ပါကစ္စတန်နိုင်ငံရဲ့ အကြီးဆုံးမြို့တော် ကရာချိရှိ မလီရ်အကျဉ်းထောင်မှာ ဇွန် ၂ ရက် ညနေက  မြေငလျင်လှုပ်ခတ်မှုကြောင့် ထောင်နဲ့ချီတဲ့ အကျဉ်းသားတွေကို ဘေးလွတ်ရာ ရွှေ့ပြောင်းခဲ့ချိန်မှာ အတော်များများ ထွက်ပြေးလွတ်မြောက်သွားကြတယ်လို့ ပြည်နယ်ဥပဒေရေးရာဝန်ကြီး ဇီယာအူလ်ဟက်ဆန်လန်ဂျာက ဇွန် ၃ ရက်မှာ ပြောပါတယ်

ငလျင်လှုပ်ချိန်တုန်းက အကျဉ်းသားတွေကို အိပ်ဆောင်တွေကနေ ယာယီထုတ်ပေးခဲ့ချိန်မှာ တချို့အကျဉ်းသားတွေက လုံခြုံရေးဝန်ထမ်းတွေကို တိုက်ခိုက်ပြီး လက်နက်တွေ သိမ်းယူကာ ထောင်မှထွက်ပြေးသွားကြတာလို့ ဆိုပါတယ်။ 

လွတ်မြောက်သွားတဲ့ အကျဉ်းသား ဒါဇင်များစွာကို အမြန်ပြန်ဖမ်းမိခဲ့ကြောင်း ရဲတပ်ဖွဲ့က ပြောကြားခဲ့ပြီး အနည်းဆုံး လူ ၁၃၀ ရဲ့ စာရင်းမရသေးဘူးလို့ ဆိုပါတယ်။ လွတ်မြောက်နေသေးသူတွေကို ဖမ်းမိဖို့ အာဏာပိုင်တွေ ဆက်လက် စီးနင်းရှာဖွေမှုတွေ လုပ်ဆောင်နေပါတယ်။

မလီရ်အကျဉ်းထောင်ကနေ ညဘက် ထွက်ပြေးခဲ့တဲ့ အကျဉ်းသား ၂၁၆ ယောက်ထဲက ၇၈ ယောက်ကို ပြန်ဖမ်းမိထားတယ်လို့ အကြီးတန်းရဲအရာရှိ ကာရှိဖှ်အက်ဘာစီက AP သတင်းကို ပြောပါတယ်။

ထွက်ပြေးလွတ်မြောက်သွားတဲ့ အကျဉ်းသားတွေထဲမှာ တယောက်မှ ပြစ်ဒဏ်ကျ  တိုက်ခိုက်ရေးသမားတွေ မပါကြဘူးလို့လည်း ဆိုပါတယ်။

လွတ်မြောက်လာသူတွေထဲက တယောက်ကို အချုပ်ထဲ ပြန်ပို့ဖို့ ကြိုးပမ်းနေချိန်မှာ ပစ်ခတ်မှုကြောင့် အကျဉ်းသားတယောက် သေဆုံးပြီး လုံခြုံရေးအရာရှိ ၃ ယောက် ဒဏ်ရာရခဲ့ပါတယ်။ 

ဒေရာအစ္စမိုင်ခန်မြို့ရှိ ပါကစ္စတန် တာလီဘန်တွေရဲ့ အကျဉ်းထောင် တိုက်ခိုက်ခံရပြီးကတည်းက လုံခြုံရေးအစီအမံတွေ တိုးမြှင့်လုပ်ဆောင်ထားတဲ့ ပါကစ္စတန် အကျဉ်းထောင်တွေကနေ လွတ်မြောက်သွားမှုတွေဟာ သာမန်မဟုတ်ဘဲ ရာနဲ့ချီတဲ့ အကျဉ်းသားတွေ လွတ်သွားခဲ့တာ ဖြစ်ပါတယ်။

အခု ထောင်ဖောက်ပြေးမှုဟာ ပါကစ္စတန်မှာ အကြီးမားဆုံး ထောင်ဖောက်မှု တခုဖြစ်တယ်လို့ လန်ဂျာက ပြောပြီး ဒါဟာ သဘာဝဘေးအန္တရာယ်ကြောင့် ဖြစ်ပွားခဲ့တဲ့ ထောင်ဖောက်ပြေးမှုလို့လည်း ဆိုပါတယ်။ 

Source: AP/ Al Jazeera