အာဂျင်တီးနားနိုင်ငံရဲ့ တရားရုံးချုပ်ဟာ အကျင့်ပျက်ခြစားမှုကိစ္စနဲ့ ပတ်သက်လို့ ဆုံးဖြတ်ရတော့မယ့်အချိန်မှာ သမ္မတဟောင်း ခရစ္စတီးနား ဖာနန်ဒက်ဇ် ဒေကစ်ရှ်နေက သူ့ကိုယ်သူ သက်ရှိအာဇာနည်လို့ ရည်ညွှန်းရင်း “အကျဉ်းချခံရခြင်းဟာ ဂုဏ်သိက္ခာရဲ့ အမှတ်တံဆိပ်ပဲ” လို့ ဇွန် ၉ ရက်က ကြေညာခဲ့ပါတယ်။
ခေါင်းဆောင်ဟောင်း ဖာနန်ဒက်ဇ်ဟာ မိတ်ဆွေတယောက်ကို နိုင်ငံပိုင်စာချုပ်တွေ မျှဝေပေးခဲ့တယ်လို့ စွပ်စွဲခံထားရပါတယ်။ ဖာနန်ဒက်ဇ်က ဘာအမှားအယွင်းမှ မရှိဘူးလို့ ငြင်းဆိုထားပါတယ်။
ပြီးခဲ့တဲ့နှစ်မှာ တရားရုံးတရုံးက ထောင်ဒဏ် ၆ နှစ်နဲ့ ဌာနဆိုင်ရာရာထူးကို တသက်တာလုံး မထမ်းဆောင်ဖို့ တားမြစ်နိုင်တဲ့ အမှုကို စွဲဆိုခဲ့တာပါ။
ခုတော့ နိုင်ငံရဲ့ အမြင့်ဆုံးတရားရုံးက ထောင်ဒဏ် ၆ နှစ် ချမှတ်ဖို့ အတည်ပြုမလား၊ အမှုကို ရုပ်သိမ်းမလား ဆိုတာ ဆုံးဖြတ်ရမှာ ဖြစ်ပါတယ်။
တရားရုံးက စီရင်ချက်မချမီ တနင်္ဂနွေနေ့မှာ ဖာနန်ဒက်ဇ်က အမျိုးသားတရားမျှတရေးပါတီ ဌာနချုပ်မှာ ခေါင်းဆောင်တွေနဲ့ ထောက်ခံသူတွေကို မိန့်ခွန်းပြောခဲ့ပါတယ်။
တရားရုံးက သူ့ရဲ့ ခုခံချေပမှု တိုင်ကြားချက်ကို စဉ်းစားမလားဆိုတာ မဆုံးဖြတ်ရသေးတာကြောင့် အခုအချိန်အထိ ထောင်မချသေးပါဘူး။
ဖာနန်ဒက်ဇ်ရဲ့ တိုင်ကြားချက်ကို တရားရုံးက ငြင်းခဲ့ရင် သမ္မတဟောင်းဟာ အသက် ၇၀ ကျော်နေပြီဖြစ်လို့ နေအိမ်အကျယ်ချုပ်ထားဖို့ တောင်းဆိုနိုင်ပါတယ်။
ဖာနန်ဒက်ဇ်ဟာ ၂၀၀၇ ခုနှစ်ကနေ ၂၀၁၅ ခုနှစ်အထိ သမ္မတအဖြစ် သက်တမ်း ၂ ကြိမ်ဆက်တိုက် တာဝန်ထမ်းဆောင်ခဲ့ပြီး ၂၀၁၉ ခုနှစ်ကနေ ၂၀၂၃ ခုနှစ်အထိ ဒုတိယသမ္မတအဖြစ် ထမ်းဆောင်ခဲ့သူပါ။
တရားရေးဆိုင်ရာ စိန်ခေါ်မှုတွေ များလာခဲ့လို့ မကြာသေးမီနှစ်တွေအတွင်း လူကြိုက်များမှု ဆုံးရှုံးသွားခဲ့ပါတယ်။
Source: Reuters
