မန္တလေးတိုင်း၊ မြင်းခြံခရိုင်၊ မြို့သာ-ဆီမီးခုံလမ်းတိုက်ပွဲမှာ စစ်ကောင်စီတပ်သား  အယောက် ၃၀ ဝန်းကျင် သေဆုံးခဲ့ပြီး ၄ ယောက် အရှင်ဖမ်းမိကာ စစ်ရေးဆက်လက်တင်းမာနေတယ်လို့ မြင်းခြံခရိုင်တပ်ရင်း-၇ ဇီးရိုးတပ်ဖွဲ့က ပြောပါတယ်။

ဇူလိုင် ၃ ရက် မနက်အစောပိုင်းက မြို့သာ-ဆီမီးခုံလမ်း၊ ငါန်းဇွန်နဲ့ မြို့သာအကြား မြင်းခြံခရိုင်ဘက်ခြမ်း တနေရာမှာ စစ်ကောင်စီယာဉ်တန်းကို ဒေသကာကွယ်ရေးအဖွဲ့တွေက ကြားဖြတ်တိုက်ခိုက်ခဲ့တာပါ။

တိုက်ပွဲမှာ စစ်ကောင်စီတပ်က စစ်ကြောင်းမှူး အပါအဝင် စစ်သား ၃၀ ဝန်းကျင် သေဆုံးခဲ့ပြီး သေနတ် ၄ လက်၊ ကျည် ၂,၀၀၀ ကျော်နဲ့ ကား ၂ စီး သိမ်းဆည်းရမိတဲ့အပြင် အရာခံဗိုလ်တယောက် အပါအဝင် စစ်သား ၄ ယောက်ကို အရှင်ဖမ်းဆီးနိုင်ခဲ့တယ်လို့ မြင်းခြံခရိုင်တပ်ရင်း-၇ ဇီးရိုးပြောက်ကျားတပ်ဖွဲ့ တာဝန်ရှိသူက ပြောပါတယ်။

တံတားဦးခရိုင်၊ ငါန်းဇွန်မြို့နယ်၊ မြို့သာကနေ အင်အား ၁၄၀ ကျော်နဲ့ ထွက်လာတဲ့ စစ်ကောင်စီတပ်ဖွဲ့တွေဟာ မြင်းခြံခရိုင် စမြိတ်ခုံ၊ ငမြာနဲ့ ဆုံရွာ-ကွေ့ကြီး ပျူရွာတွေကို ရိက္ခာနဲ့ အင်အားဖြည့်ဖို့ ဇွန် ၃၀ ရက်မှာ မြို့သာ-ငါန်းဇွန်လမ်းအတိုင်း ပြင်ဆင်ထွက်ခွာလာခဲ့တာပါ။

ဗိုလ်ဇီးရိုးက “၃၀ ဝန်းကျင်လောက်သေတယ်လို့ အတိအကျ ပြောနိုင်ပါတယ်။ အရှင်ကတော့ ၄ ယောက် မိတာပေါ့။ တယောက်ကတော့ စစ်မှုထမ်းဥပဒေနဲ့ ပါလာတဲ့ ရဲဘော်ပေါ့နော်၊ ကျနော်တို့က ဘက်ပြောင်းခိုလှုံအနေနဲ့ ဒီကလေးကိုတော့ သေချာဂရုစိုက်ထားတယ်။ ကျန်တဲ့ ၃ ယောက်ထဲက တယောက်ကတော့ ဖမ်းဆီးလာတဲ့အချိန်မှာပဲ ရဲဘော်တယောက်ရဲ့ လက်နက်ကို လာလုတဲ့ပုံစံ ဖြစ်တာနဲ့ သူ့ကိုတော့ မလွှဲမရှောင်သာလို့ ပစ်ခတ်ရှင်းလင်းခဲ့ရတယ်ပေါ့နော်။ ၂ ယောက် ကျန်တယ်ပေါ့၊ ၂ ယောက်မှာ တယောက်က တပ်သားဖြစ်ပြီးတော့ တယောက်က အရာခံဗိုလ် ဖြစ်ပါတယ်။ ပြင်ဦးလွင်ကလို့ ကျနော်တို့သိရသလို ကျနော်တို့သိမ်းဆည်းရမိတဲ့ ပစ္စည်းတွေထဲမှာလည်း တပ်ပေါင်းစုံပေါ့နော်၊ သံချပ်ကာပါတယ်။ ဆက်သွယ်ရေးပါတယ်။ လပခ ပါတယ်။ ရဲတွေပါတယ်ပေါ့နော်။ ဒီလို ဘက်တံဆိပ်ပေါင်းစုံနဲ့ သိမ်းဆည်းရမိတဲ့ ယူနီဖောင်းတွေ ခဲယမ်းတွေလည်း ပါပါတယ်” လို့ ပြောပါတယ်။

