ရှမ်းပြည်နယ်မြောက်ပိုင်း၊ နမ္မတူမြို့မှာ ထိန်းသိမ်းခံခဲ့ရတဲ့ ကျောက်မဲမြို့က ၈၈ မျိုးဆက် ငြိမ်းချမ်းရေးနဲ့ ပွင့်လင်းလူ့အဖွဲ့အစည်းတာဝန်ခံ ဒေါ်ရီဆွေနဲ့ စစ်ကိုင်းတိုင်းက ပြည်သူ့ ကာကွယ်ရေးအဖွဲ့ (ပကဖ)ခေါင်းဆောင် ၆ ယောက်ကို TNLA တအာင်းတပ်က ဇွန် ၂၇ ရက် မနေ့က ပြန်လွှတ်ပေးခဲ့တယ်လို့ သိရပါတယ်။

နီးစပ်သူတယောက်က “ဒေါ်ရီဆွေရော၊ ပကဖ ၆ ယောက်ပါ ပြန်လွတ်လာပြီ။ အဘက်ဘက်က ကူညီပေးတဲ့သူတွေ အားလုံးကို ကျေးဇူးတင်ပါတယ်” လို့ ပြောပါတယ်။

ကျောက်မဲမြို့က ၈၈ မျိုးဆက် ငြိမ်းချမ်းရေးနဲ့ ပွင့်လင်းလူ့အဖွဲ့အစည်းတာဝန်ခံ ဒေါ်ရီဆွေ၊ ရွှေဘိုနယ်က ဦးငြိမ်းမောင်၊ ဦးချစ်သိန်း၊ ဦးကျော်စိုး၊ ဒီပဲရင်းနယ်က ကိုနေမျိုးချစ်နဲ့ ရွှေဘိုပကဖ ၂ ယောက်တို့ကို ကားပေါ်မှာ ပိုက်ဆံသိန်းရာနဲ့ချီ ပါလာတာကို မသင်္ကာလို့ဆိုပြီး ဇွန် ၁၇ ရက်နေ့မှာ TNLA တပ်ဖွဲ့က ဖမ်းဆီးခဲ့တာပါ။

နီးစပ်သူတယောက်က “တအာင်းရဲ့ မဟာမိတ်ဆက်ဆံရေးဌာနကို ပြေလည်အောင်ညှိနှိုင်းလိုက်လို့ အခုလိုပြန်လွှတ်လာတာပါ။ သက်ဆိုင်ရာ ပကဖရဲ့ ထောက်ခံတာလည်းပါတယ်။ ဒေါ်ရီဆွေအပါ အားလုံး ၇ ယောက်ပေါ့” လို့ ပြောပါတယ်။

ထိန်းသိမ်းထားတဲ့သူတွေကို လွှတ်ပေးတာနဲ့ပတ်သက်ပြီး TNLA ဘက်က ထုတ်ပြန်လာတာတော့ မရှိသေးပါဘူး။

လက်ရှိမှာ ရှမ်းပြည်နယ်မြောက်ပိုင်းက နောင်ချိုမြို့နယ်မှာ TNLA တအာင်းတပ်၊ DPLA ဓနုတပ်နဲ့ PDF တပ်တွေဟာ ထိုးစစ်ဆင်လာတဲ့ စစ်ကောင်စီတပ်တွေနဲ့ တိုက်ပွဲ အပြင်အထန်ဖြစ်ပွားနေပါတယ်။

ကျောက်မဲမြို့နဲ့ နမ္မတူမြို့ကို TNLA က ၁၀၂၇ စစ်ဆင်ရေးအတွင်းမှာ သိမ်းပိုက်ခဲ့ပြီး လက်ရှိ အုပ်ချုပ်ရေးယန္တရားတွေ တည်ဆောက်နေပြီး စစ်ကောင်စီကလည်း မကြာခဏ ဗုံးကြဲ တိုက်ခိုက်နေပါတယ်။