မကွေးတိုင်း၊ ပခုက္ကူမြို့နယ်မှာ ဧပြီ ၂၃ ရက်နေ့၊ ညနေ ၅ နာရီခွဲဝန်းကျင်မှာ စစ်ကောင်စီတပ်ရဲ့ စက်တပ်လေထီးတွေကို ပစ်ခတ်ခဲ့ရာ စက်ချို့ယွင်းသွားပြီး မြေပြင်ဆင်းသက်ခဲ့ရတဲ့ စက်တပ်လေထီး ၁ စီးအား မီးရှို့ဖျက်ဆီးခဲ့တယ်လို့ Burma Revolution Rangers ဆီကနေ သိရပါတယ်။
Burma Revolution Rangers ရဲ့ ပြန်ကြားရေးတာဝန်ခံ ကိုဒီမိက “ပခုက္ကူတပ်မ ၁၀၁ ထဲကနေ စက်တပ်လေထီး ၃ စီး တက်လာပြီး ကျနော်တို့ နယ်မြေထဲမှာ ဝဲနေလို့ ကျနော်တို့အဖွဲ့တွေက စောင့်ပြီးဝိုင်းပစ်ရင်း ၁ စီးရဲ့ အင်ဂျင်ပိုင်းကို ထိသွားတယ်။ အဲဒီအစီးက ပခုက္ကူမြို့ရဲ့မြောက်ဘက် ချောက်ကန်ရွာနားကို အရေးပေါ် ဆင်းသက်ခဲ့ရတာ။ အဲဒီနေရာကိုသွားပြီးတော့ နယ်မြေရှင်းလင်းရေးလုပ်ရင်း မီးရှို့ဖျက်ဆီးခဲ့တာပါ။ ကျန်တဲ့ ၂ စီးကတော့ ကြောက်ပြီး ၁၀၁ ထဲ ပြန်ဆင်းသွားတယ်”လို့ ပြောပါတယ်။
အဲဒီပစ်ခတ်မှုကို Burma Revolution Rangers တပ်ဖွဲ့နဲ့အတူ Pakokku People Defense Force (PPDF) တို့ ပူးပေါင်းလုပ်ဆောင်ခဲ့ကြတာလို့ ဆိုပါတယ်။
Burma Revolution Rangers တပ်ဖွဲ့တာဝန်ခံ ဗိုလ်ကာတွန်း က “အဲဒီစက်တပ်လေထီးဆင်းတဲ့နေရာကို သွားကြည့်တဲ့အခါမှာ ယာဥ်မောင်းတွေ မတွေ့ရတော့ဘူး။ ထွက်ပြေးသွားကြပြီ။ အဲဒါကြီးကို သယ်ဖို့လုပ်နေကြတုန်းမှာပဲ အခုနေရာနဲ့ တပ်မ ၁၀၁ က ၂ မိုင်ကျော်လောက်ပဲ ဝေးတာဆိုတော့ သူတို့ဘက်က စစ်ကားတွေ၊ တင့်ကားတွေနဲ့ကော အင်အားအလုံးအရင်းနဲ့ တက်လာကြတယ်လို့ သတင်းပို့လာတာနဲ့ သူတို့ဟာကြီးကို မသယ်နိုင်တော့တာနဲ့ မီးရှို့ဖျက်ဆီးခဲ့ရတာ” လို့ DVB ကို ပြောပါတယ်။
အဆိုပါ စက်တပ်လေထီးကို မီးရှို့ဖျက်ဆီးခဲ့ပေမဲ့ စက်တပ်လေထီး မောင်းနှင်သူ ဆောင်းတဲ့ စကားပြောစက်နဲ့တွဲတဲ့ နားကြပ်ပါ ဦးထုပ် ၁ လုံးကိုတော့ သိမ်းဆည်းရရှိခဲ့တယ်လို့ သူက ပြောပါတယ်။
အဆိုပါ စက်တပ်လေထီး ၃ စီးဟာ ဧပြီ ၂၂ ရက်ကမှ စစ်ကောင်စီလက်အောက်ခံ ပခုက္ကူအခြေစိုက် တပ်မ ၁၀၁ ထဲကို ရောက်ရှိလာကြတာဖြစ်ပြီး ကျေးရွာတွေဘက်ကို လေကြောင်းတိုက်ခိုက်ဖို့ ပျံသန်းရင်း အခုလို တိုက်ခိုက်ခံခဲ့ရတာလို့လည်း တပ်မ ၁၀၁ နဲ့ နီးစပ်သူတွေဆီကနေ သိရပါတယ်။
