ကိုလံဘီယာနိုင်ငံ အနောက်မြောက်ပိုင်းရှိ အန်တီယိုကီယာပြည်နယ် ဆေဂိုဗီယာမြို့ရှိ မြေအောက် ၈၀ မီတာအနက်ရှိ လာ-ရယ်လစ်ကီယာ ရွှေတူးဖော်ရေးမိုင်းတွင်းမှာ ဘူမိစက်ပိုင်းဆိုင်ရာ ချို့ယွင်းချက်ကြောင့် ၄၈ နာရီကျော်ကြာ ပိတ်မိနေခဲ့တဲ့ မိုင်းတွင်းလုပ်သား ၂၃ ယောက်ကို ကိုလံဘီယာ ကယ်ဆယ်ရေးအဖွဲ့တွေက စက်တင်ဘာ ၂၄ ရက်မှာ အောင်အောင်မြင်မြင် ထုတ်ယူ ကယ်ဆယ်နိုင်ခဲ့ပါတယ်။
မိုင်းတွင်းလုပ်သားတွေအားလုံး အခြေအနေ ကောင်းမွန်ကြောင်း အစီရင်ခံစာ တင်ပြခြင်းနဲ့အတူ ဒေသတွင်း အရေးပေါ်တုံ့ပြန်ရေးသမားတွေနဲ့ ကနေဒါ နိုင်ငံစုံ အဲရစ်စ်မိုင်းနင်း အဖွဲ့ဝင်တွေ ပါဝင်ခဲ့တဲ့ ဒီကယ်ဆယ်ရေးလုပ်ငန်းလည်း ပြီးဆုံးခဲ့ပါတယ်။
စက်တင်ဘာ ၂၂ ရက် ဒေသစံတော်ချိန် မနက် ၁၁ နာရီလောက်မှာ မိုင်းတွင်းဆီကို အဓိက ဝင်ရောက်တဲ့လမ်းမှာ မြေပြိုကျမှုဖြစ်ပွားခဲ့တာလို့ ဆေဂိုဗီယာမြို့တော်က စက်တင်ဘာ ၂၃ ရက် ထုတ်ပြန်ချက်မှာ အတည်ပြုခဲ့ပါတယ်။
ကိုလံဘီယာ အမျိုးသား သတ္တုတူးဖော်ရေး အေဂျင်စီကတော့ ရွှေသတ္တုမိုင်းရဲ့ ပင်မဝင်ပေါက်မှာ ၁၅ မီတာလောက် ပြိုကျမှုကြောင့် အရေးပေါ်အခြေအနေ ဖြစ်ပေါ်ခဲ့ကြောင်း စက်တင်ဘာ ၂၃ ရက်မှာ ပြောကြားခဲ့ပါတယ်။
မိုင်းတွင်းလုပ်သား ၂၃ ယောက်လုံးကို ညှိနှိုင်းပြီး စနစ်တကျ ကြိုးပမ်းမှုတွေကနေ အောင်မြင်စွာ ဆွဲတင်နိုင်ခဲ့တယ်လို့ ဆေဂိုဗီယာမြို့တော်ဝန် အက်ဒွင် ကာစ်တာနေဒါက ပြောကြားခဲ့ပြီး အရေးပေါ်အခြေအနေကို ကျော်လွှားခဲ့ကာ အဆုံးထိတိုင် ကြိုးပမ်းခဲ့တယ်လို့ ဆိုပါတယ်။
ပိတ်မိနေတဲ့ မိုင်းတွင်းလုပ်သားတွေနဲ့ ပထမနေ့မှာပဲ အဆက်အသွယ်ရအောင် လုပ်ဆောင်ခဲ့ပြီးတော့ ကယ်ဆယ်ရေးလုပ်ငန်းတွေ လုပ်နေချိန်အတွင်းမှာလည်း သူတို့ဆီကို အစားအစာတွေ ပေးပို့ကာ စိတ်ချယုံကြည်စေခဲ့ကြောင်း ကယ်ဆယ်ခံခဲ့ရတဲ့ မိုင်းတွင်းလုပ်သား ဟက်တာ လိုပီရာက ပြောကြားခဲ့ပါတယ်။
မိုင်းလုပ်သားတွေဟာ မြေပေါ်ပြန်ရောက်လာခဲ့ပြီးနောက် စိတ်သက်သာရာရမှုနဲ့ ကျေးဇူးတင်ရှိကြောင်း ထုတ်ဖော်ပြောဆိုခဲ့ပါတယ်။
Source: Reuters
