ရန်ကုန်တိုင်း၊ မှော်ဘီရဲတပ်ရင်း ၅ က ရဲတပ်ဖွဲ့ဝင် ၁ ယောက် ခဲယမ်းတွေနဲ့အတူ ဇူလိုင် ၁၉ ရက်နေ့မှာ တောင်သာ ပကဖ ဆီ​ကို အလင်းဝင်လာပြီး မကွေးတိုင်း၊ စလင်းမြို့နယ်မှာတော့ ပေါ်တာဆွဲခံရပြီး စစ်မှုထမ်းနေရသူ ၆ ယောက် အလင်းဝင်ရောက်လာတယ်လို့ ဒေါင်းစစ်အောင် (Local PDF) ဆီကနေ သိရပါတယ်။

တောင်သာ ပကဖ ဆီကို ပူးပေါင်းအလင်းဝင်ရောက်လာသူ ရဲတပ်သား ငြိမ်းမောင် ဟာ စစ်တပ်က ပေါ်တာဆွဲခံရပြီးနောက် ရဲတပ်ရင်းထဲပို့ခံရတာဖြစ်ပြီး လက်ပစ်ဗုံး ၂ လုံး၊  ကျည်အတောင့် ၂၅၀ တို့ကို ယူဆောင်လာတယ်လို့ တောင်သာ ပကဖ ရဲ့ ပြန်ကြားရေးတာဝန်ခံက ဆိုပါတယ်။

တောင်သာ ပကဖ တာဝန်ခံ ကိုကြည်စတား ကလည်း “ကိုငြိမ်းမောင် က အာဇာနည်နေ့မှာ အမှတ်တရ အလင်းဝင်လာသူပါ။ သူ့ရှေ့မှာ မှော်ဘီရဲတပ်ရင်း ၅ ကနေ ကျနော်တို့ဆီကို အလင်းဝင်ထားနှင့်ပြီးသားသူတွေလည်းရှိထားတယ်။ အဲဒါကြောင့်လည်း ကိုငြိမ်းမောင် က ထပ်ပြီး အလင်းဝင်လာတာပါ။ သူက လက်နက်တော့ပါမလာခဲ့ဘူး။ လက်နက်ပါလာရင်တော့ ထိုက်ထိုက်တန်တန်ဆုငွေချီးမြှင့်ပေးပါတယ်” လို့ DVB ကို ပြောပါတယ်။

စစ်ကောင်စီလက်အောက်မှာရှိနေသူတွေအားလုံး ပြည်သူနဲ့အမြန်ဆုံးပူးပေါင်းပါဝင်ကြဖို့နဲ့ ပူးပေါင်း ပါဝင်လာသူတွေကို ဝမ်းမြောက်ဝမ်းသာနဲ့  နွေးနွေးထွေးထွေး ကြိုဆိုနေမယ်လို့လည်း သူက ဆက်ပြောပါတယ်။

ပြီးခဲ့တဲ့ ၂၀၂၄ ခုနှစ်၊ သြဂုတ်လနဲ့ ဒီဇင်ဘာလကလည်း မှော်ဘီရဲတပ်ရင်း ၅ က ရဲတပ်ဖွဲ့ဝင်တွေဟာ တောင်သာ ပကဖ ဆီကို အလင်းဝင်ရောက်လာခဲ့ကြတယ်လို့ သိရပါတယ်။

မကွေးတိုင်း၊ စလင်းမြို့နယ်မှာတော့ စစ်ကောင်စီတပ်ရဲ့ပေါ်တာဆွဲခံရပြီး စစ်မှုထမ်းနေရသူ ၆ ယောက် အလင်းဝင်ရောက်လာတယ်လို့ ဒေါင်းစစ်အောင် (Local PDF) ဆီကနေ သိရပါတယ်။

