မန္တလေးတိုင်း၊ ကျောက်ပန်းတောင်းမြို့နယ်ထဲကို စစ်ကောင်စီတပ်က မေ ၁၄ ရက်မှာ လေကြောင်းတိုက်ခိုက်မှု ၂ ကြိမ်ပြုလုပ်ခဲ့လို့ မီးနေသည်အပါအဝင် အရပ်သားပြည်သူ ၄ ယောက်သေဆုံးကာ လသားအရွယ်ကလေးငယ် ဒဏ်ရာရခဲ့သလို လူနေအိမ်လည်း ပျက်စီးသွားတယ်လို့ ဒေသခံတွေဆီကနေ သိရပါတယ်။
ပုပ္ပါးပြောက်ကျားတပ် (PPGF) ဒုတာဝန်ခံ ကိုဗျတ္တက “လေးပင်တောင်ရွာရဲ့ တောင်ပိုင်းကို ဗုံးကြဲခံခဲ့ရတာပါဗျ။ မနက် ၉ နာရီကျော်လောက်မှာ ၂ လုံး တကြိမ်နဲ့ နေ့လယ် ၂ နာရီလောက်မှာ ၂ လုံး တကြိမ် ပေါင် ၂၅၀ ဗုံး စုစုပေါင်း ၄ လုံးပါ။ ၂ လုံးကရွာထဲကျပြီးတော့ ကျန်တဲ့ ၂ လုံးက ရွာ့ပြင်ကချောင်းထဲကျပါတယ်။ တလုံးက ကိုဝင်းထွေးတို့ အိမ်ပေါ်တည့်တည့်ကျတာ။ ကလေးမွေးပြီးတာမကြာသေးတဲ့ မီးနေသည် တယောက်အပါအဝင်ပေါ့ ၄ ယောက်ဆုံးပါတယ်။ ဒဏ်ရာရတဲ့သူက ၂ ယောက်ပါ။ ပြင်းထန်ဒဏ်ရာရတဲ့သူ တယောက်ပါတယ်။ စိုးရိမ်ရပါတယ်” လို့ ပြောပါတယ်။
ဗုံးကြဲတိုက်ခိုက်မှုကြောင့်သေဆုံးသွားရသူတွေဟာ အသက် ၃၁ နှစ်အရွယ် ကိုဝင်းထွေးနဲ့ သူ့ရဲ့ဇနီး မီးနေသည် မဝင်းသူဇာ၊ အသက် ၄၇ နှစ်အရွယ် ဒေါ်မြင့်မြင့်ဝေနဲ့ အသက် ၇၀ နှစ်အရွယ် ဒေါ်ဝင်းကြည်တို့ဖြစ်ကြပြီး တလသားကလေးငယ်ကတော့ ဒဏ်ရာအနည်းငယ်သာရရှိကာ မစိုးရိမ်ရဘူးလို့ သူက ဆက်ပြောပါတယ်။
လေကြောင်းတိုက်ခိုက်ခံရမှုအတွင်း လူနေအိမ်တွေနဲ့ နွားတင်းကုတ်တွေအပါအဝင် အဆောက်အအုံ ၆ လုံးပျက်စီးသွားပြီး နွား ၂ ကောင်ပါ သေဆုံးသွားပါတယ်။
ကျောက်ပန်းတောင်းမြို့နယ် ပြည်သူ့ကာကွယ်ရေးတပ်ဖွဲ့တာဝန်ခံကိုရိုးက “လေးပင်တောင်ရွာက လူဦးရေ ၇၀၀ နီးနီးရှိတယ်။ အိမ်ခြေက ၃၀၀ ဝန်းကျင်လောက်ပေါ့ဗျာ။ တိုက်ပွဲဖြစ်တာမရှိသလို PDF စခန်းလည်း မရှိဘူး။ PDF ရဲဘော်တွေလည်း အခြေချနေထိုင်ကြတာမရှိပါဘူး။ စစ်တပ်ကကြဲချင်လို့ကြဲတယ်ဆိုတဲ့သဘောမျိုးနဲ့ကိုလုပ်သွားပြီး ပြည်သူကို သတ်ဖြတ်တာပါ”လို့ ပြောပါတယ်။
ဗုံးကြဲခံရတဲ့ အဆိုပါကျေးရွာကဒေသခံတွေကတော့ နောက်တကြိမ်ဗုံးလာကြဲမှာကို စိုးရိမ်ကြတဲ့ အတွက် ရွာလုံးကျွတ်နီးပါး ဘေးလွတ်ရာနေရာတွေကို ပြောင်းရွှေ့နေကြရပါတယ်။
စစ်ကောင်စီတပ်ဟာ ငလျင်ဘေးကြောင့် အခုမေလကုန်အထိ အပစ်အခတ်ရပ်စဲတယ်လို့ ကြေညာထားပေမဲ့ နေ့စဥ်နဲ့အမျှလေကြောင်း တိုက်ခိုက်မှုတွေ ဆက်တိုက်ပြုလုပ်နေတာလည်း ဖြစ်ပါတယ်။
