DVB

ဧရာဝတီတိုင်း မြို့နယ် ၂ ခုကနေ စစ်ကောင်စီတပ်ရဲ့ မတရားပေါ်တာဆွဲခံရပြီး စစ်မှုထမ်းနေရသူ ၂ ယောက်ဟာ လက်နက်ခဲယမ်းတွေနဲ့အတူ မေ ၁၉ ရက်မှာ အလင်းဝင်ရောက်လာတယ်လို့ ပဲခူးတိုင်း၊ သာယာဝတီခရိုင် အမှတ် ၁ တပ်ရင်း ၃၈၀၁ က မေ ၂၃ ရက် ဒီကနေ့မှာ သတင်းထုတ်ပြန်ပါတယ်။

P 23801 ရဲ့ ပြန်ကြားရေးတာဝန်ခံက “သူတို့ ၂ ယောက်က နတ်တလင်းမြို့နယ်မှာရှိတဲ့ ပျဉ်ပုံရွာဘက်မှာ စစ်ကြောင်းထိုးနေတဲ့ စစ်ကြောင်းထဲကနေ လက်နက်ခဲယမ်းတွေယူပြီး ထွက်ပြေးလာခဲ့ကြတာပါ။ သူတို့ဇာတိတွေကတော့ ဧရာဝတီတိုင်းထဲက ရေကြည်နဲ့ ကျုံပျော်မြို့နယ်တွေကလို့ သိရပါတယ်” လို့ ပြောပါတယ်။

စစ်ကောင်စီ တပ်သား နိုင်ဝေလင်းနဲ့ တပ်သား ရာဇာမင်း တို့ဟာ MA1 သေနတ် ၂ လက်၊ လက်ပစ်ဗုံး ၁ လုံး၊ စကားပြောစက် ၁ လုံး၊ ကျည်ဘောက် ၆ ခုတို့အပြင် ခဲယမ်းတချို့နဲ့အတူ အလင်းဝင်ရောက်လာခဲ့ကြတာလို့ ဆိုပါတယ်။

၃၈၀၁ တပ်ရင်းရဲ့ တပ်ရင်းမှူး ဗိုလ်မိုးကြိုးက “သူတို့ တပ်ထဲမှာနေရတုန်းက ကင်းစောင့်ရတာနဲ့ တပ်တွင်း သက်သာချောင်ချိရေး အလုပ်တွေပဲ လုပ်ရတယ်။ ရှေ့တန်းစစ်ကြောင်းထွက်လာရတော့ အထက်လူကြီးတွေကနေ ပြည်သူပိုင်အိမ်တွေကို မီးရှို့ဖျက်ဆီးခိုင်းတာတွေနဲ့ ပြည်သူတွေကို အပြစ်မရှိဘဲ ဖမ်းဆီး နှိပ်စက်ခိုင်းတဲ့အလုပ် ဖိအားပေးပြီး အတင်းလုပ်ခိုင်းလို့ ထွက်ပြေးလာခဲ့ကြတာပါ။ သူတို့ဖြစ်ချင်တာက လွတ်မြောက်နယ်မြေကို သွားချင်ကြတာ မဟုတ်ဘူး။ ကျနော်တို့ တော်လှန်ရေးတပ်ဖွဲ့တွေနဲ့ ပေါင်းပြီး စစ်တပ်ကို ပြန်တိုက်သွားကြမယ့်သူတွေ ဖြစ်တယ်” လို့ DVB ကို ပြောပါတယ်။

ပဲခူးတိုင်းအတွင်းက ပြည်သူ့ကာကွယ်ရေးတပ်ဖွဲ့တွေဟာ စစ်ရေးအရှိန်မြှင့်တင်ပြီး စစ်ကောင်စီ တပ်စခန်းတွေကို ဆက်တိုက် တိုက်ခိုက်သိမ်းပိုက်နေတာဖြစ်လို့ စစ်ကောင်စီတပ် လက်အောက်မှာ ကျန်ရှိနေကြတဲ့ စစ်ကောင်စီတပ်ဖွဲ့ဝင်တွေ အနေနဲ့ နီးစပ်တဲ့ တော်လှန်ရေးတပ်ဖွဲ့တွေဆီမှာ အမြန်ဆုံး အလင်း၀င်ရောက်ကြဖို့ တိုက်တွန်းထားတယ်လို့လည်း ပဲခူးတိုင်းအခြေစိုက် တော်လှန်ရေးတပ်ဖွဲ့ဝင်တွေဆီကနေ သိရပါတယ်။