စစ်ကိုင်းတိုင်း၊ ချောင်းဦးမြို့နယ်မှာ မေ ၇ ရက်နေ့က စစ်ကောင်စီတပ်ဖွဲ့ဝင်တွေရဲ့ ချောင်းမြောင်းပစ်ခတ်ခံရလို့ PDF ရဲဘော် ၁ ယောက် ကျဆုံးခဲ့ရတယ်လို့ သိရပါတယ်။

ချောင်းဦးမြို့နယ်အခြေစိုက် ပကဖ တာဝန်ရှိသူတယောက်က “အဲဒီရဲဘော်လေးက လုံခြုံရေးတာဝန်ဆောင်ဖို့ တာဝန်ကျတဲ့နေရာသွားတဲ့အချိန် မုံရွာ-စစ်ကိုင်းကားလမ်းမပေါ်မှာ စစ်တပ်ကင်းပုန်းက ချောင်းပြီး အပစ်ခံလို့ကျဆုံးခဲ့ရတာပါ” လို့ ပြောပါတယ်။

ကျဆုံးသွားခဲ့တဲ့ တော်လှန်ရေးရဲဘော်ဟာ ချောင်းဦးအခြေစိုက်တော်လှန်ရေးတပ်ဖွဲ့တခုက တပ်ဖွဲ့ဝင်ရဲဘော်ဖြစ်ပြီး သူ့ရဲ့ရုပ်အလောင်းကို တော်လှန်ရေးတပ်ဖွဲ့တွေဘက်က ပြန်မသယ်နိုင်သေးဘူးလို့ သူက ဆက်ပြောပါတယ်။

စစ်ကောင်စီထောက်ခံသူတွေကတော့ မုံရွာ-စစ်ကိုင်းကားလမ်းပေါ်မှာ PDF တွေကို ပစ်ခတ်ရှင်းလင်းခဲ့ပြီး PDF အလောင်း ၁ လောင်း၊ M 22 သေနတ် ၁ လက်၊ ကျည်အိမ် ၁ ခု၊ ကျည် ၂၄ တောင့်၊ စကားပြောစက် ၁ လုံး၊ ဆိုင်ကယ် ၃ စီး သိမ်းဆည်းနိုင်ခဲ့တယ်လို့ တယ်လီဂရမ်ချယ်နယ်တွေကနေ ဖော်ပြနေကြပါတယ်။

စစ်ကိုင်းတိုင်းပြည်သူ့ကာကွယ်ရေးတပ်ဖွဲ့တာဝန်ခံတယောက်က “မုံရွာ-စစ်ကိုင်းကားလမ်းပေါ်မှာ တိုက်ပွဲဖြစ်တာမရှိဘဲ ရဲဘော် ၁ ယောက်အပစ်ခံရလို့ကျဆုံးသွားတယ် ဆိုတာကတော့ မှန်ပါတယ်။ ဖြစ်စဉ်အသေးစိတ်ကို မြေပြင်စုံစမ်း​မှုတွေလုပ်နေလို့ အတိအကျမပြောနိုင်သေးတာပါ။ အဲဒီကားလမ်းပေါ်မှာကတော့ စစ်တပ်ဘက်က ဂိတ်စခန်းတွေ၊ ကင်းပုန်းတွေရှိနေပြီး ခရီးသွားမော်တော်ယာဉ်တွေကို ခြိမ်းခြောက်အကြပ်ကိုင် ငွေတောင်းတဲ့ဖြစ်စဉ်တွေ မကြာခဏတော့ဖြစ်နေတယ်။ စစ်တပ်ဘက်က တိုက်ခိုက်ခံရတာတွေလည်းရှိတယ်” လို့ DVB ကို ပြောပါတယ်။

မုံရွာ-စစ်ကိုင်းကားလမ်းပေါ်မှာ စစ်ကောင်စီတပ်ဖွဲ့ဝင်တွေ မကြာခဏတိုက်ခိုက်ခံနေရပြီး စစ်ကောင်စီတပ်ဖွဲ့ဝင်တွေဘက်က ထိခိုက်သေဆုံးတာတွေရှိနေတယ်လို့လည်း မုံရွာအခြေစိုက် တော်လှန်ရေးတပ်ဖွဲ့တွေဆီကနေ သိရပါတယ်။