ထားဝယ်ခရိုင်၊ ထိုင်း-မြန်မာနယ်စပ် သုခစခန်းမှ တာဝန်ခံ ဗိုလ်ကြီးတဦး ကရင်အမျိုးသားအစည်းအရုံး (KNU) တပ်မဟာ ၄ ဆီ ဘက်ပြောင်းခိုလှုံလာတယ်လို့ KNU မြိတ်-ထားဝယ်ခရိုင်က ဒီကနေ့ ဇူလိုင် ၁၀ ရက်မှာ ထုတ်ပြန်ပါတယ်။

ဇူလိုင် ၁ ရက်နေ့မှာ သုခစခန်းတာဝန်ခံ ဗိုလ်ကြီးမြင့်ဆွေဦး( ခ) စောမိုးဇက်က KNU တပ်မဟာ ၄၊ တပ်ရင်း ၁၀ဆီ ချိတ်ဆက်ပြီး ဘက်ပြောင်းခိုလှုံလာတာလို့ ဆိုပါတယ်။

KNU မြိတ်-ထားဝယ်ခရိုင် အတွင်းရေးမှူး ပဒိုစောအယ်နားက “သုခစခန်းမသိမ်းခင် ကျနော်တို့ဆီ ထွက်ပြေးခိုလှုံလာတာပါ။ လက်ရှိမှာတော့ သူက တပ်ရင်း‌ ၁၀ တပ်ရင်းမှူးနဲ့ အတူတူပဲနေနေတယ်။ ချစ်ချစ်ခင်ခင် ရင်းရင်းနီးနီးနဲ့ အတူတူ နေနေကြပါတယ်” လို့ ပြောပါတယ်။

ဘက်ပြောင်းခိုလှုံလာသူ ဗိုလ်ကြီးမျိုးဆွေဦး (ခ) စောမိုးဇက်က ဗိုလ်ကြီးအဆင့် တပ်ခွဲမှူးရာထူးနဲ့ သုခစခန်း၊ စစ်ကြောင်း ၂ စစ်ကြောင်းမှူးဖြစ်ပြီး သူက စစ်ကောင်စီလက်အောက်မှာ ဆက်လက်တာဝန်မထမ်းဆောင်ချင်တာကြောင့် ဘက်ပြောင်းလာတယ်လို့ ပဒိုစောအယ်နားက ပြောပါတယ်။

ဘက်ပြောင်းခိုလှုံလာပြီးနောက် ဇူလိုင် ၇ ရက်နေ့မှာ ကရင်အမျိုးသားလွတ်မြောက်ရေးတပ်မတော် (KNLA) နဲ့ တော်လှန်ရေးပူပေါင်းတပ်ဖွဲ့တွေက စစ်ကောင်စီရဲ့ သုခစခန်းကို မနက်ပိုင်းအတွင်း သိမ်းပိုက်နိုင်ခဲ့ပြီး စစ်ကောင်စီတပ်သား ၂၄ ဦး ထိုင်းဘက်ကို ထွက်ပြေးတိမ်းရှောင်သွားတယ်လို့ သိရပါတယ်။

သုခစခန်းကို တော်လှန်ရေးတပ်ဖွဲ့တွေဘက်က သိမ်းပိုက်ပြီးတဲ့နောက် RPG-7 ၃၆ ခု၊ ၆၀ မမဗုံးသီးအလုံး ၅၀ ၊ ၄၀ မမ ဗုံးသီး ၄၅ လုံး၊ MA ကျည်အတောင့် ၃,၀၀၀၊ ငါးကြင်းမှီးကျည် ၉၂၂ တောင့်၊ ရှေ့ထွက်မိုင်း ၁၁ လုံး၊ စကာားပြောစက်အကြီး ၁ ခု၊ မီးစက် ၁ ခု၊ ဂျမ်မာတခုနဲ့ RPG -7 ရမ်းပို့ ၃၅ တောင့်တို့ကို သိမ်းဆည်းရမိတယ်လို့ ပဒိုစောအယ်နားဆီက သိရပါတယ်။