မွန်ပြည်နယ်မှာ တာဝန်ကျနေတဲ့ စစ်ကောင်စီတပ်သား ၂ ယောက်ဟာ ဇူလိုင် ၂၂ ရက်က ရာမညမွန်တပ်တော် NMSP-AD (Ramonnya Mon Army) ထံ လာရောက်အလင်းဝင်ရောက်ခဲ့တယ်လို့ သိရပါတယ်။
ရာမညမွန်တပ်တော် (RMA) ထံ အလင်းဝင်ရောက်လာတဲ့ စစ်ကောင်စီတပ်သား ၂ ယောက်မှာ ပြီးခဲ့တဲ့ ၂၀၂၄ ခုနှစ်အတွင်းက စစ်မှုထမ်းစုဆောင်းခံရပြီး တနင်္သာရီတိုင်း၊ ဘုတ်ပြင်းမြို့နယ် ခမရ ၄၃၂ တပ်ရင်းမှာ တာဝန်ထမ်းဆောင်ပြီးနောက် မွန်ပြည်နယ်မှာ ဆက်လက် တာဝန်ထမ်းဆောင်ရာက အခုလို လက်နက်နဲ့ အလင်းဝင်ရောက်ခဲ့တာလို့ RMA တာဝန်ရှိသူတယောက်က ပြောပါတယ်။
“သူတို့ ၂ ယောက်က လက်နက်ရှည် ၂ လက်နဲ့ တခြားစစ်အသုံးအဆောင်ပစ္စည်းတွေ ယူဆောင်လာပြီး ကျနော်တို့ဆီ အလင်းဝင်ရောက်လာတာပါ။ ကျန်တာက သူတို့ ၂ ယောက်ရဲ့ သဘောဆန္ဒအတိုင်း ဆက်လက်ဆောင်ရွက်ပေးသွားမှာပါ။”
ဒါ့အပြင် လက်နက်နဲ့ အလင်းဝင်ရောက်လာတဲ့ စစ်ကောင်စီတပ်သား ၂ ယောက်ကို ရာမညမွန်တပ်တော် NMSP-AD (Ramonnya Mon Army) တပ်ရင်း ၉၀၂ က တယောက်ကို ကျပ်ငွေ ၂၅ သိန်းစီ ထောက်ပံ့ပေးအပ်ခဲ့ကြောင်း သိရပါတယ်။
မွန်ပြည်နယ်ထဲက စစ်ကောင်စီလက်အောက်ခံအဖွဲ့တွေရဲ့ အတင်းအဓမ္မ စစ်မှုထမ်း စုဆောင်းခံရပြီး စစ်မြေပြင်အသီးသီးမှာ တာဝန်ကျနေတဲ့ စစ်မှုထမ်းတွေအနေနဲ့ ပြည်နယ်တွင်းရှိ နီးစပ်ရာ တော်လှန်ရေးတပ်ဖွဲ့တွေထံ လာရောက်ခိုလှုံ အလင်းဝင်နိုင်ကြောင်း တော်လှန်ရေးအဖွဲ့တွေက ထုတ်ပြန်ထားပါတယ်။
