်မှုအခြေအနေကိုတော့ မသိရသေးပါဘူး။

ပြီးတော့ မြိုင်မြို့နယ်၊ ဆူးဝင်းရွာနားကိုလည်း အောက်တိုဘာ ၃ ရက် ညနေ ၃ နာရီခွဲလောက်မှာ ပခုက္ကူ တပ်မ ၁၀၁ ထဲကလာတဲ့ စက်တပ်လေထီး ၂ စင်းနဲ့ ဗုံးကြဲသွားတယ်လို့ ဒေသခံတွေက ပြောပါတယ်။

ဒေသခံတယောက်က “သူတို့ကြဲချတာက ရွာအနီးအနားမှာရှိတဲ့ ရေနံချက်ဖိုတွေ အနီးကို ချသွားတာ။ လူထိခိုက်မှုတော့မရှိဘူး။ ပြည်သူလူ‌ထုအများစု‌နေတဲ့ရွာထဲကို ချမသွားတာကိုက ကံကောင်းသွားတာ။ ဘာတိုက်ပွဲမရှိပါဘူ။ အလကား‌နေရင်း သက်သက်ကို ဗုံးကြဲချသွားတာ” လို့ ပြောပါတယ်။

ဆူးဝင်းရွာကို စက်တင်ဘာ ၁၆ ရက် ညနေပိုင်းကလည်း စက်တပ်လေထီး ၂ စင်းနဲ့ ဗုံးကြဲခဲ့ပါသေးတယ်။