မကွေးတိုင်း၊ စလင်းမြို့နယ်ထဲက တိုက်နယ်ရဲစခန်းမှူးတယောက်ဟာ ဇွန် ၁၅ ရက်နေ့၊ ညနေပိုင်းမှာ လက်နက်မပါဘဲ အလင်းဝင်ရောက်လာတယ်လို့ စလင်းမြို့နယ် ပြည်သူ့ကာကွယ်ရေးအဖွဲ့ဆီကနေ သိရပါတယ်။

စလင်း ပကဖ ရဲ့ သတင်းနဲ့ပြန်ကြားရေးတာဝန်ခံ ကိုအောင်ဆန်း က “ကျနော်တို့ဆီကို အလင်းဝင်လာတဲ့သူက စလင်းမြို့နယ်ထဲမှာရှိတဲ့ တညောင်တိုက်နယ်ရဲစခန်းက စခန်းမှူးဖြစ်ပါတယ်။ သူ အလင်းဝင်လာတာက လက်နက်ခဲယမ်းတွေ ဘာတွေတော့ ပါမလာခဲ့ပါဘူး” လို့ ပြောပါတယ်။

အလင်းဝင်ရောက်လာတဲ့ စခန်းမှူးဟာ တညောင်တိုက်နယ်ရဲစခန်းကို အခု ဇွန်လဆန်းပိုင်းမှာ ပြောင်းရွှေ့တာဝန်ထမ်းဆောင်လာတာလို့ ဆိုပါတယ်။

စလင်း ပကဖ တာဝန်ခံ အမ်ဖိုး က “သူ့အဆင့်ကတော့ ဒုရဲမှူးအဆင့်ဖြစ်ပါတယ်။ တညောင်တိုက်နယ်ရဲစခန်းကို မရောက်ခင်က စလင်းမြို့နယ်ရဲမှူးရုံးမှာ ဒုမြို့နယ်ရဲမှူးရာထူးနဲ့ ၂ နှစ်လောက်နေခဲ့သေးတယ်။ စစ်တပ်ရဲ့အောက်မှာ ဥပဒေကို လုပ်ချင်သလိုလုပ်ပြီးတော့ လက်အောက်ငယ်သားတွေကို မဟုတ်တာတွေ မတရားခိုင်းစေနေလို့ အလင်းဝင်ဖို့ကို ကြိုတင်စီစဥ်ပြီးတော့မှ အခက်အခဲတွေကြားထဲကနေ အလင်းဝင်လာပြီး ကျနော်တို့နဲ့အတူပူးပေါင်းလာတာပါဗျ” လို့ DVB ကို ပြောပါတယ်။

အလင်းဝင်ရောက်လာတဲ့ တညောင်တိုက်နယ်ရဲစခန်းမှူးကို စလင်း ပကဖ က ကောင်းမွန်စွာ စောင့်ရှောက်ပေးထားပြီး စစ်ကောင်စီလက်အောက်မှာ ကျန်ရစ်နေကြသူတွေကိုလည်း ဆက်လက်ပြီး အလင်းဝင်ရောက်လာကြဖို့ ဖိတ်ခေါ်ထားပါတယ်။

စလင်းမြို့နယ်မှာ စစ်ကောင်စီတပ်နဲ့ ပြည်သူ့ကာကွယ်ရေးတပ်တို့ တိုက်ပွဲဖြစ်ပွားတာတွေရှိနေပြီး နယ်မြေတချို့မှာလည်း စစ်ရေးအခြေအနေတင်းမာနေတယ်လို့ စလင်း ပကဖ ဆီကနေ သိရပါတယ်။

ဒါ့အပြင် စစ်ကောင်စီတပ်က စလင်းမြို့နယ်ထဲ မကြာခဏစစ်ကြောင်းထိုးဝင်ရောက်ပြီး ပြည်သူပိုင်ပစ္စည်းတွေကို ခိုးယူသယ်ဆောင်ကာ လူနေအိမ်တွေကိုလည်း မီးရှို့ဖျက်ဆီးနေတဲ့အတွက် ဒေသခံတွ ထွက်ပြေးနေကြရတယ်လို့ သိရပါတယ်။