တနင်္သာရီမြို့နယ်ကို စစ်ကြောင်းထိုးလာတဲ့စစ်ကောင်စီတပ်တွေကို တော်လှန်‌ရေးပူးပေါင်းတပ်ဖွဲ့တွေ မိုင်းဆွဲကာ ဒရုန်းတွေနဲ့ ကြားဖြတ်တိုက်ခိုက်ခဲ့ပြီး စစ်ကောင်စီတပ်ဖွဲ့ဝင်တွေ ထိခိုက်သေဆုံးသူတွေ ရှိတယ်လို့ တော်လှန်ရေးတပ်ဖွဲ့ဝင်တွေက ပြောပါတယ်။

မေ ၂၂ ရက် မနက် ၉ နာရီမှာ  မြိတ်ကနေ တက်လာတဲ့စစ်ကောင်စီတပ်က ကား ၃ စီးကို ကမ်းတိုကျေးရွာအနီးမှာ တနင်္သာရီမြို့နယ်ပကဖအဖွဲ့ကနေ မိုင်းဆွဲတိုက်ခိုက်၊ ပစ်ခတ်ခဲ့တယ်လို့  တနင်္သာရီရိုးမအဖွဲ့ရဲ့ပြန်ကြားရေးတာဝန်ခံက ပြောပါတယ်။

“ကား ၃ စီးမှာတော့ တစီးကို  အင်အား ၁၀ ယောက်လောက်ရှိတယ်။ ရိက္ခာကားကို လိုက်ပို့တာလောက်ပဲရှိတယ်။ ရိက္ခာတွေကို ၃၀၆ တပ်နဲ့ ၅၅၇ တပ်မှာထားခဲ့တယ်။ ပြီးတော့ မြိတ်ကို ပြန်ဆင်းသွားတယ်။ ပြန်အဆင်းမှာလည်းကျနော်တို့ ပစ်ခတ်မှုလုပ်သေးတယ်။ ထိခိုက်မှုတော့မ သိရသေးဘူး။”

မေ ၂၀ ရက် မနက် ၆ နာရီကလည်း  ဇဝဲအခြေစိုက် ခမရ ၅၅၆ တပ်ရင်းကနေ အင်အား ၁၀၀ ဝန်းကျင်နဲ့ စစ်ကောင်စီစစ်ကြောင်းကို  ရမ်းဖိုကျေးရွာအရောက်မှာ မိုင်းဆွဲတိုက်ခိုက်ခဲ့သလို မနက် ၉ နာရီမှာလည်း ရမ်းဖိုကနေ ကမ်းတိုကျေးရွာကို တောလမ်းကစစ်ကြောင်းထိုးလာစဥ် ထပ်မံ ကြားဖြတ်တိုက်ခိုက်ခဲ့ပြီး ထိခိုက်သေဆုံးသူတွေရှိတယ်လို့  တော်လှန်ရေးတပ်ဖွဲ့ဝင်က ပြောပါတယ်။

“ထိခိုက်သူနဲ့ သေတဲ့သူတွေကို ညနေ ၆ နာရီခွဲမှာ လူနာတင်ယာဥ်တစီးနဲ့ အရပ်သားကား ၂ စီးက ဇဝဲဘက်ကနေ တက်လာပြီးသယ်ယူတယ်၊ မြိတ်ကိုဆင်းသွားတယ်။

ဒီတိုက်ခိုက်မှု ၂ ကြိမ်စလုံးကို KNLAတပ်ရင်း ၁၁ နဲ့ ဗိုလ်ခရင်းတပ်ဖွဲတို့ ကနေ ပူးပေါင်းလုပ်ဆောင်ခဲ့တာဖြစ်ပြီး စစ်ကောင်စီတပ်ဖွဲ့ဝင်တွေထိခိုက်သေဆုံးမှုကို အတည်မပြုနိုင်သေး ပါဘူး။

မေ ၂၀ ရက်ကလည်း ဘန်းလမွတ်ကျေးရွာကို စစ်ကြောင်းထိုး ရောက်ရှိနေတဲ့ စစ်ကောင်စီတပ်သားတွေကို ဒရုန်းနဲ့ဗုံးသီးနဲ့ ၂ ကြိမ်တိုက်ခိုက်ခဲ့ကာ စစ်ကောင်စီတပ်ဖွဲ့ဝင် တယောက် သေဆုံးခဲ့တယ်လို့ တောပုံးကြီးအဖွဲ့ပြန်ကြားရေးတာဝန်ခံက ပြောပါတယ်။

လက်ရှိမှာတော့ ခမရ ၅၅၆ တပ်ရင်းကထွက်လာတဲ့လမ်းကင်းတွေနဲ့ ၃၀၆ အမြောက်တပ်ကထွက်လာတဲ့အင်အား ၅၀ လောက်ကလည်း ဘန်းလမွတ်၊ ပနပ်၊ ရမ်းဖိုနဲ့ ကမ်းတိုကျေးရွာတို့မှာ လမ်းကင်းချနေရာယူထားကြပြီး ပြန်မရုပ် သိမ်းသေးဘူးလို့ ‌တော်လှန်ရေးတပ်ဖွဲ့တွေက ပြောပါတယ်။