ဧရာဝတီတိုင်း၊ ကျုံပျော်မြို့နယ်မှာ စစ်ကောင်စီခန့် ရပ်ကျေး အုပ်ချုပ်ရေးမှူး သေနတ်နဲ့ ပစ်သတ်ခံရတဲ့ဖြစ်စဉ်နဲ့ စွပ်စွဲဖမ်းဆီးခံခဲ့ရတဲ့ လူငယ် ၄ ယောက်ဟာ အဓမ္မစစ်မှုထမ်းနေရတယ်လို့ သိရပါတယ်။
ပြီးခဲ့တဲ့ဧပြီ ၁၁ ရက်က ကျုံပျော်မြို့နယ်က စစ်ကောင်စီခန့် ညောင်ပင်ကွင်းကျေးရွာအုပ်စု အုပ်ချုပ်ရေးမှူး ဦးလှကြိုင် သေနတ်နဲ့ပစ်ခတ်ခံရတာမှာ စွပ်စွဲပြီးဖမ်းဆီးခံခဲ့ရတဲ့ ဒေသခံ လူငယ် ၄ ယောက်ဟာ မိသားစုနဲ့အဆက်အသွယ်ပြတ်နေပြီး အခု သြဂုတ် ၂၈ ရက်ကမှ စစ်မှုထမ်းနေရတယ် ဆိုတာ သိရတယ်လို့ ဆိုပါတယ်။
ဖြစ်စဉ်ကို သိရှိတဲ့သူတယောက်က “အုပ်ချုပ်ရေးမှူး ပစ်သတ်ခံရတဲ့ဖြစ်စဉ်နဲ့ပတ်သက်ပြီး အဖမ်းခံရတဲ့သူတွေက အရပ်သားတွေပါ။ စ ဖမ်းကတည်းက အရပ်သားဆိုတာ သိသိနဲ့ ဖမ်းခဲ့တာ။ အဖမ်းခံရပြီး ၂ လလောက်အထိ အဆက်အသွယ်ရသေးတယ်။ နောကိပိုင်း မရတော့တာ။ အရေးယူထားတယ်ပဲထင်တာ။ အခုလ ၂၈ ရက်ကမှ စစ်မှုထမ်းထဲရောက်နေတယ်လို့သိရတာ” လို့ ပြောပါတယ်။
စစ်ကောင်စီခန့် ညောင်ပင်ကွင်းကျေးရွာ အုပ်ချုပ်ရေးမှူး လှကြိုင် ပစ်သတ်ခံရတဲ့ဖြစ်စဉ်နဲ့ ဆက်စပ်တယ်ဆိုပြီး စစ်မှုထမ်းထဲ အထည့်ခံရတဲ့လူငယ် ၄ ယောက် အပါအဝင် အရပ်သား ၇ ယောက် အဖမ်းခံရတာဖြစ်ပြီး ၃ ယောက်ကိုတော့ စစ်ကောင်စီတပ်က တယောက်ကျပ်သိန်း ၃၀ ယူပြီး ပြန်လွှတ်ပေးခဲ့တာလို့ သိရပါတယ်။
အကျိုးဆောင် ရှေ့နေတယောက်က “ပြစ်မှုကျူးလွန်တယ်ဆိုရင်တောင် ဥပဒေနဲ့အညီ အရေးယူရမှာ။ အခုလိုလုပ်တာက များတယ်။ မိသားစုတွေက အကျဉ်းထောင်၊ အချုပ်ထောင် ထဲမှာပဲ ရှိနေတယ်ထင်တာ။ အရပ်သားတွေကို အကြောင်းအမျိုးမျိုးနဲ့ ဖမ်းဆီးပြီး စစ်ထဲထည့်နေတာက စစ်ကောင်စီတပ်ရဲ့ လက်သစ်နည်းလမ်းတခုပဲ” လို့ ပြောပါတယ်။
ညောင်ပင်ကွင်းကျေးရွာ အုပ်ချုပ်ရေးမှူး လှကြိုင်ဟာ အခုနှစ် ဧပြီ ၁၀ ရက်နေ့က စစ်မှုထမ်းကိစ္စ အစည်းအဝေးလုပ်ပြီး ပြန်လာချိန် သေနတ်နဲ့ပစ်သတ်ခံရပြီး ကျုံပျော်မြို့နယ်ကနေ ရန်ကုန်ဆေးရုံကြီးကို ပို့နေတုန်း လမ်းမှာ သေဆုံးခဲ့ပါတယ်။
ဘယ်အဖွဲ့က သေနတ်နဲ့ပစ်သတ်တယ် ဆိုတာကို သြဂုတ် ၃၀ ရက်အထိ စစ်တပ်နဲ့ရဲက မဖော်ထုတ်နိုင်ဘဲ မဆိုင်တဲ့ အရပ်သားတွေကိုပဲ ဓားစာခံအဖြစ် ဖမ်းဆီးနေခဲ့တာလို့ ဒေသခံတွေဆီက သိရပါတယ်။
