မန္တလေးတိုင်း၊ တောင်သာမြို့နယ်မှာ ပျူစောထီးအလောင်း ၁ လောင်းကို ဇွန် ၁၉ ရက်​နေ့က လက်နက်ခဲယမ်းတွေနဲ့အတူတွေ့ရှိခဲ့ပြီး ဇွန် ၁၇ ရက်နေ့ကလည်း စစ်ကောင်စီတပ်ဖွဲ့ဝင် ၁ ယောက်ကို အရှင်ဖမ်းမိခဲ့တယ်လို့ တောင်သာမြို့နယ်ပြည်သူ့ကာကွယ်ရေးအဖွဲ့ (တောင်သာမြို့နယ် ပကဖ) ဆီကနေ သိရပါတယ်။

တောင်သာမြို့နယ် ပကဖ ရဲ့ပြန်ကြားရေးတာဝန်ခံက “အရှင်ဖမ်းမိတဲ့သူက တပ်ကြပ်ကြီး အဆင့်ဖြစ်ပါတယ်။ တောင်သာနယ်ထဲကလမ်းပိုင်းတနေရာမှာ လုံခြုံရေးစစ်ဆေးနေချိန် ဖမ်းမိခဲ့တာပါ။ လက်နက်ခဲယမ်းတွေနဲ့ ပျူစောထီးအလောင်းတွေ့တာကတော့ ဒီမြို့နယ်ထဲမှာရှိတဲ့ ထနောင်းကုန်းရွာနားက လမ်းဘေးတနေရာမှာပါ” လို့ ပြောပါတယ်။

အရှင်ဖမ်းမိတဲ့ စစ်ကောင်စီတပ်ဖွဲ့ဝင် တပ်ကြပ်ကြီးအောင်ဖြိုး (ကပ-၈၃၀၂၁၁) ဆီကနေ မြန်မာ့စီးပွားရေးဘဏ်စာအုပ်၊ မှတ်ပုံတင်၊ ယာဉ်မောင်းလိုင်စင်၊ ရွှေလက်စွပ် ၁ ကွင်း တို့သိမ်းဆည်းရရှိခဲ့ပြီး ပျူစောထီးရဲ့ရုပ်အလောင်းနဲ့အတူ ကာဘိုင်သေနတ် ၁ လက်၊ ကျည်အတောင့် ၂၃၀၊ ကျည်ဘောက် ၂ ခုတို့ တွေ့ရှိခဲ့ရတယ်လို့ ဆိုပါတယ်။

တောင်သာမြို့နယ် ပကဖ ရဲ့ တာဝန်ခံ ကိုကြည်စတား က “အရှင်ဖမ်းမိတဲ့ တပ်ကြပ်ကြီးအောင်ဖြိုးက ကပစ ၂၂ ထဲက ထုတ်လုပ်ရေးပိုင်းမှာ တာဝန်ထမ်းဆောင်နေတဲ့သူပါ။ ပဲခူးတိုင်း၊ သာဂရဘက်ကနေ မကွေးတိုင်း၊ မြိုင်ဘက်က မြန်မာ့စီးပွားရေးဘဏ်မှာ အပ်ထားတဲ့သူ့ပိုက်ဆံတွေထုတ်ဖို့ ခွင့်ယူပြီး ထွက်လာတာဖြစ်တယ်။ ကျန်တာတွေကတော့ စစ်ဆေးနေဆဲပါ။ ပျူစောထီးအလောင်း တွေ့တာကတော့ ဒီလိုပါ။ ထနောင်းကုန်းရွာဆိုတာပျူစောထီးရွာပါ။ အဲဒီကကောင်တွေက ပတ်ချာလည်ရွာတွေကိုသွားပြီး ပစ္စည်းလုတာတွေ လုပ်​လေ့ရှိတယ်။ အဲဒီမှာ သူတို့အချင်းချင်း အဝေမတည့်လို့ သတ်ပြီး စွန့်ပစ်ထားခဲ့တယ်လို့ ယူဆရတယ်။ ဘာဖြစ်လို့လဲဆိုတော့ အလောင်းတွေတဲ့တဝိုက်မှာ တိုက်ပွဲဖြစ်ခဲ့တာမရှိဘူး။ အဲဒီပျူအလောင်းကလည်း ထနောင်းကုန်းရွာသားလို့တော့ စုံစမ်းလို့ရတယ်ဗျ။ အလောင်းကိုသင်္ဂြိုဟ်ပေးပြီးတော့ လက်နက်ခဲယမ်းတွေကိုတော့ သိမ်းလာခဲ့လိုက်တယ်” လို့ DVB ကို ပြောပါတယ်။

ပျူစောထီးရဲ့ရုပ်အလောင်းမှာ ညှဉ်းပန်းနှိပ်စက်ခံထားရ​တဲ့ အညိုအမဲစွဲဒဏ်ရာတွေအပြင် သေနတ်ဒဏ်ရာ​တွေလည်း တွေ့ရတယ်လို့ သူက ဆက်ပြောပါတယ်။

တောင်သာမြို့နယ်ထဲကို စစ်ကောင်စီတပ်ရဲ့ ထောက်ပို့တွေမရောက်ရှိစေရေးအတွက် တောင်သာမြို့နယ်အတွင်းမှာရှိတဲ့ မြို့နယ်ချင်းဆက်လမ်းပိုင်းတွေကို တောင်သာမြို့နယ် ပကဖ က အခုလအဆန်းပိုင်းကစလို့ ယာယီပိတ်ပင်ထားပြီး လမ်းပိုင်းလုံခြုံရေးတွေ တိုးမြှင့်လုပ်ဆောင်နေတာကြောင့် ပြည်သူတွေအနေနဲ့လည်း ပူးပေါင်းပါဝင်ပေးကြဖို့ တိုက်တွန်းထားတယ်လို့ တောင်သာမြို့နယ် ပကဖ ဆီကနေ သိရပါတယ်။