ဒေါင်းစစ်အောင် (Local PDF) ရဲ့ ပြန်ကြားရေးတာဝန်ရှိသူက “စလင်းအခြေစိုက်တဲ့ ခလရ ၂၅၃၊ ၂၅၄၊ ၂၅၅ တပ်ရင်းတွေက တပ်သားသစ် ၆ ယောက်က ကျနော်တို့ညီနောင် ၃ ဖွဲ့ဖြစ်တဲ့ ကျနော်တို့အဖွဲ့၊ ဗမာ့တပ်တော်နဲ့ ပေါက်တောင်ပိုင်း ကျန်းမာရေးနဲ့သူနာပြုတပ်ဖွဲ့တို့ဆီကို ကြိုတင်ချိတ်ဆက်ပြီး သူတို့တာဝန်ကျတဲ့တပ်တွေထဲကနေ ထွက်ပြေးလာကြတာပါ။ လက်နက်ခဲယမ်းတွေတော့ ပါမလာကြပါဘူး” လို့ ပြောပါတယ်။

စစ်ကောင်စီတပ်ရဲ့မတရားပေါ်တာဆွဲဖမ်းဆီးခံရပြီး စစ်မှုထမ်းနေကြရတဲ့ စစ်ကိုင်းမြို့နယ်ထဲက ၄ ယောက်၊ လယ်ဝေးမြို့နယ်ထဲက ၂ ယောက်တို့ဖြစ်ကြပြီး တိုက်ပွဲတွေရှိနေလို့ အခုမှ သတင်းထုတ်ပြန်ရတာဖြစ်တယ်လို့ ဆိုပါတယ်။

ဒေါင်းစစ်အောင် (LPDF) တာဝန်ခံ ကိုထူးလေး က “သူတို့ ၆ ယောက်လုံးက ဗထူးမှာစစ်သင်တန်း အပတ်စဉ် ၁၂ သင်တန်းတက်ခဲ့ပြီး ပခုက္ကူ တပ်မ ၁၀၁ ကို အပို့ခံရပြီး အဲဒီကနေ ခလရ ၂၅၃၊ ၂၅၄၊ ၂၅၅ တပ်ရင်းတွေဆီကို ထပ်အပို့ခံရတာ တပတ်လောက်ပဲရှိသေးတာ။ တပ်ထဲမှာသူတို့ကို နောက်တန်း တာဝန်တွေပေးထားပြီးတော့ လက်နက်မကိုင်ခိုင်းလို့ အခုအလင်းဝင်လာတဲ့အချိန်မှာ ဘာလက်နက်မှ ယူမလာနိုင်ကြပါဘူး။ သူတို့ထဲက တယောက်ရဲ့ညီက စစ်ကိုင်းဘက်က PDF တပ်ရင်းတခုထဲမှာရှိနေတော့ ၆ ယောက်လုံး အဲဒီကိုသွားမယ်လို့ ပြောတယ်။ ကျနော်တို့ဘက်ကလည်း ချိတ်ဆက်ပေးထားတယ်။ ဟိုဘက်ကလာခေါ်ရင် ထည့်ပေးလိုက်ရုံပါပဲ။ အခုလောလောဆယ်တော့ ကျနော်တို့ဆီမှပေဲ သူတို့အရင် အလင်းဝင်လာကြသူတွေနဲ့အတူ အဆင်ပြေအောင်ထားပေးထားတယ်” လို့ DVB ကို ပြောပါတယ်။

အလင်းဝင်ရောက်လာကြသူတွေကို အစစအရာရာအဆင်ပြေအောင်ဆောင်ရွက်ပေးထားပြီး အလင်းဝင်ရောက်ခိုလှုံဖို့အတွက် ကျန်ရှိနေသေးတဲ့ စစ်ကောင်စီတပ်ဖွဲ့ဝင်တွေကိုလည်း အချိန်မရွေးဖိတ်ခေါ်ထားတယ်လို့ ဒေါင်းစစ်အောင် (LPDF) အပါအဝင် မဟာမိတ်တပ်ဖွဲ့တွေဆီကနေ သိရပါတယ်။