ဓနုပြည်သူ့လွတ်မြောက်ရေးတပ်တော် (DPLF/DPLA) ရဲ့ အပတ်စဉ် ၆ စစ်သင်တန်းဆင်းပွဲ အခမ်းအနားကို လွတ်မြောက်နယ်မြေတနေရာမှာ ပြီးခဲ့တဲ့ ဇွန် ၂၁ ရက်က ကျင်းပခဲ့တယ်လို့ ဓနုပြည်သူ့လွတ်မြောက်ရေးတပ်တော် တပ်ဖွဲ့ဝင်တွေဆီက သိရပါတယ်။

အဆိုပါစစ်သင်တန်းမှာ မိမိတို့ ဓနုဒေသအတွင်းရှိ ပြည်သူလူထုကို ကာကွယ်နိုင်ဖို့၊ ရန်သူကို အမြဲသတိထားတတ်‌စေဖို့နဲ့ တိုက်ခိုက်ရေးကျွမ်းကျင်မှု ရှိ‌‌စေဖို့တို့ကို အဓိကထားပြီး အချိန်ကာလ ၃ လကျော်ကြာ စစ်သင်တန်းပေးခဲ့တာလို့ ဆိုပါတယ်။

ဓနုအမျိုးသားတယောက်က “ကျနော်တို့ ဓနုတိုင်းရင်းသားတယောက် အနေနဲ့တော့ ဂုဏ်ယူရပါတယ်။ ဘာလို့လဲဆိုတော့ စစ်အာဏာရှင် အမြစ်​ပြတ်ဖို့ကို လက်မနှေးဘဲ တော်လှန်နေတာဖြစ်ပြီး ခု ၂၀၂၁ အာဏာသိမ်းပြီး နောက်မှာလည်း လက်နက်ကိုင်တော်လှန်လိုတဲ့ လူငယ်တွေက တက်တက်ကြွကြွ ပါဝင်နေတာတွေ တွေ့မြင်နေရတာမို့ ဓနုတိုင်းရင်းသားတယောက်အနေနဲ့ ဝမ်းမြောက်ရတယ်” လို့ ပြောပါတယ်။

အဆိုပါ စစ်သင်တန်းဆင်းပွဲ အခမ်းအနားမှာ ဓနုပြည်သူ့လွတ်မြောက်ရေးတပ်တော် (DPLF/DPLA) ဥက္ကဋ္ဌ ဦးထွန်းထွန်းနိုင်က မိမိတို့ ဓနု‌‌ဒေသအတွင်းရှိ ပြည်သူလူထုကို သစ္စာရှိရှိနဲ့ ကာကွယ်သွားကြဖို့၊ အမိန့်နာခံတတ်စေဖို့နဲ့ ဘယ်လိုအခြေအနေမှာပဲဖြစ်စေ စိတ်ဓာတ်မကျဘဲ စစ်အာဏာရှင်ကို တိုက်ထုတ်သွားကြဖို့ တက်ရောက်အမှာစကား ပြောကြားခဲ့တယ်လို့ ဆိုပါတယ်။

ဓနု ပြည်သူ့လွတ်မြောက်ရေးတပ်တော် (DPLA) တပ်ဖွဲ့ကို ၂၀၂၂ ခုနှစ် သြဂုတ် ၇ ရက်မှာ ဓနုလူငယ်တွေက စတင်ဖွဲ့စည်းခဲ့ကာ အမျိုးသမီး အမျိုးသားတွေပါ ဓနုပြည်သူ့လွတ်မြောက်ရေးတပ်ဖွဲ့မှာ တာဝန်ထမ်းဆောင်နေကြတာဖြစ်ပြီး အခြေခံစစ်ပညာသင်တန်းနဲ့ လက်နက်တပ်ဆင်ပွဲ အခမ်းအနားကို ဇွန် ၂၁ ရက်မှာ ပြုလုပ်ခဲ့တာဖြစ်ပေမဲ့ လုံခြုံရေးအရ ဇွန် ၂၄ ရက်မှာ ထုတ်ပြန်ကြေညာတာဖြစ်ကြောင်း ဓနုပြည်သူ့လွတ်မြောက်ရေးတပ်ဖွဲ့ဆီကနေ သိရပါတယ်။

ဓာတ်ပုံ ဓနုပြည်သူ့လွတ်မြောက်ရေးတပ် အပတ်စဥ်၆သင်တန်းဆင်းပွဲပုံ DPLA ပြန်ကြားရေးတာဝန်ခံ ဆီမှ တောင်းယူထားသည်။