ရှမ်းပြည်နယ်မြောက်ပိုင်း မိုးမိတ်-မဘိမ်းလမ်းပေါ်မှာ စစ်အာဏာရှင်တပ်နဲ့ ကချင်လွတ်လပ်ရေးတပ်မတော် (KIA) တို့ တိုက်ပွဲဆက်ဖြစ်ပြီး မိုးမိတ်-တွင်းငယ်လမ်းကိုလည်း စစ်တပ်ဘက်က အင်အားထပ်တိုးလာနေတယ်လို့ စစ်ရေးသတင်းရင်းမြစ်ဆီက သိရပါတယ်။

အဲဒီလမ်းပေါ်က မြစ်ဆုံရွာနဲ့ ၇ မိုင်အနီးမှာ အောက်တိုဘာ ၇ ရက်ကစလို့ တိုက်ပွဲတွေဖြစ်လာပြီး ဒီနေ့အထိ ဆက်ဖြစ်နေသလို မိုးမိတ်-တွင်းငယ်လမ်းကိုတော့ စစ်တပ်ဘက်က စစ်အင်အားတိုးလာတယ်လို့ ဆိုပါတယ်။

စစ်ရေးသတင်းရင်းမြစ်က “လောလောဆယ်တော့ မိုးမိတ်-တွင်းငယ်လမ်းတကြောကိုတော့ စစ်တပ်ဘက်က အင်အားတိုးထားတဲ့ အခြေအနေပါ။ မိုးမိတ်-မဘိမ်းလမ်းမှာတော့ တိုက်ပွဲဖြစ်တယ်။ အဓိကတော့ စစ်တပ်က မြစ်ဆုံဘက်ကို ရောက်လာတယ်လို့ ပြောလို့ရတယ်။ လေကြောင်းတိုက်ခိုက်တာတော့ ငြိမ်နေတာ ၂ ရက်လောက်ရှိပြီ” လို့ DVB ကို ပြောပါတယ်။

စစ်အင်အားတိုးလာတဲ့ မိုးမိတ်-တွင်းငယ်လမ်းဟာ သပိတ်ကျင်းမြို့နယ်က တွင်းငယ်မြို့နဲ့ ရှမ်းပြည်နယ်မြောက်ပိုင်းက မိုးမိတ်မြို့ကို ဆက်သွယ်ထားတဲ့ အရေးပါတဲ့ ကုန်းလမ်းမကြီး ဖြစ်ပါတယ်။

မိုးမိတ်ကနေ မဘိမ်းဘက်ကိုသွားရင် မိုင် ၂၀ ဝန်းကျင်အကွာမှာ မြစ်ဆုံရွာရှိပြီး အဲဒီလမ်းရဲ့ ၇ မိုင်ရွာ(ကျောက်တောင်ရွာ)မှာပဲ တိုက်ပွဲဖြစ်နေတာဖြစ်ပါတယ်။

ပြီးခဲ့တဲ့ အောက်တိုဘာ ၉ ရက်ကလည်း မိုးမိတ်-တွင်းငယ်လမ်းမှာ တိုက်ပွဲ နှစ်ရက်ဆက်တိုက် ဖြစ်ခဲ့သလို ဆင်တဲကုန်းရွာကို ဗုံးကြဲတိုက်ခိုက်ခဲ့ပါတယ်။

အောက်တိုဘာ ၈ ရက်မှာလည်း မိုးမိတ်-တွင်းငယ်လမ်းပိုင်းက ဝဲဘောင်းကျေးရွာမှာ‌ KIA ပူးပေါင်းတပ်တွေနဲ့ စစ်တပ်တို့ တိုက်ပွဲဖြစ်ပွားခဲ့ပါသေးတယ်။

မိုးမိတ်မြို့ကို ဝင်နိုင်တဲ့လမ်းကြောင်းတွေဖြစ်တဲ့ မိုးမိတ်-မံတုံ၊ မိုးမိတ်-မိုးကုတ်၊ မိုးမိတ်-တွင်းငယ်၊ မိုးမိတ်-မဘိမ်း လမ်းကြောင်းတွေရှိသလို ရွှေလီမြစ်နဲ့ဆုံတဲ့နေရာကို မြစ်ဆုံရွာလို့ ခေါ်ဆိုတာ ဖြစ်ပါတယ်။