မန္တလေးတိုင်း၊ ငါန်းဇွန်မြို့နယ်ထဲက PDF စခန်းတခုကို ဇူလိုင် ၁၅ ရက်နေ့မှာ စစ်ကောင်စီစစ်ကြောင်းရဲ့ တိုက်ခိုက်စီးနင်းခံရလို့ PDF ရဲဘော် ၄ ယောက် ကျဆုံးပြီး လက်နက်ခဲယမ်းတွေလည်း သိမ်းဆည်းခံလိုက်ရတယ်လို့ တော်လှန်ရေးတပ်ဖွဲ့တွေဆီကနေ သိရပါတယ်။
HERO DEFENCE FORCE (မြင်းခြံ) ရဲ့ တပ်ဖွဲ့ဝင်တယောက်က “စစ်တပ်စစ်ကြောင်းထိုးနေတဲ့ ငါန်းဇွန်နယ်အနောက်ဘက်ခြမ်းက တောင်ရွာဘို့ရွာနဲ့ ဆပ်ပြာကျင်းရွာ ၂ ရွာကြားက PDF စခန်းငယ်တခု စီးနင်းခံလိုက်ရပြီးတော့ ရဲဘော် ၄ ယောက်ကျသွားတယ်လို့ သိရတယ်ဗျ” လို့ ပြောပါတယ်။
စစ်ကောင်စီတပ်ဟာ ငါန်းဇွန်မြို့နယ်ထဲကို ဇူလိုင် ၈ ရက်နေ့ကနေစတင်ပြီး စစ်ကြောင်း ၃ ကြောင်းနဲ့ စစ်ကြောင်းထိုးဝင်ရောက်နေတာလို့လည်း ဆိုပါတယ်။
ငါန်းဇွန်မြို့နယ် ပြည်သူ့ကာကွယ်ရေးအဖွဲ့ (ငါန်းဇွန် ပကဖ) ရဲ့ ပြန်ကြားရေးတာဝန်ခံတယောက် က “အဲဒီ PDF စခန်းက Local အဖွဲ့လို့တော့သိရတယ်။ ဘယ်အဖွဲ့ကစခန်းလဲဆိုတာတော့ မသိရသေးဘူး။ စစ်တပ်စစ်ကြောင်းက သူတို့စခန်းကိုဝင်စီးတဲ့အချိန် တိုက်ပွဲငယ်ဖြစ်ခဲ့သေးတဲ့။ တိုက်ပွဲထဲမှာ ၂ ယောက်ကျတယ်။ နောက်ထပ် ၂ ယောက်ကတော့ အရှင်အဖမ်းခံရပြီးတော့မှ ရက်ရက်စက်စက် သတ်သွားကြတယ်။ ရဲဘော်တချို့တော့လွတ်တယ်။ စခန်းလည်း ဖျက်ဆီးခံရပြီးတော့ လက်နက်ခဲယမ်းနဲ့ စစ်သုံးပစ္စည်းတချို့လည်း အသိမ်းခံလိုက်ရတယ်လို့တော့ သိရတယ်။ စစ်ကြောင်းတွေကတော့ ဆက်ထိုးနေတုန်းပဲ။ တချို့နေရာတွေမှာ တိုက်ပွဲဖြစ်တာတွေရှိပါတယ်” လို့ DVB ကို ပြောပါတယ်။
ပြီးခဲ့တဲ့ ဇူလိုင် ၃ ရက်နေ့က ငါန်းဇွန်နဲ့ မြင်းခြံမြို့နယ်အစပ်မှာ စစ်ကောင်စီစစ်ကြောင်းကို တော်လှန်ရေးပူးပေါင်းတပ်ဖွဲ့တွေဘက်က တပ်ပျက်တဲ့အထိ တိုက်ခိုက်ခဲ့ကြပြီးနောက်ပိုင်း စစ်ကောင်စီတပ်ဘက်ကလည်း အင်အားအလုံးအရင်းနဲ့ ထပ်မံစစ်ကြောင်းထိုး ဝင်ရောက်နေတာလို့ သူက ဆက်ပြောပါတယ်။
စီးနင်းခံရတဲ့ PDF စခန်းကနေ PDF ရဲဘော် အလောင်း ၂ လောင်းနဲ့ လက်နက်ခဲယမ်းတွေ သိမ်းဆည်းရရှိခဲ့တယ်လို့လည်း စစ်ကောင်စီထောက်ခံသူတွေက တယ်လီဂရမ်ချယ်နယ်တွေနဲ့ လူမှုကွန်ရက်စာမျက်နှာတွေမှာ ရေးသားဖေါ်ပြနေကြပါတယ်။
