အဲဗာတန်အသင်းဟာ မန်စီးတီးမှာ အဆင်မပြေဖြစ်နေတဲ့ တောင်ပံကစားသမား ဂျက်ဂရေးလစ်ရှ်ကို ခေါ်ယူဖို့ ကြိုးပမ်းနေပါတယ်။

အင်္ဂလန်ကစားသမားဟာ နည်းပြ ပတ်ဂွါဒီယိုလာရဲ့ အနာဂတ်အစီအစဉ်မှာ ပါဝင်ခြင်းမရှိတော့သူ ဖြစ်ပြီး ကလပ်ကမ္ဘာ့ဖလားပြိုင်ပွဲ ကစားခဲ့တဲ့ ၂၇ ယောက် လူစာရင်းကနေလည်း ချန်လှပ်ခံခဲ့ရသူပါ။

အသင်းသစ်ရှာဖွေနေတဲ့ ဂရေးလစ်ရှ်ကို အဲဗာတန်အသင်းက အငှားစာချုပ်နဲ့ ခေါ်ယူလိုနေပြီး လုပ်ခလစာ အပါအဝင် တခြား အသေးစိတ်အချက်တွေကို မန်စီးတီးအသင်းနဲ့ ဆွေးနွေးသွားဖို့ ရှိပါတယ်။

ဂရေးလစ်ရှ်ဟာ တပတ်လုပ်ခ ပေါင် ၃ သိန်းနဲ့ ၂ နှစ်စာချုပ်သက်တမ်း ကျန်ရှိနေသူပါ။ ၂၀၂၁ ခုနှစ်က ဗီလာကနေ ပေါင်သန်း ၁၀၀ နဲ့ ပြောင်းရွှေ့လာသူ ဂရေးလစ်ရှ်ဟာ မန်စီးတီးနဲ့ ၄ နှစ်တာ ကာလအတွင်းမှာ ၁၅၇ ပွဲ ကစားခဲ့ပြီး ၁၇ ဂိုးသွင်း၊ ၂၃ ကြိမ် ဂိုးဖန်တီးခဲ့ပါတယ်။