ပီရူးနိုင်ငံ အနောက်ပိုင်း ပစိဖိတ်သမုဒ္ဒရာနဲ့ ထိစပ်နေတဲ့ ကမ်းခြေဒေသမှာ ပြင်းထန်တဲ့ လှိုင်းလုံးတွေ ရိုက်ခတ်ခဲ့ပြီး လူတယောက် သေဆုံးကာ ကမ်းရိုးတန်းအခြေခံအဆောက်အအုံတွေလည်း ပျက်စီးဆုံးရှုံးခဲ့လို့ ဩဂုတ် ၂၅ ရက်မှာ ကမ်းရိုးတန်းရှိ ဆိပ်ကမ်း ၁၀၀ ကျော်ကို ပိတ်ချခဲ့ကြောင်း အာဏာပိုင်တွေက ထုတ်ပြန်ပါတယ်။
ပီရူးအမျိုးသား မိုးလေဝသနဲ့ ဇလဗေဒဝန်ဆောင်မှုဌာန (SENAMHI) ကတော့ အဲဒီဖြစ်စဉ်ကို တောင်ပစိဖိတ်ရဲ့ ပြောင်းပြန် ဆိုက်ကလုန်းလို့ သတ်မှတ်ခဲ့ပါတယ်။
SENAMHI မှ မိုးလေဝသ အထူးကျွမ်းကျင်သူ ရိုဆာရီယိုဟူလ်ကာက “ဒီလေတိုက်နှုန်း တိုးလာတာက အဓိကအားဖြင့် တောင်ပစိဖိတ် ဆန့်ကျင်ဘက် ဆိုင်ကလုန်းရဲ့ အရှိန်ပြင်းထန်မှု သို့မဟုတ် ချဉ်းကပ်မှုကြောင့် ဖြစ်ပါတယ်။ ဒါက ကမ်းရိုးတန်းဒေသမှာ လေတိုက်နှုန်း တိုးလာစေတဲ့ (နာရီလက်တံပြောင်းပြန်အတိုင်း) လှည့်ပတ်တဲ့ ဖိအားမြင့်စနစ်ဖြစ်ပြီး ပင်လယ်ပြင်မှာရော တိုက်ကြီးမှာပါ လေတိုက်နှုန်းက တိုးလာနေတယ်”လို့ ပြောပါတယ်။
လမ်ဘာယက်ကေပြည်နယ်ရှိ ဆန်ဟိုဆေးခရိုင်ကမ်းလွန်မှာ သင်္ဘောတွေကို ကာကွယ်ဖို့ တာဝန်တွေ ထမ်းဆောင်ရင်း ဒုတိယ နည်းပညာရှင် ရောဘတ်တို ကားလော့စ် တယ်ယိုဘန့်ဆစ်စ်ဟာ သြဂုတ် ၂၄ ရက်က သေဆုံးသွားကြောင်း ပီရူးရေတပ်ရဲ့ ထုတ်ပြန်ချက်မှာ ဖော်ပြပါတယ်။
အာဏာပိုင်တွေက ပြည်သူတွေကို ကမ်းရိုးတန်းဒေသတွေနဲ့ ရေအောက်လှုပ်ရှားမှုတွေကို ရှောင်ရှားကြဖို့ တိုက်တွန်းထားတာကြောင့် ရေလုပ်သားတွေဟာ စီးပွားရေးဆုံးရှုံးမှုနဲ့ပတ်သက်ပြီး စိုးရိမ်ပူပန်မှုတွေ ဖြစ်ပေါ်ရပြီးတော့ သူတို့ရဲ့အသက်မွေးဝမ်းကျောင်းလုပ်ငန်းတွေကို ပြန်လည်စတင်ဖို့ ပိုမိုကောင်းမွန်တဲ့ ရေကြောင်းအခြေအနေတွေကို စောင့်မျှော်နေပါတယ်။
ဂရီဂိုရီယို ကားဒနာ့စ် က “ပင်လယ်ရေလှိုင်းတွေအတွင်း ဖြစ်ပေါ်တဲ့ ပုံမှန်မဟုတ်တဲ့ လှိုင်းလုံးကြီးတွေ အတော်များများကို ခံစားနေရပါတယ်။ ငါးတွေက ပုံမှန်အတိုင်း မတက်နိုင်လို့၊ တခါတလေမှာ အလုပ်လုပ်လို့ရတဲ့အချိန်ထိ ရေငြိမ်ဖို့ စောင့်ရပါတယ်”လို့ ပြောပါတယ်။
ဒီအခြေအနေတွေဟာ သြဂုတ် ၂၇ ရက်အထိ ဆက်ရှိနေနိုင်ကြောင်း ပီရူးရေတပ်က သတိပေးထားပါတယ်။
Source: Reuters
