စစ်ကိုင်းတိုင်း၊ ချောင်းဦးမြို့မှာ ဆိုင်ကယ်စီးလာတဲ့ စစ်ကောင်စီတပ်ဖွဲ့ဝင်တွေကို တိုက်ခိုက်ခဲ့လို့ စစ်ကောင်စီတပ်ဖွဲ့ဝင် ၄ ယောက် သေဆုံးပြီး ဆိုင်ကယ်နဲ့ လက်နက်ခဲယမ်းတွေ သိမ်းဆည်းရရှိခဲ့သလို စစ်တပ်စစ်ကြောင်းက ပစ်ခတ်လို့ ပြည်သူ ၁ ယောက် သေဆုံးခဲ့တယ်လို့ Brave Heart Army (BHA Local PDF) က ဇူလိုင် ၂၄ ရက်နေ့ညပိုင်းမှာ သတင်းထုတ်ပြန်လာပါတယ်။
BHA ရဲ့ ပြန်ကြားရေးတာဝန်ရှိသူက “ချောင်းဦးမြို့ပေါ် မုံရွာ-မန္တလေးလမ်းမကြီးပေါ်က ဆည်မြောင်းရုံးနားမှာ ပစ်ခတ်ခဲ့တာပါ။ သူတို့ဘက်က ဆိုင်ကယ် ၁ စီးကို ၂ ယောက်စီးပြီးတော့ ဆိုင်ကယ် ၂ စီးနဲ့လူ ၄ ယောက်က လက်နက်တွေနဲ့ မုံရွာ-မန္တလေး လမ်းမကြီးပေါ်မှာ ဂျူတီချိန်းကင်းပုန်းဝပ်ဖို့ထွက်လာကြတာကို စောင့်ပြီးပစ်ခဲ့တာပါ” လို့ ပြောပါတယ်။
ဇူလိုင် ၂၃ ရက်နေ့ မနက် ၅ နာရီခွဲဝန်းကျင်မှာ Brave Heart Army (BHA Local PDF) နဲ့အတူ ချောင်းဦးမြို့နယ် ပကဖ တိုက်နယ် ၁ တိုက်ခိုက်ရေးတပ်စိပ်တို့ ပူးပေါင်း တိုက်ခိုက်ခဲ့ကြတာလို့ ဆိုပါတယ်။
BHA အဖွဲ့တာဝန်ခံ ကိုဖိုးသားကြီး က “သူတို့ဘက်က ဘာမှပြန်ပစ်ချိန်မရလိုက်ဘူး။ ဆိုင်ကယ်တွေ မှောက်ကုန်ပြီး ၄ ယောက်လုံးသေတယ်။ သူတို့ဆီက ပစ္စည်းပစ္စယတွေ သိမ်းပြီး တန်းပြန်ဆုတ်လာကြတာ။ အထိအခိုက်မရှိခဲ့ဘူး။ တိုက်ခိုက်မှုအတွင်းကနေ သူတို့စီးလာတဲ့ ဆိုင်ကယ် ၂ စီး၊ MA3 သေနတ် ၁ လက်၊ MA11 သေနတ် ၃ လက်၊ လက်ပစ်ဗုံး ၃ လုံး၊ ဖုန်း ၂ လုံးနဲ့ ၅.၅၆ ကျည်အတောင့် ၄၀၀ နီးပါးတို့ သိမ်းဆည်းရရှိခဲ့ပါတယ်။ နောက်နေ့မှာ ပဲပြစ်တောရွာကို စစ်ကြောင်းထိုးပြီးတော့ ရွာသား ၁ ယောက်ကို ပစ်သတ်သွားတယ်။ သူ့နာမည်တို့ အသက်အရွယ်တို့ကတော့ စုံစမ်းနေတယ်။ အိမ်တချို့လည်း မီးရှို့ခံရသေးတယ်” လို့ DVB ကို ပြောပါတယ်။
စစ်ကောင်စီတပ်ဖွဲ့ဝင်တွေဟာ ဇူလိုင် ၂၄ ရက်နေ့ မနက်ပိုင်းမှာ ချောင်းဦးမြို့အနီးက ပဲပြစ်တောကျေးရွာကို စစ်ကြောင်းထိုးဝင်ရောက်ပြီး လူနေအိမ် ၅ လုံးကို မီးရှို့ဖျက်ဆီးသလို ရွာခံ အမျိုးသား ၁ ယောက်ကိုလည်း ပစ်ခတ် သတ်ဖြတ်သွားတယ်လို့ ဆိုပါတယ်။
မုံရွာ-မန္တလေးလမ်းပိုင်းပေါ်မှာ စစ်ကောင်စီတပ်ဖွဲ့ဝင်တွေ မကြာခဏ တိုက်ခိုက်ခံနေရသလို စစ်ကောင်စီတပ်ဘက်ကလည်း မုံရွာမြို့နယ်ထဲက ကျေးရွာတွေကို စစ်ကြောင်းထိုး ဝင်ရောက်တာတွေအပြင် လက်နက်ကြီးတွေနဲ့ ပစ်ခတ်တာတွေနဲ့ လေကြောင်းကနေ တိုက်ခိုက်နေလို့ တချို့ကျေးရွာတွေက ဒေသခံတွေဟာ ကျေးရွာတွေအတွင်း မနေရဲကြဘဲ နေရပ်စွန့်ခွာ ထွက်ပြေးနေကြရတယ်လို့လည်း ကူညီဆောင်ရွက်ပေးနေသူတွေဆီကနေ သိရပါတယ်။
