မန္တလေးတိုင်း၊ နွားထိုးကြီးမြို့က ရဲတပ်ဖွဲ့ဝင်တယောက် ဇူလိုင် ၁ ရက်က မြင်းခြံခရိုင် အမှတ် ၈ တပ်ရင်းဆီကို လာရောက်ပူးပေါင်းခဲ့တယ်လို့ သိရပါတယ်။

မြင်းခြံခရိုင် အမှတ် ၈ တပ်ရင်းရဲ့ ပြန်ကြားရေးတာဝန်ခံက “ကျနော်တို့ဆီ လာရောက်ပူးပေါင်းသူက နွားထိုးကြီးမြို့မှာရှိတဲ့ မြို့မရဲစခန်းကနေ တရုတ်ဂက်(စ်)ပိုက်လိုင်းက ဂိတ်တခုမှာ တာဝန်ကျနေတဲ့ ရဲတပ်ကြပ်တယောက် ဖြစ်ပါတယ်” လို့ ပြောပါတယ်။

မြင်းခြံခရိုင် အမှတ် ၈ တပ်ရင်းမှာ လာရောက်ပူးပေါင်းသူဟာ ရဲတပ်ကြပ် ကိုဝင်းခိုင် (လ/၂၂၂၇၉၀) ဆိုသူဖြစ်ပြီး လက်နက်ခဲယမ်းတွေတော့ ယူဆောင်မလာနိုင်ဘူးလို့လည်း ဆိုပါတယ်။

မြင်းခြံခရိုင် အမှတ် ၈ တပ်ရင်း တာဝန်ခံ ကိုလင်းလတ်က “သူက ကျနော်တို့ဆီကို ကြိုတင်ချိတ်ဆက်ထားတာ မရှိဘဲနဲ့ သူကိုယ်တိုင် သူ့စခန်းကနေ ထွက်ပြေးလာပြီးတော့ ကျနော်တို့ရဲဘော်တွေရှိတဲ့ ဂိတ်စခန်းအထိ လာရောက်ခဲ့သူပါ။ အထက်ကနေ အဓမ္မစေခိုင်းတဲ့ အလုပ်တွေကို မလုပ်ချင်တော့လို့ အခုလို ပူးပေါင်းရတာလို့ ပြောတယ်။ သူ့ဆန္ဒက မိသားစုနဲ့အတူ နေထိုင်ချင်တယ်​ဆိုလို့ အဲဒီအတွက်လည်း အလေးပေး ဆောင်ရွက်ပေးနေပါတယ်” လို့ DVB ကို ပြောပါတယ်။​

ရဲတပ်ကြပ် ကိုဝင်းခိုင်ကို လောလောဆယ်မှာတော့ လုံခြုံစိတ်ချရတဲ့ နေရာတခုမှာ လွတ်လွတ်လပ်လပ် ထားပေးထားတယ်လို့လည်း သူက ဆက်ပြောပါတယ်။

တော်လှန်ရေးစတင်ချိန်ကနေ အခုချိန်အထိ မြင်းခြံခရိုင် အမှတ် ၈ တပ်ရင်းကို လာရောက်ပူးပေါင်းသူတွေဟာ ရဲတပ်ကြပ် ကိုဝင်းခိုင် အပါအဝင် ၂ ယောက်ရှိနေပြီး ထပ်မံအလင်းဝင်ရောက်လိုသူတွေကိုလည်း အချိန်မရွေး ကြိုဆိုနေတယ်လို့ သိရပါတယ်။