မွန်ပြည်နယ်၊ သထုံမြို့နယ်၊ သုဝဏ္ဏဝတီမြို့၊ ကျိုက်ကော်ဈေးရှေ့ ကားလမ်းပေါ်မှာ ဇူလိုင် ၂၇ ရက် ဒီနေ့မနက်ပိုင်းက ရေလျှံတက်နေတာကြောင့် အဝေးပြေးမော်တော်ယာဉ်တွေ ဖြတ်သန်းသွားလာတာကို ယာယီပိတ်ခဲ့ရတယ်လို့ ဒေသခံတွေဆီက သိရပါတယ်။
ဒီမနက်အစောပိုင်းက မွန်ပြည်နယ်အတွင်း မိုးသည်းသည်းထန်ထန် ရွာတာကြောင့် ကျိုက်ကော်ရပ်ကွက်က ဘုရားကြီးလမ်းနဲ့ မြို့မဈေးရှေ့ ရန်ကုန်-မော်လမြိုင်သွားကားလမ်းပေါ် ရေကျော်တက်လာတာလို့ ဒေသခံတယောက်က ပြောပါတယ်။
“လောလောဆယ်တော့ ဖြတ်ခွင့်မပေးသေးဘူး။ ကားကြီးတွေလည်း လမ်းတောက်လျှောက် ပိတ်နေတယ်။ မနေ့ညကတည်းက မိုးက တညလုံးရွာထားပြီး တောင်ကျရေနဲ့ဆိုတော့ ကားလမ်းရေကျော်တက်တာပါ။ ခရီးသွားကားတွေလည်း လမ်းအခြေအနေတွေကို စုံစမ်းပြီးမှ သွားလာစေချင်တယ်”
လက်ရှိမှာ ကျိုက်ကော် စျေးရှေ့ကားလမ်းကို ရေအမြင့် ၂ ပေလောက် ကျော်တက်နေကြောင့် စျေးအတွင်းက ဟင်းသီးဟင်းရွက်၊ အသားငါးဈေးကိုလည်း ဆက်သွယ်ရေးလမ်းဆုံမှာ ရွှေ့ပြောင်းရောင်းချနေကြပါတယ်။
ကားလမ်းရေကျော်ရာ နေရာကို မြို့နယ်မီးသတ်တပ်ဖွဲ့ဝင်တွေ၊ ဒေသခံတွေနဲ့ လူမှုကူညီရေးအဖွဲ့တွေက ရှင်းလင်းတာတွေလုပ်ခဲ့ပြီး မနက် ၁၀ နာရီခွဲအချိန်ကစလို့ မော်တော်ယာဉ်ကြီးတွေကို အကန့်အသတ်နဲ့ ဖြတ်သန်းခွင့်ပြုလိုက်တယ်လို့ ဒေသခံတယောက်က DVB ကိုပြောပါတယ်။
မိုးလေဝသနဲ့ဇလဗေဒ ညွှန်ကြားမှုဦးစီးဌာနရဲ့ ဇူလိုင် ၂၇ ရက် မနက် ၇ နာရီခွဲအချိန် တိုင်းထွာချက်တွေအရ မွန်ပြည်နယ်အတွင်း မိုးထစ်ချုန်းရွာပြီး၊ နေရာကွက်မိုးကြီးနိုင်တယ်လို့ ထုတ်ပြန်ထားပါတယ်။
သထုံခရိုင်၊ ပေါင်မြို့နယ် အလှပ်ကျေးရွာမှာလည်း ဒီကနေ့ ဇူလိုင် ၂၇ ရက် မနက် ၄ နာရီကျော်လောက်က လေဆင်နှာမောင်း ဝင်ရောက်တိုက်ခတ်ခဲ့တာကြောင့် ကျေးရွာမီးသတ်စခန်း အပါအဝင် လူနေအိမ် ၂၂ လုံးနဲ့ Mytel တာဝါတိုင်တခု ပျက်စီးခဲ့သေးတယ်လို့ ဒေသခံတွေဆီက သိရပါတယ်။
