မန္တလေးတိုင်း၊ မိုးကုတ်မြို့၊ ကိုးလံကျေးရွာရှိ နေအိမ်တအိမ်မှာ ဇွန် ၂၂ ရက် ညပိုင်းက လက်နက်ကိုင်ထားသူ လူ ၄ ယောက် ဝင်လာပြီး ဧည့်စာရင်းစစ်မယ်ဆိုကာ လည်ပင်းကို ဓားထောက်ပြီး ဓားပြတိုက်တာကြောင့် ငွေ ကျပ် ၇ သိန်းနဲ့ ပစ္စည်းတချို့ ပါသွားတယ်လို့ သိရပါတယ်။

ဖြစ်စဥ်သိရှိသူတယောက်က “ည ၉ နာရီဝန်းကျင်မှာ ဆိုင်ကယ် ၂ စီးနဲ့ လူ ၄ ယောက်လာတာ၊ ၂ ယောက်က ဆိုင်ကယ်ပေါ်မှာစောင့်နေပြီး ကျန် ၂ ယောက်က အိမ်ဝန်းကိုကျော်ဝင်ပြီး ဧည့်စာရင်းစစ်မယ်ဆိုပြီး ဝင်လာတယ်။ ဝင်လာပြီး သမီးဖြစ်သူ လည်ပင်းကို ဓားထောက်ပြီး အိမ်ထဲပစ္စည်းတွေ ရှာယူသွားတယ်။ အမေရဲ့နားကပ်ကိုလည်း ချွတ်ယူသွားတယ်” လို့ ပြောပါတယ်။

ဓားပြတိုက်သူတွေဆီမှာ အလျား ၂ ပေခန့်ရှိတဲ့ ဓား ၂ ချောင်းပါပြီး ငွေ ၇ သိန်း၊ နားကပ်တစုံ၊ ဖုန်း ၂ လုံးနဲ့ ဆိုင်ကယ်တစီး ပါသွားတယ်လို့ သိရပါတယ်။

ဓားပြတိုက်သူတွေက နေအိမ်အတွင်း ကားကိုလည်း သူတို့ပါလာတဲ့သော့နဲ့ ဖွင့်ပြီး ယူဖို့ကြိုးစားပေမဲ့ မရတာကြောင့် တခြားပစ္စည်းတွေကို ယူသွားခဲ့တယ်လို့ သိရပါတယ်။

မိုးကုတ်မြို့မှာ TNLA အယောင်ဆောင် ဓားပြတိုက်မှုတွေနဲ့ ပတ်သက်ပြီး TNLA ဘက်ကို ဆက်သွယ်မေးမြန်းရာမှာ ပြောရေးဆိုခွင့်ရှိသူ မလွေး​ယေဦးက “TNLA အယောင်ဆောင်ပြီး ဓားပြတိုက်တယ်၊ လူထုတွေကို လုယက်နေတယ် ဆိုရင် သူတို့ကို ကျမတို့ ဖမ်းဆီးအရေးယူသွားမှာပါ။ ပြီးခဲ့တဲ့ရက်တွေမှာ ဓားပြတိုက်တာ၊ လူတွေကိုလုယက်တာ ပြည်သူတွေကို ဒုက္ခပေးသူတွေကို ကျမတို့ အရေးယူနိုင်ခဲ့တာ ရှိပါတယ်” လို့ ပြောပါတယ်။

မိုးကုတ်မြို့ သဒွတ်လျိုကျေးရွာအုပ်စု တောင်တွန်းရွာမှာလည်း ဇွန် ၂၂ ရက် မနက်ပိုင်းက TNLA အ​ယောင်ဆောင်ထားသူ လက်နက်ကိုင်လူတစု ဓားပြတိုက်တာကြောင့် ငွေကျပ် ၁၀ သိန်းနဲ့ ရွှေလက်ဝတ်ရတနာတချို့ ပါသွားခဲ့ပါတယ်။