မကွေးတိုင်း၊ ပခုက္ကူမြို့နယ်ထဲက ကျေးရွာတွေကို စစ်ကောင်စီတပ်က စစ်ကြောင်းထိုး ဝင်ရောက်နေပြီး လက်နက်ကြီးတွေနဲ့ပါ ပစ်ခတ်နေလို့ ၂ နှစ်အရွယ် ကလေးငယ်တယောက် သေဆုံးခဲ့ရသလို ထောင်ချီတဲ့ ပြည်သူတွေလည်း နေရပ်စွန့်ခွာ ထွက်ပြေးနေကြရတယ်လို့ ဒေသခံတွေဆီကနေ သိရပါတယ်။

ပခုက္ကူမြို့နယ် လူထုလှုပ်ရှားမှုကော်မတီ တာဝန်ခံ ကိုစိုးထွဋ်က “ပခုက္ကူ တပ်မ ၁၀၁ ကနေ စစ်ကြောင်း ၂ ကြောင်း ထွက်လာတယ်။ ပထမတကြောင်းမှာ အင်အား ၃၀၀ ကျော်လောက် ရှိတယ်။ နောက်တကြောင်းကတော့ ၁၅၀ ကျော်လောက်ပဲ ရှိတာ။ အဲဒီစစ်ကြောင်းတွေက ပခုက္ကူမြို့နယ်ထဲက ရွာတွေနဲ့ မြိုင်နယ်အစပ်က ရွာတွေကို စစ်ကြောင်းထပ်ထိုးနေတာပါ” လို့ ပြောပါတယ်။

အဆိုပါ စစ်​ကောင်စီစစ်ကြောင်းတွေဟာ ပခုက္ကူ တပ်မ ၁၀၁ ထဲကနေ ဧပြီ ၂၈ ရက်က စစ်ကာအစီး ၂၀ နီးပါးနဲ့ ထွက်လာတဲ့ ပထမစစ်ကြောင်းဟာ အောင်သာ၊ ကမ္မ၊ မြစ်ခြေ၊ ညောင်ပင်လှနဲ့ ဆယ်ပင်စုကျေးရွာတွေကို စစ်ကြောင်းထိုး ဝင်ရောက်နေပြီး ဧပြီ ၃၀ ရက်မှာ ထွက်လာတဲ့ ခြေလျင်စစ်ကြောင်းကတော့ စိုတွင်း၊ ချောင်းဂွ၊ ဖလံအို ကျေးရွာတွေအပြင် မေ ၃ ရက်မှာတော့ မြိုင်မြို့နယ်ထဲက သင်းပေါင်းကန်ကျေးရွာဝန်းကျင်မှာ အထိုင်ချ တပ်စွဲနေတယ်လို့ ဆိုပါတယ်။

စစ်ဘေးရှောင်တွေကို ကူညီဆောင်ရွက်ပေးနေတဲ့ တော်လှန်ရေးရဲဘော်တယောက်က “တပ်မ ၁၀၁ ထဲကနေကော စစ်ကြောင်း ၂ ကြောင်းလုံးကကော ရွာဘက်တွေကို လက်နက်ကြီးတွေနဲ့ အရင်ထုတယ်။ ပြီးတော့မှ ရွာတွေထဲကိုဝင်စီးတာ။ ပစ္စည်းတွေလုတယ်။ နောက်ပြီးတော့ အိမ်တွေကိုမီးရှို့တယ်။ သူတို့ စစ်ကြောင်းထိုးတဲ့ လမ်းတလျှောက် ရွာတွေက ပြည်သူတွေ ထောင်နဲ့ချီပြီး ထွက်ပြေးနေကြရတာ အခုဆို ၇ ရက် ၈ ရက် ရှိနေပြီ။ သူတို့အတွက် စားစရာနဲ့ သောက်ရေသန့်တွေ လိုအပ်နေတာပါဗျ” လို့ DVB ကို ပြောပါတယ်။

