ရေကြီးနေဆဲဖြစ်တဲ့ ရှမ်းပြည်နယ်တောင်ပိုင်း၊ ညောင်ရွှေမြို့နယ်၊ အင်းလေးကန်ထဲမှာ စက်လှေကို အမြန်မောင်းတာကြောင့် ရေမြုပ်နေတဲ့ အိမ်ရှင်တယောက်က လေးခွနဲ့ပစ်လို့ စက်လှေမောင်းသူတယောက် မျက်လုံးထိပြီး ပျက်စီးဆုံးရှုံးသွားရပါတယ်။

သြဂုတ် ၂၁ ရက် မနက်ပိုင်းမှာ ရေတက်နေတဲ့ နေအိမ်တွေနားမှာ စက်လှေအမြန်မောင်းတာကြောင့် ရေနစ်မြုပ်ခံထားရတဲ့ အိမ်ရှင်တယောက်က လေးခွနဲ့ထပစ်ချိန် စက်လှေအမြန်မောင်းသူကို မထိဘဲ စက်လှေနှေးနှေးမောင်းတဲ့ အသက် ၅၀ အရွယ် ဦးအောင်မြရဲ့ မျက်လုံးကို ထိမှန်ခဲ့တာကြောင့် မျက်လုံးပျက်စီးခဲ့ရတယ်လို့ သိရပါတယ်။

ဒေသခံတယောက်က “အိမ်တွေက အောက်ထပ်တွေ သွပ်တွေနဲ့ကာထားတာရော၊ အိမ်တွေက ငလျင်ဒဏ်ကြောင့်တကြောင်း၊ မနှစ်က ရေဘေးဖြစ်တော့တကြောင်း၊ မခိုင်ခံ့တော့ဘူးလေ။ စက်လှေပြင်းပြင်းမောင်းရင် အိမ်က ကာထားတဲ့အကာတွေက မခံနိုင်ဘူးလေ။ ပြီးတော့အိမ်ကလည်း ဆောင့်တွန်းသလို ဖြစ်တယ်ရော။ အဲဒါကြောင့် ပိုဆိုးတာ အခြေအနေက။ အဲဒီလိုတွေကြောင့် အခုလိုထိ ဖြစ်ကုန်တာ။ တထပ်တည်းအိမ်ဆိုရင် ပိုဆိုးတယ်” လို့ ပြောပါတယ်။

မျက်လုံးထိခိုက်ပျက်စီးခဲ့ရသူဟာ မနောဖြူပရဟိတအဖွဲ့မှာ စက်လှေမောင်းနေတဲ့ သဘောကောင်းပြီး နေ့ည နေပူမိုးရွာမရှောင် လူတွေကို ကူညီဖေးမတတ်သူ ဦးအောင်မြ ဖြစ်တယ်လို့ သိရပါတယ်။

လောက်စာလုံးမှန်လို့ ကွဲသွားတဲ့မျက်လုံးကို ထုတ်ပစ်ရတာကြောင့် အမြင်အာရုံ ပျက်စီးသွားရပြီး အခုလက်ရှိမှာတော့ တောင်ကြီး၊ စဝ်စံထွန်းဆေးရုံမှာ ကုသမှုခံယူနေတယ်လို့ သိရပါတယ်။

လေးခွနဲ့ပစ်တဲ့သူဟာ ဘယ်သူဘယ်ဝါ ဖြစ်တယ်ဆိုတာကို မသိရသေးပေမဲ့ သိရင်လည်း အမှုမလုပ်ဘူးလို့ ပစ်ခံရသူနဲ့ နီးစပ်သူတွေဆီက သိရပါတယ်။

မျက်လုံးထိခိုက်မိသူနဲ့ နီးစပ်သူက “(ပစ်တဲ့သူကို)သိလည်း အမှုမလုပ်တော့ဘူး ပြောတယ်။ ဖြစ်ကံပါလို့ ဖြစ်တယ်တဲ့။ အပစ်ခံရသူက သဘောထားကြီးတယ်။ စိတ်ရင်းကောင်းတယ်ဗျာ” လို့ ပြောပါတယ်။

အခုလက်ရှိမှာလည်း အင်းထဲမှာ ရေကမကျသေးတာကြောင့် ချောင်းနဲ့နီးတဲ့ရွာတွေမှာ စက်လှေမောင်းရင် ဖြည်းဖြည်းမောင်းကြဖို့ တိုက်တွန်းထားတယ်လို့ သိရပါတယ်။

ရေမြုပ်နေတဲ့နေအိမ်က အမျိုးသမီးတယောက်က “စက်လှေမောင်းသူတွေက ကိုယ်ချင်းစာစိတ် မရှိကြဘူး။ အင်းတိန်အောက်ဝိုင်းမှာလည်း အသကုန်မောင်းကြတယ်။ အိမ်က ရေမြုပ်နေတာ သွပ်တွေ အကုန်ပြတ်ထွက်ကုန်တယ်။ ကိုယ်ချင်းစာစိတ်မရှိဘူး၊ အရမ်းပြင်းအောင် မောင်းကြတယ်” လို့ ပြောပါတယ်။

ပြီးခဲ့တဲ့နှစ်ကလည်း လနဲ့ချီရေကြီးခဲ့တဲ့ အင်းလေးမှာ အခုတော့ ရေ ၁ ပေလောက် ကျသွားတယ်လို့ သိရပြီး ပုံမှန်ထက်တော့ မြင့်တက်နေတုန်းပဲလို့ ဒေသခံတွေက ပြောပါတယ်။

ရေကြီးတဲ့ဒဏ်နဲ့ ငလျင်ဒဏ်ကို ခံခဲ့ရတဲ့ အင်းလေးဒေသမှာ ပြန်လည်ထူထောင်ရေးလုပ်လို့ မပြီးသေးပေမဲ့ စစ်ကောင်စီကတော့ ဖောင်တော်ဦးဘုရား ဒေသစာရီကြွချီပူဇော်ခံပွဲကို စက်တင်ဘာ ၂၂ ရက်ကနေ အောက်တိုဘာ ၉ ရက်နေ့အထိ ၁၈ ရက်ကြာ ပြုလုပ်သွားဖို့ရှိတယ်လို့ သိရပါတယ်။