စစ်ကိုင်းတိုင်း၊ ဘုတလင်မြို့နယ်ထဲကို စက်တင်ဘာ ၂၅ ရက်နေ့မှာ စစ်တပ်က စစ်ကြောင်းထိုး ထပ်ဝင်လာတာကြောင့် ဒေသခံပြည်သူ ၁,၅၀၀ ကျော်ဟာ နေရပ်စွန့်ခွာ ထွက်ပြေးနေကြရတယ်လို့ သိရပါတယ်။

ဘုတလင်မြို့နယ် လူသားစာနာတာဝန်ခံက “၂၅ ရက်နေ့ မနက်ပိုင်းမှာ ဘုတလင်မြို့နယ်ရဲ့တောင်ခြမ်း မုံရွာနယ်နဲ့ထိစပ်နေတဲ့ ဇီးတော (အနောက်) ရွာကို မုံရွာ နမခ က စစ်ကြောင်းထိုးပြီး ဝင်ရောက်တပ်စွဲနေလို့ ရွာခံတွေနဲ့ အဲဒီနားရွာတွေက ပြည်သူ ၁,၅၀၀ လောက် ထွက်ပြေးလာကြတာဖြစ်ပါတယ်” လို့ DVB ကိုပြောပါတယ်။

နေရပ်စွန့်ခွာထွက်ပြေးလာကြတဲ့ ဒေသခံပြည်သူတွေကို ဘုတလင်မြို့နယ် လူသားစာနာအဖွဲ့က စားနပ်ရိက္ခာတွေစီစဉ် ထောက်ပံ့ကူညီပေးနေရတယ်လို့လည်း ဆိုပါတယ်။

ဘုတလင်အခြေစိုက် တော်လှန်ရေးတပ်ဖွဲ့ဝင်တယောက်က “ပြည်သူပိုင်အိမ်တွေကိုတော့ မီးရှို့တာမရှိသေးဘူး။ တိုက်ပွဲဖြစ်တာလည်းမရှိသေးပါဘူး။ စစ်ရေးအခြေအနေကတော့ တင်းမာနေတယ် ပြောလို့ရတယ်ဗျ” လို့ ​ပြောပါတယ်။

စစ်ကြောင်းထိုးလာတာဟာ အင်အား ၁၂၀ ဝန်းကျင်ရှိပြီး လူနေအိမ်တွေအတွင်းက ပြည်သူပိုင်ပစ္စည်းတွေကိုလည်း ခိုးယူနေကြတယ်လို့လည်း သူက ဆက်ပြောပါတယ်။

ဘုတလင်မြို့နယ်ကို ပြီးခဲ့တဲ့ သြဂုတ်လလယ်ပိုင်းကတည်းက စစ်ကြောင်းတွေ မကြာခဏ ဝင်ရောက်ခဲ့လို့ သောင်းချီတဲ့ပြည်သူတွေဟာ ဘေးလွတ်ရာနေရာတွေကို ထွက်ပြေးနေကြရပြီး ပြည်သူပိုင်နေအိမ်တွေကိုလည်း စစ်တပ်က မီးရှို့ဖျက်ဆီးခဲ့ကြတာကြောင့် မီးဘေးသင့်ပြည်သူတွေနဲ့ စစ်ဘေးရှောင်ပြည်သူတွေအတွက် စားနပ်ရိက္ခာ၊ နေထိုင်စရာ အဆောက်အအုံတွေ အရေးပေါ်လိုအပ်နေတယ်လို့ ကူညီဆောင်ရွက်ပေးနေသူတွေဆီကနေ သိရပါတယ်။