ပြီးခဲ့တဲ့ မေ ၂ ရက်နေ့မှာတော့ တပ်မ ၁၀၁ ထဲကနေ ပစ်ခတ်လိုက်တဲ့ လက်နက်ကြီးကျည်ကြောင့် ၂ နှစ်အရွယ် ကလေးငယ်တယောက် သေဆုံးခဲ့တယ်လို့လည်း သိရပါတယ်။

ပခုက္ကူအခြေစိုက် တော်လှန်ရေးတပ်ဖွဲ့တခုရဲ့ တာဝန်ခံက “အဲဒီနေ့ ညနေပိုင်းမှာ တပ်မ ၁၀၁ ထဲကနေ ပစ်လိုက်တဲ့ လက်နက်ကြီးကျည်က ၄၊ ၅ လုံးရှိတယ်။ လက်နက်ကြီးကျည်တလုံးက ကျနော်တို့ ပခုက္ကူမြို့နယ်ထဲက အိမ်ခြေ ၂၀၀ ဝန်းကျင်ရှိတဲ့ မီးသွေးကန်ရွာထဲက အိမ်တလုံးပေါ်ကို အတည့်ကျလို့ အသက် ၂ နှစ်ကျော်လောက်ပဲ ရှိသေးတဲ့ ကလေးမလေးတယောက် ဗိုက်ပွင့်ပြီး ဆုံးသွားပါတယ်။ အသက် ၄ နှစ်လောက်ရှိတဲ့ ကလေးမလေးတယောက်နဲ့ အမျိုးသမီး ၂ ယောက်တို့ကတော့ ဒဏ်ရာပြင်းပြင်းထန်ထန်ရလို့ ဆေးကုသမှု ခံယူနေရပါတယ်။ အဲဒီရွာမှာ တပ်မ ၁၀၁ က စစ်သားအယောက် ၅၀ ကျော်လောက် တပ်စွဲနေတာ ကြာပြီ။ သူတို့ဘက်က တပ်စွဲနေတဲ့ရွာကို သူတို့တပ်ကပဲ လက်နက်ကြီးနဲ့ပစ်တာပါ” လို့ ပြောပါတယ်။

လက်နက်ကြီးနဲ့ ပစ်ခတ်ခံရပြီး နောက်နေ့ မေ ၃ ရက်မှာတော့ မီးသွေးကန်ကျေးရွာမှာ တပ်စွဲနေကြတဲ့ စစ်ကောင်စီတပ်ဖွဲ့ဝင်တွေဟာ အဆိုပါကျေးရွာက အမျိုးသား ၇ ယောက်ထက်မနည်းကို အကြောင်းမဲ့ဖမ်းဆီးပြီး ပခုက္ကူရဲစခန်းကို ခေါ်ဆောင်သွားကြပြီး မေ ၄ ရက် ညနေပိုင်းအထိ ပြန်လည်လွတ်မြောက်လာတာ မရှိသေးဘူးလို့ သူက ဆက်ပြောပါတယ်။

ပြီးခဲ့တဲ့ ဧပြီ ၂၃ ရက် ညနေပိုင်းမှာ ပခုက္ကူအခြေစိုက် တပ်မ ၁၀၁ ထဲကနေ ကျေးရွာတွေကို လေကြောင်းတိုက်ခိုက်ဖို့ တက်လာတဲ့ စက်တပ်လေထီးတွေထဲက တစီးကို တော်လှန်ရေးတပ်ဖွဲ့တွေဘက်က ပစ်ချကာ မီးရှို့ဖျက်ဆီးခဲ့ကြပြီးနောက်ပိုင်း ပခုက္ကူတပ်မ ၁၀၁ က စစ်ကောင်စီတပ်ဖွဲ့ဝင်တွေဟာ ကျေးရွာတွေကို အခုလို လက်နက်ကြီးတွေနဲ့ ပစ်ခတ်တာတွေနဲ့ မြေပြင်စစ်ကြောင်းထိုးတာတွေ ဆက်တိုက်ပြုလုပ်လာနေတာလို့လည်း ပခုက္ကူအခြေစိုက် တော်လှန်ရေးတပ်ဖွဲ့ဝင်တွေဆီကနေ သိရပါတယ်။