တနင်္သာရီတိုင်း၊ မြိတ်မြို့နယ်၊ တုံးဗျောကျေးရွာက ကျောင်းသား ၃ ယောက်ကို အမည်မသိ လက်နက်ကိုင်အဖွဲ့တခုကနေ လာရောက်ဖမ်းခေါ်သွားပြီး အဆက်အသွယ်မရတာ ၄ ရက်ကြာပြီလို့ ဒေသခံတွေဆီက သိရပါတယ်။
ဇွန် ၂၆ ရက်နေ့ မနက် ၂ နာရီဝန်းကျင်လောက်က တုံးဗျောကျေးရွာက ဥယျာဉ်ခြံတခုမှာ ခြံစောင့်ပြီး အိပ်နေကြတဲ့ အသက် ၁၇ နှစ်ဝန်းကျင်အရွယ်ကျောင်းသားလူငယ် ၃ ယောက်ကို လာရောက်ဖမ်းဆီးသွားတာလို့သိရပြီး အခု ဇွန် ၂၉ ရက် နေ့လယ်ပိုင်းအချိန်အထိ ပြန်မလွတ်လာသေးဘူးလို့ ဒေသခံတယောက်က ပြောပါတယ်။
“သူတို့တွေက အထက်တန်းတက်နေတဲ့ကျောင်းသားတွေပါပဲ။ သူတို့က ကြက်မောက်သီးခြံစောင့်နေရင်းနဲ့ မနက်စောစော ၂ နာရီမှာ လာဖမ်းသွားတယ်။ ဘယ်အဖွဲ့က ဖမ်းသွားလဲမသိရဘူး။ အခုလက်ရှိအထိလည်း ဒီကလေး ၃ ယောက်က ဘယ်ရောက်နေလဲမသိရဘူး”
ဖမ်းဆီးခံရတဲ့ ကျောင်းသားတွေထဲက တယောက်ဟာ တုံးဗျောကျေးရွာကျောင်းအုပ်ကြီးရဲ့ သားဖြစ်ပြီးတော့ ကျန် ၂ ယောက်ကတော့ ပျူစောထီးရဲ့သားတွေဖြစ်တယ်လို့ ဒေသခံတွေရဲ့ ပြောပြချက်အရ သိရပါတယ်။
မြိတ်မြို့နယ်ပကဖအဖွဲ့ရဲ့ တာဝန်ရှိသူတယောက်ကလည်း ကျောင်းသား ၃ ယောက်ကို ဖမ်းဆီးသွားတဲ့လက်နက်ကိုင်အဖွဲ့ကိုမသိရသေးဘဲ လာရောက်ဖမ်းဆီးသွားတယ် ဆိုတာကိုပဲ သတင်းကြားသိထားရတယ်လို့ ပြောပါတယ်။
“ပျူစောထီးသားတွေလို့တော့ ပြောသံကြားတယ်။ ကျနော်တို့လည်း လိုက်စုံစမ်းနေပါတယ်။ ဘယ်အဖွဲ့ဆိုတာ မသိရသေးဘူး။ အခုလက်ရှိ ဒီဘက်နယ်မြေမှာ လှုပ်ရှားနေတဲ့အဖွဲ့တော့ မရှိဘူး။ ရုတ်တရက်လာဖမ်းဆောင်တာပဲသိလိုက်ရတယ်”
ဖမ်းဆီးခံရတဲ့လူငယ် ၃ ယောက်ရဲ့ နောက်ဆက်တွဲအခြေအနေတွေကိုတော့ ဆက်လက်စုံစမ်းနေဆဲဖြစ်ပြီး ပြန်လည်လွတ်မြောက်လာဖို့အတွက်လည်း မိသားစုဝင်တွေဘက်ကနေ လုပ်ကိုင်ဆောင်ရွက်နေတယ်လို့ သိရကြောင်း ဒေသခံတွေဆီက သိရပါတယ်။
ပြီးခဲ့တဲ့ ဇွန် ၂၄ ရက်နေ့ကလည်း တနင်္သာရီမြို့နယ်၊ အောက်ကင်းကျေးရွာက လူငယ် ၁ ယောက်နဲ့ ဘန်းလမွတ်ကျေးရွာခံ လူငယ် ၁ ယောက်တို့ကို စစ်ကောင်စီတပ်က ဖမ်းဆီးလိုက်တယ်လို့ သိရပြီး တနင်္သာရီမြို့က အချုပ်ထောင်ထဲပို့ဆောင်ခဲ့တယ်လို့ ဒေသခံတွေဆီက သိရပါတယ်။
