စစ်ကိုင်း၊ မကွေးနဲ့ ပဲခူးတိုင်းထဲမှာ စစ်ကောင်စီတပ်ကြောင့် စက်တင်ဘာလ ပထမပတ်အတွင်း အရပ်သား အယောက် ၂၀ လောက် သေဆုံးပြီး ၁၀ ယောက်ကျော် ထိခိုက်ဒဏ်ရာရခဲ့တယ်လို့ ဒေသခံတွေနဲ့ ကာကွယ်ရေးတပ်ဖွဲ့တွေဆီက သိရပါတယ်။

စက်တင်ဘာ ၁ ရက်ကနေ ၇ ရက်အတွင်း စစ်ကောင်စီတပ်က စစ်ကြောင်းထိုးတာ၊ လက်နက်ကြီး ပစ်ခတ်တာနဲ့ လေကြောင်းတိုက်ခိုက်တာတွေကြောင့် ပြည်သူတွေ သေဆုံးထိခိုက်ခဲ့တာဖြစ်ပြီး ထွက်ပြေးတိမ်းရှောင်နေရသူတွေလည်း အများအပြားရှိနေတယ်လို့ ဒေသခံတွေနဲ့ ကာကွယ်ရေးတပ်ဖွဲ့တွေဆီက သိရပါတယ်။

စစ်ကိုင်းတိုင်းထဲက ဘုတလင်၊ ဝက်လက်၊ ထီးချိုင့်၊ ပုလဲ၊ ကျွန်းလှနဲ့ ကနီမြို့နယ်တွေမှာ စက်တင်ဘာ ၁ ရက်ကနေ ၇ ရက်အတွင်း စစ်ကောင်စီတပ်က ပစ်ခတ်မှုကြောင့် အရပ်သား ၁၃ ယောက်ထက်မနည်း သေဆုံးခဲ့ပြီး ၁၀ ယောက်ထက်မနည်း ထိခိုက်ဒဏ်ရာရခဲ့တယ်လို့ ဆိုပါတယ်။

စစ်ကိုင်းတိုင်း၊ ထီးချိုင့်မြို့နယ်အတွင်းက ကျေးရွာ ၄ ရွာကို Y12 အမျိုးအစား လေယာဉ်နဲ့ စက်တင်ဘာ ၇ ရက် ညနေခင်းပိုင်းမှာ ဗုံးကြဲချခဲ့တဲ့အတွက် ဒေသခံ အရပ်သား ၁၀ ယောက်အထိ သေဆုံးခဲ့ပြီး အများအပြား ဒဏ်ရာရရှိတယ်လို့ စစ်ကိုင်းအခြေစိုက် ကာကွယ်ရေးတပ်ဖွဲ့ဝင်တယောက်က ဆိုပါတယ်။

ပဲခူးတိုင်းထဲက အုတ်ဖိုနဲ့ လက်ပံတန်းမြို့နယ်တွေက ကျေးရွာတွေကိုလည်း စက်တင်ဘာ ၄ ရက်နဲ့ ၇ ရက်နေ့တွေမှာ စစ်ကောင်စီတပ်က စက်တပ်လေထီးတွေနဲ့ ဗုံးကြဲချခဲ့တဲ့အတွက် ၇ တန်းကျောင်းသား အပါအဝင် အရပ်သား ၄ ယောက်ထက်မနည်း သေဆုံးခဲ့ပြီး ထိခိုက်ဒဏ်ရာ ရသူတွေလည်း ရှိခဲ့ပါတယ်။

“အုတ်ဖိုမြို့နယ်ထဲမှာရှိတဲ့ ကိုင်းကြီးရွာ၊ ချင်းစုရွာနဲ့ ဒေါင်းစပါးကွင်း ကျေးရွာတွေကို စစ်တပ်ဘက်က စက်တပ်လေထီးတွေနဲ့ တိုက်ပွဲဖြစ်ပွားတာမရှိဘဲ ဗုံးကြဲတိုက်ခိုက်ခဲ့တာပါ။ ပြည်သူ ၃ ယောက် ဆုံးသွားတယ်။ အဲဒီထဲမှာ ကျောင်းသားလေးတယောက် ပါတယ်။ ဒဏ်ရာရသူတွေလည်း ရှိပါတယ်။ နွားတကောင်လည်း သေပါသေးတယ်။ ကိုင်းကြီးရွာက တိုက်နယ်ဆေးရုံနဲ့ ဘုန်းကြီးကျောင်းက အဆောက်အအုံတွေလည်း ပျက်စီးသွားပါတယ်။ ထိခိုက်သူတွေကို ဆေးကုသမှု ပေးနေတုန်းပါပဲ။”

အဲဒီအပြင် မကွေးတိုင်း ရေစကြို၊ နတ်မောက်နဲ့ ပေါက်မြို့နယ်အတွင်းက ကျေးရွာတွေကိုလည်း စစ်ကောင်စီတပ်က စက်တင်ဘာ ၁ ရက်၊ ၂ ရက်နဲ့ ၆ ရက်နေ့တွေမှာ လက်နက်ကြီးနဲ့ ပစ်ခတ်တာအပြင် လေကြောင်းကနေပါ ဗုံးကြဲတိုက်ခိုက်ခဲ့တဲ့အတွက် ဒေသခံ ၂ ယောက် သေဆုံးပြီး အများအပြား နေရပ်စွန့်ခွာနေကြရတယ်လို့ ဒေသခံတွေဆီက သိရပါတယ်။

စက်တင်ဘာ တပတ်အတွင်း စစ်ကိုင်း၊ မကွေးနဲ့ ပဲခူးတိုင်းထဲမှာ စစ်ကောင်စီတပ်ကြောင့် ထိခိုက်သေဆုံးမှု အခြေအနေတွေကို DVB က လက်လှမ်းမီသလောက် စုစည်းထားတာဖြစ်ပြီး မြေပြင်မှာ အခုထက် ပိုများနိုင်ပါတယ်။

စစ်ကောင်စီတပ်ဟာ အခုနှစ် ဇန်နဝါရီလကနေ ဩဂုတ်လကုန်ပိုင်းအထိ လေကြောင်းတိုက်ခိုက်မှု ၃,၃၁၈ ကြိမ် ပြုလုပ်ခဲ့ပြီး အရပ်သားပြည်သူ ၁,၄၈၇ ယောက် သေဆုံးခဲ့တယ်လို့ အမျိုသားညီညွတ်ရေးအစိုးရ (NUG) ရဲ့ လူ့အခွင့်အရေးဆိုင်ရာဝန်ကြီးဌာနက စက်တင်ဘာ ၄ ရက်မှာ ထုတ်ပြန်ထားပါတယ်။

လင်းအိမ်