တရုတ်နိုင်ငံ အနောက်တောင်ဘက်ကွေ့ကျိုး ဒေသရှိ ရုန်းကျန်းမှာ မိုးသည်းထန်မှုကြောင့် တပတ် အတွင်း ဒုတိယအကြိမ် ရေကြီးခဲ့ပါတယ်။
အဲဒီဒေသမှာ ရေကြီးမှုကို အမြင့်ဆုံးအဆင့် အရေးပေါ်လုပ်ဆောင်ဖို့ အရှိန်မြှင့် ဆောင်ရွက်နေသလို ရေမြင့်တက်လာမှုက ဒေသခံတွေ ဘေးလွတ်ရာကို ရွှေ့ပြောင်းဖို့ တွန်းအား ဖြစ်စေပါတယ်။
ခန့်မှန်းချက်တွေအရ ဒူလီယူမြစ်ရေဟာ အမြင့်ဆုံးအဆင့် ၂၅၃ ဒသမ ၅ မီတာကို ရောက်မယ်လို့ ခန့်မှန်းထားပြီး ဘေးအန္တရာယ်ကင်းတဲ့ ၂၅၁ ဒသမ ၅ မီတာထက် ၂ မီတာ ပိုပြီး မြင့်တက်လာမှာဖြစ်ပါတယ်။ ရေတက်နှုန်းဟာ ၁ စက္ကန့်ကို ကုဗမီတာ ၈၃၆၀ အထိ မြင့်တက် မယ်လို့လည်း မျှော်လင့်ရပါတယ်။ ရေတက်နှုန်းတက်လာလို့ ရေဘေးအန္တရာယ်ကို Level 2 ကနေ Level 1 အဆင့်ထိ တိုးမြှင့် သတ်မှတ်ခဲ့ပြီး အရေးပေါ်လုပ်ဆောင်ချက်များကို တိုးမြှင့်ဆောင်ရွက်နေပါတယ်။
စနေနေ့ နေ့လယ် ၁၂ နာရီခွဲမှာ ရေတက်နှုန်းတိုးမြှင့်လာဖြစ်ပါတယ်။ အဲ့ဒီဒေသဟာ ဇွန် ၂၄ ရက်ကတည်းက ရေကြီးမှုဒဏ်ကို ခံစားခဲ့ရတာဖြစ်ပြီး ရက်ပိုင်းအတွင်း နောက်ထပ် ရေကြီးမှုဒဏ် ကို ထပ်ခံနေရတာဖြစ်ပါတယ်။ ဇွန် ၂၆ ရက် ထုတ်ပြန်ချက်အရ ရေကြီးမှုကြောင့် လူ ၆ ယောက် သေဆုံးထားကြောင်း သိရပါတယ်။
တရုတ်နိုင်ငံမှာ ရေကြီးမှုနဲ့ပတ်သက်ပြီး အရေးပေါ်ဆောင်ရွက်ဖို့ အဆင့် ၄ ဆင့် သတ်မှတ်ထားပြီး အဆင့် ၁ ဟာ အရေးအကြီးဆုံးဖြစ်ပါတယ်။ ရာသီဥတုနဲ့ပတ်သက်ပြီးလည်း တရုတ်နိုင်ငံမှာ အပြာ၊ အဝါ၊ လိမ္မော်၊ အနီ စတဲ့ အဆင့် ၄ ဆင့် သတ်မှတ်ထားပြီး အနီရောင်အဆင့်က အရေးကြီးဆုံး သတိပေးချက်ဖြစ်ပါတယ်။
တရုတ်နိုင်ငံဟာ ထောင်စုနှစ်ပေါင်းများစွာ နွေရာသီရေကြီးမှုတွေနဲ့ ရင်ဆိုင်ခဲ့ရတဲ့ နိုင်ငံဖြစ်ပေမဲ့ ရာသီဥတုပြောင်းလဲခြင်းကြောင့်လို့ သိပ္ပံပညာရှင်အချို့က ပြောပါတယ်။ မကြာခဏ မိုးသည်းထန်မှုရဲ့ အကျိုးဆက်က ရေကြီးမှုတွေကို ဖြစ်ပေါ်စေပြီး အကျိုးဆက်အနေနဲ့ ဆည်ကျိုးကျမှုလိုမျိုး ဘေးအန္တရာယ်တွေလည်း ဖြစ်နိုင်တယ်လို့ ပြောပါတယ်။
ပြီးခဲ့တဲ့ ၂ ရက်က တရုတ်နိုင်ငံတောင်ပိုင်းရှိ ယူနန်၊ ကွေ့ကျိုး၊ ဟိုင်နန်၊ ကွမ်ရှီးတို့ရဲ့ အဓိက မြစ် ၁၃ စင်းဟာ မုန်တိုင်းကြောင့် စိုးရိမ်ရေမှတ်ထက် မြင့်တက်မယ်လို့ CCTV က သတိပေးထားပါတယ်။
Source: Reuters
