နေပြည်တော် ဥတ္တရသီရိမြို့နယ်၊ ဇေယျဌာနေလမ်းမှာ အသက် ၇၄ နှစ်အရွယ် အဘိုးအို တယောက်ကို ရိုက်သတ်ပြီး ဖုန်းနဲ့ပိုက်ဆံအိတ်လုသွားသူ ၃ ယောက်ကို စစ်ကောင်စီ လက်အောက်ခံ ရဲတွေက ဖမ်းဆီးစစ်ဆေးနေတယ်လို့ မြို့ခံတွေဆီက သိရပါတယ်။
ဇူလိုင် ၁၇ ရက် မနက်က ဥတ္တရသီရိမြို့နယ်၊ ဇေယျဌာနေလမ်း အမှတ် ၁ မီးသတ်စခန်း အနောက်ဘက် တောတွင်းမှာ အသက် ၇၄ နှစ်အရွယ် ဦးလှဝင်းကို တုတ်နဲ့ရိုက်သတ်ပြီး ဖုန်းနဲ့ပိုက်ဆံအိတ် လုသွားတဲ့ အမျိုးသား ၃ ယောက်ကို ရဲတွေက ဖမ်းမိပြီး စစ်ဆေးနေတယ်လို့ မြို့ခံတယောက်က DVB ကို ပြောပါတယ်။
“သတ်ပြီးလုသွားတာ လေးကျွန်းမဏ္ဍိုင်ဘုန်းကြီးကျောင်းက ကပ္ပိယကြီး အတော်လည်း အသက်ကြီးနေပြီ။ ကိုင်တဲ့ဖုန်းက ဟိုတုန်းက vivo ဖုန်းအသေးလေး၊ အဲဒါကို ရိုက်သတ်ပြီး လုသွားတာ ပိုက်ဆံအိတ်ထဲမှာ ဘယ်လောက်ပါလဲတော့ မသိဘူး။
အခင်းဖြစ်တဲ့နေ့က ပြစ်မှုကျူးလွန်သူ အမျိုးသား ၃ ယောက် ဖုန်းဆက်စကားပြောနေတဲ့ ဦးလှဝင်းကို တွေ့ရှိပြီး ပိုက်ဆံအိတ်လွယ်ထားကိုပါ မြင်ရတဲ့အတွက် ၂ ယောက်က တုတ်နဲ့ရိုက်ပြီး ကျန်တယောက်က ဖုန်းနဲ့ပိုက်ဆံအိတ်လုခဲ့တာလို့ အုပ်ချုပ်ရေးနဲ့နီးစပ်သူတယောက်က DVB ကို ပြောပါတယ်။
“နေပြည်တော်မှာ ကျူးတွေရော၊ ပျံကျတွေရော၊ စစ်ရှောင်တွေရော အကုန်စုံနေတော့ ဖြစ်ချင်သလို ဖြစ်နေတာ။ လုယက်မှုတွေ ကြည့်လိုက်ရင် အသေပဲ။ ပြီးခဲ့တဲ့နှစ်က ဇဝနသိဒ္ဓိမှာ မိသားစု ၃ ယောက်ကို သတ်ပြီးလုသွားတဲ့သူတွေတော့ သေဒဏ်ပေးလိုက်ပြီ။”
လတ်တလောမှာ ပြစ်မှုကျူးလွန်သူ အမျိုးသား ၃ ယောက်ကို ဥတ္တသီရီမြို့နယ်ရဲစခန်းက ( ပ) ၆၉/၂၀၂၅ ပုဒ်မ ၃၀၂ နဲ့ အမှုဖွင့်လှစ်စစ်ဆေးနေတယ်လို့လည်း ဆိုပါတယ်။
၂၀၂၄ ခုနှစ် သြဂုတ် ၁၀ ရက်က ဥတ္တရသီရိမြို့နယ် ဇဝနသိဒ္ဓိရပ်ကွက် မြတ်လေးလမ်းမှာ မိသားစုသုံးဦးအား သတ်ဖြတ်ပြီး အိမ်စီးကားနဲ့ဖုန်းလုယက်ခဲ့သူ အမျိုးသား ၅ ယောက်ကိုတော့ အခုနှစ် ဧပြီလထဲမှာ ဥတ္တရသီရိခရိုင်တရားရုံးက သေဒဏ်နဲ့ထောင်ဒဏ်တွေ ချမှတ်ခဲ့ပါတယ်။
အလားတူပင် ဇမ္ဗူသီရိမြို့နယ် သုခတော်ဝင်အိမ်ရာမှာ အမျိုးသမီးတယောက်အား သတ်ဖြတ်လုယက်ခဲ့သူ ၃ ယောက်ကို ပြီးခဲ့တဲ့ ဇူလိုင် ၇ ရက်မှာ ပျဉ်းမနားခရိုင်တရားရုံးက သေဒဏ်ချမှတ်ခဲ့တဲ့ ဖြစ်စဥ်လည်း ရှိပါတယ်။
