ထိုင်း-မြန်မာနယ်စပ်၊ ကရင်ပြည်နယ်၊ ဝေါလေမြိုင်မြို့သစ်ရပ်ကွက်တွေမှာ စစ်ကောင်စီတပ်က ပစ်ခတ်တဲ့ လက်နက်ကြီးကျည် ကျရောက်ပေါက်ကွဲလို့ အရပ်သား ၃ ယောက် ဒဏ်ရာရရှိကာ ဒေသခံ ၂၀၀ ကျော် ထိုင်းနိုင်ငံဝေါလေရွာကြီးဘက် ထွက်ပြေးတိမ်ရှောင်နေကြတယ်လို့ စစ်ဘေးရှောင်အရေး ကူညီပေးနေသူတွေဆီက သိရပါတယ်။
ဝေါလေမြိုင်မြို့သစ်၊ ဝေါလေစစ်ကောင်စီ ဗျူဟာစစ်စခန်းကုန်းကို ဇူလိုင် ၄ ရက်မှာ ကရင်အမျိုးသားလွတ်မြောက်ရေးတပ်မတော် (KNLA) နဲ့ မဟာမိတ်တပ်တွေက တိုက်ခိုက်မှုရှိနေတဲ့ အတွက် စစ်ကောင်စီတပ်က လက်နက်းကြီးပစ်ခတ်တိုက်ခိုက်နေတာဖြစ်ပါတယ်။ =
ဒီမနက် ၁၀ နာရီခွဲလောက်မှာ ဝေါလေ ဗျူဟာကနေ လက်နက်ကြီးပစ်ထည့်တာ ရပ်ကွက်က ၃ ယောက် ဒဏ်ရာရထားတယ်လို့ ဒေသခံတယောက်က ပြောပါတယ်။
“လက်နက်ကြီးထိလို့ ဖုဖရ ဆေးရုံပို့ထားတယ်။ ထိုင်းဘက်က ဝေါလေရွာကြီးဘက်က ဘုန်းကြီး ကျောင်းကို ထိုင်းစစ်ကားတွေ လာကြိုပေးနေတယ်။ ရပ်ကွက်သားတွေ ၃၀၀၊ ၄၀၀ လောက်တော့ ရှိမယ်။ တိုက်ပွဲ စဖြစ်တာတော့ ၅ လပိုင်းလောက် ကတည်းကပဲ။ ဝေါလေဗျူဟာကုန်းကတော့ နေ့တိုင်းဆိုသလို လက်နတ်ကြီးနဲ့ ပစ်နေတာ။ ဒီကနေ့ပစ်တာကတော့ ဝေါလေမြိုင်မြို့သစ်ကိုကျ တာများတယ်။”
ဝေါလေမြိုင်မြို့သစ်နေရာရှိ စစ်ကောင်စီတပ်ရဲ့ ဝေါလေစစ်ဗျူဟာ၊ ဥကရိစ်ထစစ်စခန်း၊ ထီးသဲဘလယ်စခန်းတို့ကို ဇူလိုင် ၃ ရက်ကစပြီး KNLA မဟာမိတ်ပူးပေါင်းတပ်တွေ ထိုးစစ်ဆင် တိုက်ခိုက်နေလို့တိုက်ပွဲ ပြင်းထန်နေပါတယ်။
မြန်မာဘက်မှာ တိုက်ပွဲတွေပြင်းထန်းနေလို့ ထိုင်းနိုင်ငံနယ်ခြားစစ်တပ်က စစ်ရေး အသင့်အနေအထားနဲ့ စောင့်ကြပ်နေသလို၊ ထွက်ပြေးလာတဲ့ ဝေါလေဒေသခံတွေကို စစ်ဘေးရှောင်ယာယီ နေရာထိုင်ခင်းတွေ စီစဉ်နေရာချထားပေးနေတယ်လို့ စစ်ဘေးရှောင်အရေး ကူညီပေးနေသူတွေဆီက သိရပါတယ်။
