စစ်ကိုင်းတိုင်း၊ ဘုတလင်မြို့နယ်မှာ စက်တင်ဘာ ၄ ရက်က စစ်သားတွေကပစ်ခတ်လို့ ကိုယ်ဝန်ဆောင်အမျိုးသမီး အပါအဝင် အမျိုးသမီး ၂ ယောက် သေဆုံးသွားပြီး ၁ နှစ်သားအရွယ် ကလေးငယ်အပါအဝင် ၃ ယောက်ထက်မနည်း ဒဏ်ရာရခဲ့ကြတယ်လို့ ကူညီဆောင်ရွက်ပေးနေသူတွေ ဆီကနေ သိရပါတယ်။
စစ်ဘေးရှောင်အရေးကူညီဆောင်ရွက်ပေးနေသူတယောက်က “ရှမ်းတဲကျေးရွာမှာ နာရေးလိုက်ပို့ပြီး ပြန်လာကြတဲ့ စစ်ဘေးရှောင်တွေကို စစ်သားတွေက ကားနဲ့လိုက်ပစ်လို့ သမီးယောင်းမ ၂ ယောက် ဆုံးသွားပါတယ်” လို့ ပြောပါတယ်။
သေဆုံးသွားကြသူတွေဟာ အသက် ၄၁ နှစ်အရွယ် မကြူမ နဲ့ အသက် ၃၀ ကျော်အရွယ် မအေးသီ တို့ဖြစ်ကြပြီး သူတို့မိသားစုဝင်တွေထဲက ကျည်ထိမှန်ပြီး လက်တဖက်ပြတ်သွားသူ အသက် ၁ နှစ်အရွယ် ကလေးငယ် အပါအဝင် ၃ ယောက်ထက်မနည်း ဒဏ်ရာရရှိခဲ့ကြသေးတယ်လို့လည်း ဆိုပါတယ်။
“သူတို့မိသားစုရဲ့ဖြစ်ရပ်က ရင်နင့်ဖွယ်ကောင်းပါတယ်ဗျာ။ သူတို့က စစ်ဘေးရှောင်နေကြရင်း ကြူမ ရဲ့ အမေဆုံးလို့ ရှမ်းတဲရွာကိုပြန်လာပြီး နာရေးကိစ္စဆောင်ရွက်ကြတာ။ သူတို့အမေကို သင်္ဂြိုလ်နေတဲ့အချိန် ရှမ်းတဲရွာထဲကို စစ်သားတွေက အိမ်စီးကားနဲ့ဝင်လာတဲ့အချိန်မှာ သူတို့လည်း ဈာပနလုပ်ရင်းတန်းလန်း ထွက်ပြေးကြရင်း လမ်းဘေးမှာရှိတဲ့ ရေအိုးစင်လေးရှိတဲ့ ဇရပ်မှာနားနေကြရင်း စစ်သားတွေက ကားနဲ့လိုက်လာပြီး ပစ်သွားတာ။ မကြူမနဲ့ မအေးသီ တို့ကတော့ နေရာမှာတင်ဆုံးသွားတယ်။ မအေးသီမှာက ကိုယ်ဝန် ၆ လလောက်ရှိတယ်လို့သိရတယ်။ အဲဒီစစ်သားတွေက ဘုတလင်မြို့ပေါ်ကပဲ။ သူတို့က ရှမ်းတဲရွာနဲ့ကပ်နေတဲ့ သပြေပင်ရွာမှာ တပ်စွဲနေကြတာ။ ဘုတလင်နဲ့ ရှမ်းတဲဆိုတာက နီးနီးလေးရယ်” လို့ ပြောပါတယ်။
အဲဒီစစ်သားတွေဟာ သူတို့တပ်စွဲနေတဲ့ သပြေပင်ကျေးရွာအပြင် နှောရင်းကျေးရွာနဲ့ အနီးအနားက ကျေးရွာတွေကိုဝင်ရောက်ပြီး ပြည်သူတွေကို ပေါ်တာဆွဲဖမ်းဆီးတာတွေအပြင် ပြည်သူတွေကို စိတ်မထင်ရင်မထင်သလို ပစ်ခတ်သတ်ဖြတ်နေကြတယ်လို့လည်း သူကဆက်ပြောပါတယ်။
ပြီးတော့ သြဂုတ် ၃၁ ရက်နေ့ကစလို့ ဘုတလင်မြို့နယ် အရှေ့တောင်ဘက်ကကျေးရွာတွေကို စစ်ကြောင်းထိုးဝင်ရောက်နေသလို လေကြောင်းကပါတိုက်ခိုက်နေတဲ့အတွက် ဒေသခံပြည်သူ ၂၅,၀၀၀ ဝန်းကျင်ဟာ နေရာစွန့်ခွာပြီး ဘေးလွတ်ရာနေရာတွေကို တိမ်းရှောင်ထွက်ပြေးနေကြရတယ်လို့လည်း ကူညီဆောင်ရွက်ပေးနေသူတွေဆီကနေ သိရပါတယ်။
