ကရင်နီပြည်နယ်တနေရာမှာ ဖွင့်လှစ်ထားတဲ့ O-1 ဆေးရုံမှာ ၂၀၂၅ ခုနှစ် ဇန်နဝါရီလကနေ ဇွန်လအထိ ၆ လအတွင်း အတွင်းလူနာ၊ ပြင်ပလူနာ စုစုပေါင်း ၁,၆၅၅ ယောက်ကို ဆေးဝါးကုသပေးခဲ့တယ်လို့ ဇူလိုင် ၁၂ ရက်နေ့က ထုတ်ပြန်ထားပါတယ်။
အတွင်းလူနာအနေနဲ့ ဖျားနာလူနာ ၁၇၇ ယောက်၊ ခွဲစိတ်လူနာ ၄၃၅ ယောက်၊ မိခင်နဲ့ကလေး လူနာ ၁၅၁ ယောက်ကို ကုသပေးခဲ့ပြီး ဆေးရုံမှာတက်ရောက်ကုသရတဲ့ လူနာတွေထဲက စစ်ကြောင့်ဖြစ်တဲ့ လူနာ ၁၈၇ ယောက်ကို စရိတ်ငြိမ်းကုသပေးခဲ့တယ်လို့ သိရပါတယ်။
ပြင်ပလူနာတွေအနေနဲ့ သွေးတိုးရောဂါ၊ နှလုံးရောဂါ၊ အသက်ရှူလမ်းကြောင်းဆိုင်ရာရောဂါ၊ မတော်တဆထိခိုက်ဒဏ်ရာ စတဲ့ လူနာ ၈၉၂ ယောက်ကိုလည်း ကုသပေးခဲ့တယ်လို့ ဆိုပါတယ်။
O-1ဆေးရုံက အရိုးရောဂါလူနာတွေကို ကုသပေးတဲ့ တာဝန်ခံဆရာဝန်က “အခက်အခဲတွေကတော့ ကုသပေးရတဲ့လူနာနဲ့ ကျန်းမာရေးဝန်ထမ်းမမျှတမှုရယ်၊ တောထဲမှာကုသရတဲ့အတွက် ပညာရပ်ပိုင်းဆိုင်ရာ စိန်ခေါ်မှုတချို့ရယ်၊ အကန့်အသတ်ပဲရရှိတဲ့ ဆေးဝါးပစ္စည်းတွေရယ်ပါ။ ရှိတဲ့လူအင်အားရယ် ရှိတဲ့ဆေးဝါးပစ္စည်းတွေနဲ့ အကောင်းဆုံးဖြစ်အောင် ကုသပေးပါတယ်ခင်ဗျ။ လူရောစိတ်ရောပင်ပန်းရပါတယ်” လို့ ပြောပါတယ်။
၆ လတာကာလအတွင်း ခွဲစိတ်ကုသမှုပေါင်း ၄၅၉ ခု ပြုလုပ်ပေးနိုင်ခဲ့ပြီး တီဘီလူနာ ၃၃ ယောက်ကို ဆေးဝါးမပြတ်တောက်သွားအောင် စီစဉ်ပေးနိုင်ခဲ့တဲ့အပြင် ငှက်ဖျားလူနာ ၂၁၇ ယောက်ကိုလည်း ကုသပေးခဲ့တယ်လို့ ထုတ်ပြန်ထားပါတယ်။
တက်ရောက်တဲ့လူနာတွေ၊ လူနာစောင့်နဲ့ ဆေးရုံဝန်ထမ်းတွေကို ထမင်း ၃ နပ်ကျွေးနိုင်ခဲ့သလို တိုးချဲ့လူနာဆောင်နဲ့ စစ်မြေပြင်အတွက်အရေးကြီးဆုံးဖြစ်တဲ့ ဗုံးခိုကျင်းတွေလည်း ဆောက်လုပ်နိုင်ခဲ့ပြီး ၆ လတာအတွင်း ဆေးရုံကုန်ကျစရိတ်စုစုပေါင်း သိန်း ၄,၈၅၀ ကျော် ကုန်ကျခဲ့တယ်လို့ သိရပါတယ်။
