ရှမ်းပြည်နယ်မြောက်ပိုင်းက ကိုးကန့်တပ် MNDAA ထိန်းချုပ်ထားတဲ့ တရုတ် - မြန်မာနယ်စပ်၊ မုံးကိုး လဝက ရုံးဟောင်းမှာ ဩဂုတ် ၁၀ ရက်နေ့ မနက်အစောပိုင်းကစလို့ မြန်မာအလံ ပြန်လည်လွှင့်ထူထားတာတွေ့ရတယ်လို့ ဒေသခံတွေဆီက သိရပါတယ်။

ဒေသခံ အမျိုးသားတယောက်က “မုံးကိုးက အရင်စစ်တပ်ရှိတုန်းက လဝကရုံးဟောင်းမှာ ဒီနေ့ ဩဂုတ်လ ၈ ရက်နေ့ မနက် အစ မြန်မာအလံ ပြန်လွှင့်ထားပြီ” လို့ ပြောပါတယ်။

MNDAA ဘက်က သက်ဆိုင်ရာတာဝန်ရှိတွေကို မေးကြည့်တော့ MNDAA တပ်စခန်းကလွဲလို့ တခြား အရပ်သားပြည်သူတွေနဲ့ သက်ဆိုင်တဲ့နေရာတွေမှာ ရှမ်းပြည်နယ် အထူးဒေသ ၁ အလံနဲ့ မြန်မာအလံ လွှင့်ထူဖို့ ရှိတယ်လို့ပြောကြောင်း သူကဆက် ပြောပါတယ်။

ပန်ဆိုင်း (ကြူကုတ်) ဒေသခံတယောက်က “ပန်ဆိုင်း (ကြူကုတ်) ဘက်က အရပ်ဘက်ဆိုင်ရာ ရုံးတွေမှာတော့ ဘာအလံမှ လွှင့်ထူထားတာ မရှိဘူး။ အပြောင်ပဲ ရှိသေးတယ်” လို့ ပြောပါတယ်။

ပန်ဆိုင်း (ကြူကုတ်) နဲ့ ဝမ်တိန် တရုတ်နယ်စပ်ဂိတ်မှာတော့ ပြီးခဲ့တဲ့ ဧပြီ ၂၉ ရက်နေ့ကတည်းက မြန်မာအလံ ပြောင်းလဲလွှင့်ထူထားတာတွေ့ရတယ်လို့ သူက ပြောပါတယ်။

မုံးကိုးနဲ့ ပန်ဆိုင်း (ကြူကုတ်) နယ်စပ်ဂိတ်ကနေ တရုတ်ဘက်က ကုန်စည်တွေ ပုံမှန် စီးဆင်းနေပြီဖြစ်ပြီး ဒေသခံတွေအနေနဲ့ တရုတ်ဘက်ခြမ်းသွားလာမယ်ဆိုရင် MNDAA က ထုတ်ပေးတဲ့ အိမ်ထောင်စုစာအုပ်နဲ့ အထူးဒေသ ၁ မှတ်ပုံတင်ကတ်ပြားရှိသူတွေပဲ တရုတ်နယ်စပ်ဂိတ်မှာ နယ်စပ်ဖြတ်ကျော်ခွင့်စာအုပ် သွားရောက်လပေ်လို့ရတယ်လို့ ဒေသခံတွေဆီက သိရပါတယ်။