ထိုင်းမြောက်ပိုင်း ချင်းမိုင်မြို့မှာ မြန်မာနိုင်ငံသား ရှမ်းလူငယ် ၆ ယောက်က ထိုင်းတက္ကသိုလ် ကျောင်းသားလူငယ်တွေကို ဓားနဲ့လိုက်ခုတ်တာကြောင့် တယောက် ဒဏ်ရာရသွားတယ်လို့ CM108 ထိုင်းသတင်းမှာ ဖော်ပြပါတယ်။

ဩဂုတ် ၂၉ ရက် မနက် ၃ နာရီခွဲလောက်က ချင်းမိုင်မြို့  ချန့်မွဲ့ရပ်ကွက် ဈေးကြီးနားမှာ လူငယ်တယောက် ဓားခုတ်ခံရကြောင်း တိုင်ကြားချက်ရတဲ့အတွက် အခင်းဖြစ်တဲ့ နေရာကို သွားရောက်စစ်ဆေးပြီး ကျူးလွန်သူတွေကို လိုက်လံရှာဖွေဖမ်းဆီးခဲ့တယ်လို့  ချင်းမိုင် ဖူးထွဏ်းနယ်မြေရဲတပ်ဖွဲ့က သတင်းထောက်တွေကို ပြောပါတယ်။ 

ဓားခုတ်ခံရတဲ့ဘက်က တိုင်ကြားချက်အရ  သူတို့တွေဟာ တက္ကသိုလ်ကျောင်းသားတွေဖြစ်ကြောင်း၊ သူတို့ ၆ ယောက်ဟာ လူငယ်တို့သဘာဝ  နမ့်ပင်းမြစ် ကျန်းဆုံတံတားနားလမ်းလျှောက်နေတုန်း  ရွှေ့ပြောင်းအလုပ်သမားလူငယ် ၆ ယောက်‌ ဈေးကြီးဘက်ကနေ ရောက်လာပြီး ရန်ပြုကာ ဓားနဲ့လိုက်ခုတ်တယ်လို့  ဆိုပါတယ်။

သူတို့အနေနဲ့ အဆိုပါရွှေ့ပြောင်းလူငယ်တွေနဲ့ ရန်ငြိုးရန်စမရှိ၊ အသိအကျွမ်းလည်းမဟုတ်ကြောင်း သက်သက် ရန်စခံရပြီး ဓားနဲ့လိုက်ခုတ်လို့ ထွက်ပြေးရတယ်၊ ဒါပေမဲ့ အသက် ၁၉ နှစ်ရွယ် နိုင်းဆုသိထဘန်းကတော့ ကိုယ်ခန္ဓာမှာ ဓားခုတ်ရှရာရသွားတယ်လို့  ဆိုပါတယ်။ 

တာဝန်ရှိသူတွေက မျက်မြင်သက်သေတွေကို မေးမြန်းပြီး စီစီကင်မရာကနေတဆင့်လည်း ထွက်ပြေးသွားတဲ့ လူငယ်တွေနောက် လိုက်လံဖမ်းဆီးရာမှာ နေ့မကူးခင်မှာဘဲ ၅ ယောက်ကို သူတို့ကျူးလွန်စဉ် အသုံးပြုခဲ့တဲ့ ဟွန်ဒါဆိုင်ကယ် ၂ စီး၊ အရှည် ၁ ပေကျော်ရှိ ဓားတလက်၊ စီစီကင်မရာထဲ ဝတ်ထားတဲ့ အဝတ်အစား စတဲ့ သက်သေခံပစ္စည်းတွေနဲ့အတူ ဖမ်းမိတယ်တယ်လို့ ချင်းမိုင် ဖူးထွဏ်းနယ်မြေရဲတပ်ဖွဲ့က ပြောပါတယ်။

အဆိုပါလူငယ် ၅ ယောက်မှာ အောင်ငင်း (၂၀ နှစ်)၊ စိုင်းမန်ခေး (၁၉ နှစ်)၊ စိုင်းထို့ (၁၉ နှစ်)၊ စိုင်းဟန် (၂၀ နှစ်)၊ ကျိန်းစန် (၁၉ နှစ်) တို့ဖြစ်ပြီး အကြီးဆုံးဖြစ်တဲ့ စိုင်းကျွမ်မိုင် ခေါ် ဒမ်  (၂၂ နှစ်) ကတော့ ထွက်ပြေးလွတ်မြောက်နေတယ်၊ သူတို့ ၆ ယောက်လုံးဟာ မြန်မာပြည်က ရှမ်းလူငယ်တွေလို့  ဆိုပါတယ်။

ဖမ်းမိတဲ့ လူငယ် ၅ ယောက်ဟာ ပြစ်မှုကျူးလွန်ကြောင်း ဝန်ခံထားတယ်၊ သူတို့လည်း အဲဒီထိုင်း လူငယ်တွေနဲ့ မသိဘူး၊ သူတို့ကို ရန်ပြုမယ်ထင်လို့ လုပ်ရတာ၊ သူတို့လည်း အဲဒီညက အရက်မူးပြီး သွေးကြွနေတာကြောင့် အဲလိုလုပ်ရတာလို့ ဆိုပါတယ်။

တာဝန်ရှိသူတွေက သူတို့ ၅ ယောက်ကို တပါးသူထိခိုက်ဒဏ်ရာရအောင် အုပ်စုဖွဲ့အကြမ်းဖက်မှု၊ အများ ဆိုင်ရာနေရာမှာ ခွင့်ပြုချက်မရဘဲ လက်နက် (ဓား) ကိုင်ဆောင်မှုတွေနဲ့ အမှုဖွင့် အရေးယူထားတယ်၊ ထွက်ပြေးလွတ်မြောက်နေတဲ့ နောက်တယောက်ကိုလည်း ဖမ်းဆီးရမိဖို့ ဆက် လက်စုံ စမ်းနေတယ်လို့   ဖူးထွဏ်းနယ်မြေ ရဲတပ်ဖွဲ့တာဝန်ရှိသူက ပြောသွားပါတယ်။ 

Source : CM 108 News