ထိုင်း-မြန်မာနယ်စပ်၊ တနင်္သာရီမြို့နယ်၊ သိန်ခွန်းတိုက်ပွဲမှာ ဧပြီလနဲ့ မေလအတွင်း စစ်ကောင်စီဘက်က ၁၄ ယောက် ဘက်ပြောင်းခိုလှုံလာတယ်လို့ တနင်္သာရီ PDF တပ်ရင်း ၃ ပြန်ကြားရေးတာဝန်ခံက ပြောပါတယ်။

၁၂ ယောက်က KNLA တပ်ရင်း ၁၁၊ ၁ ယောက်က PDF တပ်ရင်း ၂ နဲ့ နောက် ၁ ယောက်က PDF တပ်ရင်း ၃ ဆီကို ဘက်ပြောင်းခိုလှုံလာကြပြီး အများစုကတော့ စစ်ကောင်စီရဲ့ စစ်မှုထမ်းဥပဒေအရ စုဆောင်းထားတဲ့ တပ်သားသစ်တွေ ဖြစ်တယ်လို့ တနင်္သာရီ PDF တပ်ရင်း ၃ ပြန်ကြားရေးတာဝန်ခံက ပြောပါတယ်။

“အဓိက ကတော့ သူတို့ဘက်က တိုက်ပွဲဖြစ်တိုင်း အကျအဆုံးများတာရယ်၊ စစ်ရေးအရ အခြေအနေ မဟန်တာကို သိတာကြောင့် ဘက်ပြောင်းခိုလှုံလာကြတာပါ။”

သိန်ခွန်းကျေးရွာတိုက်ပွဲအတွင်း ထွက်ပြေးလာတဲ့ စစ်ကောင်စီစစ်ကြောင်း ၁၀၃ တပ်ရင်းမှူး ၁ ယောက်နဲ့ ရဲတပ်ဖွဲ့ဝင် ၁ ယောက် ကိုလည်း ပုလော PDF တပ်ရင်း ၁ နဲ့ တနင်္သာရီ PDF တပ်ရင်း ၂ တို့က ဖမ်းဆီးခဲ့တယ်လို့ တော်လှန်ရေးတပ်ဖွဲ့တွေဆီက သိရပါသေးတယ်။

ထိုင်း-မြန်မာနယ်စပ် မောတောင်လမ်းပိုင်းက သိန်ခွန်းရွာတိုက်ပွဲမှာ ၅ လတာကာလအတွင်း တိုက်ပွဲပေါင်း ၁၀၀ ကျော်လောက်ဖြစ်ခဲ့ပြီး PDF၊ KNLA၊ KTLA နဲ့ ပကဖတို့ ပူးပေါင်းတိုက်ခိုက်နေတယ်လို့ တိုက်ပွဲဝင်ရဲဘော်တွေဆီက သိရပါတယ်။

တနင်္သာရီမြို့နယ်မှာ တိုက်ပွဲပြင်းထန်နေတာကြောင့် ဒေသခံတွေအနေနဲ့ ခရီးသွားလာရာမှာ စစ်ကောင်စီ ယာဉ်တန်းနောက် ကပ်မလိုက်ဖို့နဲ့ သတိရှိရှိသွားလာနေထိုင်ကြဖို့ တော်လှန်ရေးတပ်ဖွဲ့တွေက အသိပေးထုတ်ပြန်ထားပါတယ်။