ဇူလိုင် ၃ ရက်နေ့ တိုက်ပွဲအပြီး ဇူလိုင် ၅ ရက်မှာ စစ်ကောင်စီက မြင်းခြံခရိုင်အတွင်းက ကျေးရွာတချို့ကို လေကြောင်းကနေ ခြိမ်းခြောက်တိုက်ခိုက်ခဲ့ပြီး မန္တလေး၊​ အမရပူရ၊ ရွှေကြက်ယက်ဆိပ်ကမ်းကနေ မြင်းခြံခရိုင်ဘက်ကို ဧရာဝတီမြစ်ရိုးအတိုင်း စစ်ရေယာဉ်တွေ စုန်ဆင်းပြီး အင်အားဖြည့်တင်းခဲ့တယ်လို့ ဒေသကာကွယ်ရေးအဖွဲ့တွေက ပြောပါတယ်။ စစ်ကောင်စီက လေကြောင်း၊ ရေကြောင်း ၂ မျိုးစလုံး သုံးနေပေမဲ့ မန္တလေးတိုင်း၊ မြို့နယ်တွေမှာ ဒေသကာကွယ်ရေးအဖွဲ့တွေက မြေပြင်စစ်ရေးအသာစီးယူထားဆဲ ဖြစ်တယ်လို့ ဆိုပါတယ်။

မတ္တရာ PDF မှ ဦးတိုးက “မြင်းခြံရဲ့မြောက်ဘက် နဘူးအိုင်နဲ့ စမြိတ်ခုံလမ်းပေါ်မှာ ကျောက်တိုင်ရွာ ဆိုတာရှိတယ်၊ အိမ်ခြေကတော့ ၁၀၀ ဝန်းကျင်ပါပဲ။ မိတ္ထီလာတပ် ဂျက်ဖိုက်တာလို့လည်း ပြောတယ်၊ ကျောက်တိုင်ရွာရဲ့ အရှေ့အနောက်တောင်မြောက် ပတ်ချသွားတယ်ပေါ့ ၄ လုံး။ ကံကောင်းတာက အထိခိုက်သေဆုံး ဘာမှမရှိဘူး။ မန္တလေး၊ အမရပူရမြို့နယ်၊ ရွှေကြက်ယက်ဆိပ်ကမ်းကနေပြီးတော့ စုန်ဆင်းသွားတာ အားလုံးပေါင်း ၁၈ စီး၊ ဖလက်ခွန်၊ သံခွန်၊ သင်္ဘောအစုံပေါ့၊ အရွယ်စုံပေ့ါ၊ မြင်းခြံအနောက်ခြမ်း ဆိတ်ညံရေဆိပ်ကို သွားကပ်ထားတယ်။ သပိတ်ကျင်းဘက်ကိုလည်း Y12 နဲ့ ဆော်သွားသေးတယ်။ နေ့လယ် ၁၂ နာရီကျော်လောက်မှာလည်း ဂျက်ဖိုက်တာနဲ့ ဆက်ချသွားသေးတယ်။ သပိတ်ကျင်းပဲ။ လေကြောင်းတိုက်ခိုက်မှု ၂ ကြိမ်ရှိတယ်။ ဒါပေမဲ့ အဲဒီမှာ တိုက်ပွဲဖြစ်နေတာရှိတယ် တွင်းငယ်ဘက်။ အမြဲတမ်း ဆက်တိုက်ကြီး ဖြစ်နေတာတော့ မဟုတ်ဘူး၊ ကြိုးကြားကြိုးကြားပေါ့၊ နောက်တခုက (--) တွေတင်ထားတဲ့ ၆ မိုင်ပါသွားတယ်ဆိုတဲ့ ကိစ္စ ပြန်ရပြီနော်၊ ကြာပြီ ၂ ရက် ၃ ရက်ရှိပြီ။ ဆိုတော့ သပိတ်ကျင်းလည်း အခြေအနေကောင်းတယ်” လို့ ပြောပါတယ်။

မြောက်ပိုင်းမဟာမိတ် ၃ ဖွဲ့ရဲ့ ၁၀၂၇ စစ်ဆင်ရေးအလွန်မှာ မန္တလေးတိုင်းထဲက မတ္တရာ၊ စဉ့်ကူး၊ သပိတ်ကျင်း၊ မြင်းခြံ၊ နွားထိုးကြီးမြို့နယ်တွေမှာ ဒေသကာကွယ်ရေးအဖွဲ့တွေက စစ်ကောင်စီအခြေစိုက် စခန်းအများအပြားကို သိမ်းယူနိုင်ခဲ့တာပါ။

တရုတ်အစိုးရရဲ့ ကြားဝင်မှုကြောင့် မြောက်ပိုင်းမဟာမိတ်တွေက ထိုးစစ်တွေ ရပ်ဆိုင်းထားခဲ့ပေမဲ့ ဒေသကာကွယ်ရေးအဖွဲ့တွေက ရထားတဲ့ စစ်ကောင်စီစခန်းတွေကို ပြန်လက်မလွှတ်ရဖို့ ကြိုးပမ်းနေကြပါတယ်။

သုတချမ်းသာ