ရန်ကုန်၊ မြောက်ဥက္ကလာပမြို့နယ်၊ ခရပ်ကွက်၊ မြရတနာ ၃ လမ်းရှိ ဒေါ်စိန်ကုန်စုံဆိုင်မှာ သိန်း ၆၀၀ ကျော် တန်ဖိုးရှိ ရွှေထည်တွေ ခိုးယူခံခဲ့ရပေမဲ့ ၄ ရက်ကြာတဲ့အထိ မြောက်ဥက္ကလာ ရဲတပ်ဖွဲ့ဝင်တွေက တရားခံတွေကို ဖမ်းဆီးနိုင်ခြင်း မရှိသေးဘူးလို့ မြို့ခံတွေက ပြောပါတယ်။
ဩဂုတ် ၇ ရက်၊ မနက် ၇ နာရီခွဲလောက်က ဆိုင်ကယ်စီးအမျိုးသား ၂ ယောက်က ဆိုင်ရှင် အမျိုးသမီးကြီးတယောက်တည်း ရှိနေချိန်မှာ ဈေးဝယ်ဟန်ဆောင်ပြီး ရွှေထည်ပစ္စည်းအစုံ ၈ ကျပ်သားကျော် ပါဝင်တဲ့ လက်ကိုင်အိတ်ကို ခိုးယူထွက်ပြေးသွားတာ ဖြစ်ပါတယ်။
ရဲတပ်ဖွဲ့နဲ့ နီးစပ်သူတယောက်က “ရွှေလက်ကောက် ၃ ကွင်း၊ ရွှေတုံး ၁ ခဲ၊ ဆွဲကြိုးနဲ့ နားကပ်တွေ ပါတယ်။ အားလုံး ၈ ကျပ်သား ကျော်မယ်။ သုနန္ဒာလမ်းမ၊ အထက ၁ နားမှာ မှတ်ပုံတင် ၁ ခု ပြန်တွေ့တယ်။ သူခိုး ၂ ယောက်မှာ တယောက်က အသက် ၃၀ အရွယ်၊ တယောက်က အသက်နည်းနည်းကြီးမယ်၊ ကျန်တာတော့ အသေးစိတ်စစ်ဆေးနေဆဲပါ။ ဒီမနက်အထိ ဖမ်းဆီးရမိခြင်း မရှိသေးပါဘူး”လို့ ဆိုပါတယ်။
ခိုးယူခံရတဲ့ အဆိုပါ ဈေးဆိုင်ဘေးမှာ ရပ်ကွက်အုပ်ချုပ်ရေးမှူးရုံး ကပ်လျက်ရှိနေသလို ကားမောင်း ၁ မိနစ် အကွာအဝေးမှာလည်း စစ်ကောင်စီရဲ့ မြို့နယ်ရဲတပ်ဖွဲ့မှူးရုံး ရှိနေပါတယ်။
မျက်မြင်တွေရဲ့ ပြောပြချက်အရ ရွှေထည်ခိုးယူသွားသူတွေဟာ ရဲစခန်းအရှေ့ကနေ ဆိုင်ကယ်ဖြတ်မောင်းသွားတာ ဖြစ်ပါတယ်။
ခိုးယူခံရချိန်မှာလည်း လျှပ်စစ်မီး ပြတ်တောက်နေတာကြောင့် ဈေးဆိုင်နဲ့ ရဲစခန်းတို့ စီစီတီဗွီတွေမှာ သူခိုးတွေရဲ့ မှတ်တမ်းမရရှိဘူးလို့ သိရပါတယ်။
