TNLA ထိန်းချုပ်ထားတဲ့ နောင်ချိုမြို့ကို ပြန်ရဖို့အတွက် စစ်ကောင်စီတပ်က စစ်ကြောင်း ၂ ကြောင်းနဲ့ ထိုးစစ်ဆင်နေတာမှာ စစ်ကြောင်းတကြောင်းက လက်ရှိမှာ ရွှေမုဌောကို ကျော်သွားပြီဖြစ်တယ်လို့ သတင်းရင်းမြစ်တွေကပြောပါတယ်။
ဇွန် ၂ ရက်မှာ စစ်ကောင်စီတပ်နဲ့ တအာင်းအမျိုးသားလွတ်မြောက်ရေးတပ်မတော် (TNLA) တပ်တွေအကြား တိုက်ပွဲက ပြင်းပြင်းထန်ထန်ဖြစ်တာမရှိပေမဲ့ ပစ်ခတ်မှုတချို့ကတော့ ရှိနေတယ်လို့ ဒေသခံတယောက်က ပြောပါတယ်။
"နေ့လယ်အထိတော့ တိုက်ပွဲက ပြင်းပြင်းထန်ထန်မရှိဘူး။ ပစ်ခတ်သံတချို့တော့ ကြားရတာတော့ရှိပါတယ်။ သူတို့ ရွှေမုဌောကိုတော့ ကျော်ပြီ။”
ရွှေမုဌောကျေးရွာကို ကျော်ရင်တော့ ကံကြီးကို ရောက်မှာဖြစ်ပြီး အဲဒီမှာတော့ TNLAရော ဓနုတပ်တွေပါရှိနေတာကြောင့် တော်လှန်ရေးအင်အားစုတွေဘက်က အင်အားများတယ်လို့ ကံကြီးကို ကျော်နိုင်ဖို့ မလွယ်ဘူးလို့ စစ်ရေးလေ့လာသူ CDM ဗိုလ်ကြီးဇင်ယော်က ပြောပါတယ်။
စစ်ကောင်စီတရပ်ရဲ့ စစ်ကြောင်းနောက်တကြောင်းးကတော့ နောင်လင်ဘက်ကနေ နောင်ချိုကို ဉီးတည်နေတာပါ။
ဒီစစ်ကြောင်း ၂ ကြောင်းက နောင်ချိုမရောက်ခင် ဂုတ်ထိပ်အနီးမှာ ဆုံပြီး နောင်ချိုကို ဝင်နိုင်ဖို့ ကြိုးစားနေတာလို့ ကိုဇင်ယော်ကပြောပါတယ်။ ဒါပေမဲ့ ကံကြီးဘက်ကို တက်လာတဲ့ စစ်ကြောင်းကတော့ ရှေ့ဆက်နိုင်ဖို့ မလွယ်ဘူးလို့လည်း ဆိုပါတယ်။
စစ်ကောင်စီနဲ့ TNLA တို့ တရုတ်နိုင်ငံမှာ တွေ့ဆုံခဲ့ပြီး စစ်ကောင်စီဘက်က နယ်မြေပြန်တောင်းခဲ့ပေမဲ့ TNLA ဘက်က လက်မခံခဲ့ပါဘူး။
အဲဒီနောက် စစ်ကောင်စီဘက်က အင်အားအလုံးအရင်းနဲ့ နောင်ချိုကို ထိုးစစ်ဆင်နေတာဖြစ်ပါတယ်။ တဖက်မှာလည်း စစ်ကောင်စီတပ်နဲ့ MNDAA ကိုးကန့်တပ်တို့ အကြား အပစ်ရပ်ထားတာကြောင့် ရှမ်းမြောက်စစ်မျက်နှာမှာ TNLA တခုကိုပဲ စစ်ကောင်စီဘက်က ဉီးတည်တိုက်ခိုက်နိုင်နေတာပါ။
ဒီရက်ပိုင်းအတွင်းတော့ TNLA ထိန်းချုပ်ဒေသမှာ စစ်ကောင်စီဘက်က လေကြောင်းတိုက်ခိုက်မှု လျော့နည်းလာတာကိုတော့ တွေ့ရတယ်လို့ စစ်ရေးလေ့လာသူတွေကပြောပါတယ်။
ထက်အောင်
